Kúndelikti ómirde qandaı sýsyn ishesiz? Mysaly, kafe-meıramhanalarǵa barǵanda nemese qonaqta bolǵanda. Baıqasańyz, adamdar kóbine alma men apelsın, mýltıvıtamın sekildi shyryndy ishedi. Bul jerde qarapaıym aýyz sýdan basqa gazdalǵan jáne túrli qospasy bar sýsyndardy esepke alyp otyrǵanymyz joq. Toıda ne dosyńyzdyń úıinde «maǵan qyzanaq shyrynyn quıshy» degen adamdy sırek kezdestiretinińiz anyq. Biraq osy qyzanaq shyryny kóp ishiletin jer bar. Qaıda? Aspanda.
Ushaqqa mingen saıyn óz-ózimizge tań qalamyz. Samsap kelgen sýsynnyń ishinen bortserik qyzǵa qyzanaq shyrynyn berýdi ótinemiz. Ádette, sýsynnyń bul túrin ishpeıtinimiz belgili. Al kókte bir emes, birnesheýin ishetin kezimiz bolady. Sosyn qyzanaq shyrynyn suraıtyn jalǵyz biz emes sekildi. Ushaqqa ár mingen saıyn aınalamyzǵa jiti kóz tastap otyramyz. Jurttyń basym bóligi atalǵan sýsyndy aldyrtyp jatady. Keı kezderi taýsylyp ta qalady. Nege deımiz ǵoı. Bylaıǵy kezde kerek etpeıtin sýsynǵa kókte kele jatqanda tábetimizdiń tartatyny nesi? Osy suraqtyń jaýabyn jaqynda taptyq.
Lufthansa áýe kompanııasy osy máseleni arnaıy zerttepti. Nátıjesinde jolaýshynyń ár tórtinshisi dál qyzanaq shyrynyn unatady eken. Bul shamamen kompanııanyń qyzmetin paıdalanatyn halyqtyń 27 paıyzy. «Nege?» degen suraqqa olar bylaı dep jaýap bergen. Suraý salynǵandardyń jartysy únemi qyzanaq shyrynyn iship júrgenderin jetkizgen. Tórtten biri ushaqtyń ishinde qyzanaq shyryny táttirek bolady dep eskeretinderin aıtqan. Al qalǵandary eshbir sebepti aıtpaı, bolmasa jaı ǵana basqalarǵa uqsap, qaıtalap tapsyrys bergenin jetkizgen. Qarap otyrsańyz, jaýap birkelki emes. Ártúrli. Degenmen, qyzanaq shyrynynyń áýede jıi ishiletini belgili bolyp otyr.
Qyzanaq shyrynynyń kópshilik arasynda sonshalyqty unamdy bolýyn óte ońaı túsindirýge bolady. Bıiktikte qysymnyń aıyrmasyna baılanysty astyń dámi tómendeıdi de, sondyqtan tuz ben qant óz kúshterin 30 paıyzǵa joǵaltady. Sonyń saldarynan qyzanaq shyryny jerden góri, áýede anaǵurlym táttirek bolady eken.
Erjan BAITILES,
«Egemen Qazaqstan».
QYZYLORDA.