Premer-Mınıstrdiń birinshi orynbasary Baqytjan Saǵyntaev jáne QKP OK Saıası bıýrosy Turaqty komıtetiniń múshesi, QHR Memlekettik keńesiniń vıse-premeri Chjan Gaolı Pekınde Yntymaqtastyq jónindegi Qazaqstan-Qytaı komıtetiniń jetinshi otyrysyn ótkizdi, dep habarlady Premer-Mınıstrdiń baspasóz qyzmeti.
Bul otyrys Qazaqstan Prezıdenti Nursultan Nazarbaevtyń 31 tamyz – 3 qyrkúıek aralyǵyndaǵy Qytaıǵa sapary qarsańynda ótip otyr.
Otyrys barysynda taraptar Qazaqstan Prezıdentiniń QHR-ǵa sapary barysynda qol qoıylatyn birqatar kelisimderdi qarady, Nursultan Nazarbaev jarııalaǵan «Nurly Jol» Jańa Ekonomıkalyq Saıasaty men QHR Tóraǵasy Sı Szınpınniń «Bir beldeý, bir jol» bastamasy sheńberindegi jobalardy júzege asyrý joldaryn talqylady. Al olar elder arasynda ózara tıimdi yntymaqtastyqtyń jańa perspektıvalaryn ashatyn bolady.
Kelissózder barysynda sol sııaqty, saýda-ekonomıkalyq, ındýstrııalyq jáne ınvestısııalyq yntymaqtastyq, tranzıttik kólik jobalary sheńberindegi ózara is-qımyldar, transshekaralyq ózenderdiń sý resýrstaryn ońtaıly paıdalaný jáne qorǵaý boıynsha yntymaqtastyqty nyǵaıtý máseleleri talqylandy. Otyrysqa qatysýshylar energetıka, aýyl sharýashylyǵy, ǵylymı-tehnıkalyq qyzmet jáne basqa da salalardaǵy áriptestikti áńgime ózegine aınaldyrdy.
Qazaqstan Respýblıkasy Premer-Mınıstriniń birinshi orynbasary Qytaı kompanııalaryn Astanada ótetin EKSPO-2017 halyqaralyq kórmesine belsendi qatysýǵa shaqyrdy, sondaı-aq, kórme sheńberinde ShYU pavılonyn ashý týraly Qazaqstannyń bastamasyn júzege asyrýǵa naqty mańyz berýdi usyndy.
Baqytjan Saǵyntaev sol sııaqty, QKP OK Saıası bıýrosy Turaqty komıtetiniń múshesi, QHR Memlekettik keńesiniń Premeri Lı Kesıanmen kezdesý ótkizip, onyń barysynda taraptar memleketterdiń munaı-gaz sektory, atom energııasy, aýyl sharýashylyǵy, týrızm jáne basqa da basymdyqty salalardaǵy yntymaqtastyǵyn jalǵastyrýy qajettigin atap kórsetti.