ASTANA. 10 naýryz. Astanada Qazaqstan Respýblıkasynyń Prezıdenti Nursultan Nazarbaev, Reseı Prezıdenti Vladımır Pýtın jáne Belarýs Prezıdenti Aleksandr Lýkashenko úshjaqty kezdesý ótkizedi. Bul týraly Aqorda saıty habarlady.
«13 naýryzda elordada Qazaqstan Respýblıkasy, Belarýs Respýblıkasy jáne Reseı Federasııasy prezıdentteriniń úshjaqty kezdesýin ótkizý josparlanǵan. Memleketter basshylary úsh eldiń ózara saýdasy men ekonomıkalyq yqpaldastyǵyn ulǵaıtý máselelerin qarastyrady. Sonymen qatar prezıdentter álemdik ekonomıkadaǵy úrdisterdiń damýyn jáne Ýkraınadaǵy ahýaldy talqylaıdy», - delingen baspasóz habarlamasynda.
Eske sala keteıik, 2015 jyldyń aqpan aıynda Qazaqstannyń Belarýs elindegi elshisi Erǵalı Bólegenov pen osy eldiń Syrtqy ister mınıstri Vladımır Makeı Qazaqstan Respýblıkasynyń Prezıdenti Nursultan Nazarbaevtyń, Belarýs prezıdenti Aleksandr Lýkashenkonyń jáne Reseı prezıdenti Vladımır Pýtınniń úshjaqty kezdesýin taıaý ýaqytta Astanada ótkizý múmkindigin talqylaǵan bolatyn. «Suhbat barysynda eki jaqty yntymaqtastyq jáne halyqaralyq alańdarda, sonyń ishinde TMD, EAEO sheńberinde yqpaldastyq máseleleri talqylandy. Sonymen qatar, jaqynda josparlanǵan Qazaqstan, Belarýs, Reseı prezıdentteriniń Astanada úshjaqty kezdesýiniń kún tártibi týraly pikir almasyldy», - delingen edi Qazaqstan Syrtqy ister mınıstrliginiń baspasóz habarlamasynda.
Sáken Maılybaı.