ASTANA. 10 naýryz. Ortalyq saılaý komıssııasy Prezıdent saılaýyna qatysýǵa tilek bildirgen taǵy úsh úmitkerdi tirkeýden bas tartty. Bul týraly Ortalyq saılaý komıssııasynyń baspasóz qyzmeti habarlady.
«Qoǵam qaıratkeri Esenbek Úkteshbaev, «Kenesary han» qorynyń basshysy Ýálıhan Qaısarov jáne maı quıý stansasynyń bastyǵy Qanat Juman memlekettik til boıynsha emtıhannan óte almady», - delingen habarlamada.
Osyǵan baılanysty Ortalyq saılaý komıssııasy Qazaqstan Prezıdenttigine úmitkerler sanatyndaǵy bul úsheýdi tirkeýden bas tartqan.
Naýryzdyń 9-y kúni lıngvıstıkalyq komıssııa qoǵam qaıratkeri Esenbek Úkteshbaev pen «Kenesary han» qorynyń basshysy Ýálıhan Qaısarovty memlekettik tildi erkin meńgermegen dep tapty. Al 7 naýryz kúni maı quıý stansasynyń bastyǵy Qanat Juman osy synaqtan óte almaǵan bolatyn.
Lıngvıstıkalyq komıssııanyń tóraǵasy Myrzataı Joldasbekov jýrnalısterge Úkteshbaevtyń tapsyrǵan emtıhany barysy týraly bylaısha áńgimelep berdi:
«Taqyrypty ashý talap etiletin jazba jumysy tapsyrmasyn oryndaýda úmitker sózder qurylymyndaǵy ádebı tildiń normalaryn buza otyryp, sóılemdi stılıstıkalyq jaǵynan burys jazǵanynan bólek, óz oılaryn qısyn jaǵynan durystap jetkizip bere almady. Úmitker shyǵarmanyń kólemin eki paraqqa jetkizý jónindegi tapsyrmanyń da údesinen shyqqan joq. Ol kelesi tapsyrmada Muqaǵalı Maqataevtyń «Sezim» degen óleńin oqyp turǵanda, qatelikter jiberdi jáne komıssııanyń shyǵarma mazmuny týraly qoıǵan suraǵyna jaýap bere almady. Kandıdat «Qoǵam jáne demokratııa» taqyrybynda sóz sóıleý jónindegi tapsyrma boıynsha tıisti 15 mınýttyń ornyna 10 mınýt qana sóıledi. Onda da ádebı sózdiń normasyn buzyp, qoıylǵan suraqtarǵa qanaǵattanǵysyz jaýap berdi».
Murat Aıtqoja.