Elbasy Nursultan Nazarbaev ortalyq bılik organdarynyń apparattaryn bilikti de bilimdi memlekettik qyzmetkerlermen tolyqtyrý máselesin udaıy nazarda ustap, turaqty kóńil bólip otyrady. Jaqynda Memleket basshysy óńirlerdegi bilikti jas kadrlardy ortalyqtaǵy memlekettik qyzmetke tartý, ortalyq apparattardaǵy tájirıbeli kadrlardy jergilikti jerlerge jiberip, turaqty kadr almastyrý tájirıbesin qalyptastyrýdy usynǵan bolatyn. Al memlekettik qyzmetke tartylǵan jas kadrlardyń áleýmettik-turmystyq máselesin sheshý de kezek kúttirmeıtin mindet.
Jaqynda Qazaqstan Respýblıkasynyń Memlekettik qyzmet isteri jónindegi agenttigi Astana qalasynyń sol jaǵalaýynda 32 myń sharshy metrden astam aýmaqty alyp jatqan memlekettik qyzmet salasynyń jas kadrlaryna arnalǵan 9 qabatty jańa jataqhana ǵımaratyn paıdalanýǵa berdi. Tórt bloktan turatyn bul zamanaýı jataqhanada 1000 jas mamanǵa arnalǵan turǵyn bólmeler jabdyqtalǵan. Jataqhananyń árbir qabatynda demalys bólmeleri, as úı, kir jýatyn oryn jáne basqa turmystyq bólmeler bar. Jas mamandar turatyn jataqhana bólmeleri jıhazdarmen tolyq jabdyqtalǵan.
Árbir blokta sport alańdary bar. Sondaı-aq jas mamandardyń dene tárbıesimen shuǵyldanýlary úshin voleıbol, basketbol alańdary men tennıs korttary jumys isteıdi. Jańa jataqhana ǵımaraty 32723 sharshy metr aýmaqty alyp jatsa, onyń turǵynjaılary 10850 sharshy metr kólemge qonystanǵan. Jataqhanada barlyǵy 750 turǵynjaı bólmeleri bar. Onyń 500-i bir oryndyq, 250-i eki oryndyq bólmeler. Bir oryndyq bólmege jas mamandar aıyna 16200 teńge, eki oryndyq bólmelerge 11700 teńge páteraqy tóleıdi.
Memlekettik qyzmet isteri jónindegi agenttik tóraǵasynyń orynbasary A.Kómekbaevtyń aıtýynsha, bul jataqhanaǵa elordadaǵy 45 memlekettik organnyń jas mamandary qonystanatyn bolady. Agenttik árbir memlekettik organǵa tıisti kvota beredi. Al kvota alǵan memlekettik qyzmet salasy jataqhanaǵa kimdi jiberetindikterin ózderi sheshetin bolady. Zaman talabyna saı jabdyqtalǵan bul jas mamandar jataqhanasyn salýǵa bıýdjetten 2 mıllıard 759 mıllıon teńge qarjy bólingen. Qazir ortalyq memlekettik organdardyń 500 jas mamany jataqhana kiltterin aldy. Al tamyz aıynda qalǵan 500 mamanǵa bólmelerdiń kilti tapsyrylatyn bolady.
Jańa jataqhanadan jeke bólme alǵan bir jas mamandy áńgimege tarttyq. О́zin Ashat Eskendirovpin dep tanystyrǵan jas jigit Qostanaı oblysynan kelgen eken. Ol oblystaǵy aımaqtyq memlekettik qyzmet isteri jónindegi basqarmada bir jyldan astam eńbek etip, ortalyq apparattyń shaqyrýymen Astanaǵa kelipti. Aınalasy 1-2 aıdyń ishinde agenttik jas mamanǵa jańa jataqhanadan oryn bólgen. “Elbasy Nursultan Nazarbaev jas kadrlardyń jemisti eńbegi men odan ári ósý baspaldaqtary úshin shynaıy kómegin jasap otyrady. Men óz basym jas maman retinde Memleket basshysynyń qamqorlyǵyn únemi sezinip kelemin. Sol úshin Elbasyna aıtar alǵysym sheksiz”, deıdi ol.
Jylqybaı JAǴYPARULY.