Sırk – sahnalyq ónerdiń óte erteden kele jatqan túri. Sırk óneri asqan eptilik pen kúshtilikke negizdelgen pantomımalyq oıyn-saýyqtar men kloýnnyń kúlkili ázil-ájýalarynan, oıyn-saýyǵy alýan túrli trıýkter men ekssentrıkaǵa negizdelgen nómirlerden turady. Oǵan sońǵy jyldary Astana qalasynda dástúrli túrde ótkizilip kele jatqan «Azııa jańǵyryǵy» atty sırk óneriniń halyqaralyq festıvali aıǵaq.
Bıyl da Qala kúnin merekeleý aıasynda Astanalyq sırk elorda ákimdiginiń qoldaýymen 1-8 shilde aralyǵynda jyl saıynǵy «Azııa jańǵyryǵy» atty sırk óneriniń dástúrli VIII festıvalin ótkizedi. Bir apta boıy jalǵasatyn bul merekelik shara baǵdarlamasynda Qazaqstan, Belarýs, Ispanııa, Kýba, Latvııa, Reseı, Qytaı, Qyrǵyzstan, О́zbekstan jáne Ýkraına men elimizdiń eń tanymal sırk juldyzdary óner kórsetpek. Sondaı-aq, atalmysh baǵdarlamada sırk óneriniń barlyq janrlary tolyq qamtylǵan. Bul týraly Astana sırkiniń dırektory Erik Joljaqsynov alys-jaqyn shetelderden kelgen sırk maıtalmandarymen bolǵan basqosýda keńinen toqtalyp ótti.
Onyń aıtýynsha, bul joly kórermender sırktiń eń úzdik kórinisterin tamashalaıtyn bolady. Olardyń arasynda: Afrıka arystandary, áýe gımnasttarynyń bas aınaldyrar qoıylymdary men kloýndardyń shoýlary bar. Sondaı-aq, festıvalde astanalyqtar men qala qonaqtary úshin tek qana jańa qoıylymdar jurtshylyq nazaryna usynylmaq.
Eń qyzyǵy ári merekelik sharanyń eń aıtýly oqıǵasy – «Kavalkada» atty úrmeli orkestrdiń súıemeldeýimen ótetin festıval qatysýshylarynyń Astana kóshelerindegi merekelik sherýi bolmaq. Aıta keteıik, sherý 3 shilde kúni saǵat 20:00-de elorda kóshelerimen saltanatty sap quryp ótedi.
Raýshan TÁÝIRHANQYZY,
jýrnalıst.