ASTANA. 25 tamyz. Tájikstannyń astanasy – Dýshanbe qalasynyń turǵyny Amır Isaev dostarymen birge týǵan kúnin atap ótkeni úshin aqshalaı aıyp tóleýge májbúr boldy. Bul týraly ras.kz habarlady.
Jas jigit 25 jasqa tolǵanyn joldas-joralarynyń ortasynda kafede toılaıdy. Sońynan sondaǵy túsken sýretteriniń birazyn Facebook jelisindegi paraqshasyna salady.
Mine, osy sýretter quqyq qorǵaý organdarynyń nazaryn aýdarady. Olar osyǵan qarap, týǵan kún ıesiniń «Saltanattardy tártipteý týraly» zańnyń buzǵanyna kóz jetkizedi. Al zańda: «týǵan kúnder óz erikterimen tek otbasy sheńberinde atap ótiledi» dep jazylǵan eken.
Sondyqtan Amır kafede dastarhan jaıyp, meımandaryn tortpen syılaǵany úshin... 4 myń somonı (shamamen 633 dollar) kóleminde aıypqa tartylady.
Isaev sotta munyń toı bolmaǵanyn dáleldep baǵady. Ol kelýshilerdiń árqaısysy dastarhan úshin ózderi aqsha tólegenin aıtady. Sondaı-aq oǵan eshkim syılyq ákelmepti.
Alaıda, sýdıa bul dálelderdiń bárin tánge almapty.
Al álgindegideı qyzyq zań 2007 jyly prezıdent Emomalı Rahmonnyń bastamasy boıynsha qabyldanǵan eken. Ol respýblıka turǵyndarynyń osyndaı shaǵyn toılar ótkizý úshin bankten kredıt alyp, ony óteı almaı júretindikterine qaraı qabyldanypty. Osy zańǵa sáıkes, saltanatqa kelýshiler sanyna, taǵamyna shek qoıylǵan.
Talǵat Raıymbek.