ASTANA. 25 tamyz. Búgin Bas prokýratýrada Konstıtýsııanyń 20 jyldyǵyn merekeleýge arnalǵan saltanatty jınalys bolyp ótti. Bul týraly Bas prokýratýranyń baspasóz qyzmeti habarlady.
Bas prokýror Ashat Daýylbaev áriptesterin Konstıtýsııa kúnimen quttyqtaı otyryp, Ata Zańnyń táýelsiz Qazaqstannyń qalyptasýy jolyndaǵy tarıhı mánin, elimizdegi asa mańyzdy áleýmettik-ekonomıkalyq jáne saıası reformalardyń nátıjelerin, konstıtýsııalyq zańdylyqty jáne quqyqtyq tártipti qamtamasyz etýdegi prokýratýranyń rólin atap ótti.
Memleket basshysynyń kóregen saıasatynyń nátıjesinde Qazaqstan táýelsizdik alǵannan beri tereń áleýmettik-ekonomıkalyq jáne saıası ózgeristerdi qamtyǵan úlken joldy júrip ótti. Qazirgi Qazaqstannyń tarıhyndaǵy ótken jıyrma jyl Ata Zań men elimizdiń zańdarynyń ústemdigin qamtamasyz etý jónindegi strategııalyq mindetterdi júzege asyrý ýaqyty boldy. Osy turǵydan alǵanda konstıtýsııalyq zańdylyqty nyǵaıtý, memlekettiń turaqty damýy úshin qajetti jaǵdaılardy jasaý, ishki saıası turaqtylyqty jáne qoǵamnyń birligin saqtaýǵa erekshe kóńil bólindi. Osy mindetterdi oryndaýda memleket atynan zańdardyń naqty jáne dálme-dál qoldanylýyn joǵary qadaǵalaýdy, Konstıtýsııaǵa qaıshy keletin normatıvtik quqyqtyq aktilerdi anyqtaýdy júzege asyratyn prokýratýra organdaryna erekshe ról berilgen.
Bas prokýror saltanatty jaǵdaıda Memleket basshysynyń Jarlyǵymen nagradtalǵan prokýratýra organdarynyń ardagerleri men qyzmetkerlerine «Qazaqstan Konstıtýsııasyna 20 jyl» mereıtoılyq medalin tapsyrdy.
Osy mereke qarsańynda prokýrorlardyń arasynda Konstıtýsııanyń mereıtoıyna arnalǵan úzdik taqyryptyq jumystardyń baıqaýy ótkizilgen bolatyn. Konkýrs jeńimpazdary vedomstvolyq nagradalarmen jáne bas prokýrordyń alǵys hattarymen atalyp ótildi.
Sondaı-aq, saltanatty jınalysqa qatysqan Qazaqstan Zańgerler Odaǵynyń tóraǵasy, Parlament Májilisiniń zańnama jáne sot-quqyqtyq reformalar jónindegi komıtetiniń tóraǵasy Rahmet Muqashev Bas prokýratýranyń basshylaryna «Qazaqstannyń qurmetti zańgeri» tósbelgisin tabys etti.
Bas prokýror nagrada ıegerlerin quttyqtap, olardyń barlyǵyna elimizdegi zańdylyqty jáne quqyqtyq tártipti qamtamasyz etý jónindegi jaýapty mindetterdi oryndaýda odan ári jetistikter tiledi.
Elaman Qońyr.
Derek: Bas prokýratýranyń baspasóz qyzmeti.
Sýret: egemen.kz.