ASTANA. 10 naýryz. Qazaqstannyń maı quıý stansalaryndaǵy benzınniń baǵasy taǵy da arzandaıdy. Bul týraly «Mır 24» arnasynyń tilshisi habarlady.
«Qazaqstannyń júrgizýshileri budan keletin paıdany eseptep jatyr. Maı quıý stansalarynda benzınniń baǵasy arzandaıdy. Qazir eń tanymal marka – 92-shi benzınge avtoáýesqoılar 50 sentten beretin bolady», - dedi arna tilshisi Alena Han.
Osyǵan baılanysty ekonomıster benzınniń 15 sentke arzandaýy munaı baǵamynyń túsip ketýinen týyndap otyrǵanyn aıtady. Bul Reseı rýbliniń túsip ketýine de baılanysty bolyp otyr. Onda eń tanymal 92 markaly benzınniń quny bar-joǵy jarty dollar turady.
«Rýbldiń qunsyzdana bastaýy benzındi tutynýshylarǵa qýanyshty jańalyqtar ákelip jatyr. Benzın kóp jyldardan beri birinshi ret arzandap otyr. Al ótken jylǵy jeltoqsannan beri bul baǵanyń úshinshi márte arzandaýy bolmaq», - dedi ekonomıst Sergeı Smırnov.
Statıstıka kórsetip otyrǵandaı, tek ońtústik astananyń ózinde qazir tirkeýge alynǵan 600 myńnan astam kólik bar eken. Sońǵy jıyrma jylda bul sıfr úsh esege jýyq kóbeıdi. Sondyqtan qala turǵyndary úshin benzın qashannan ótimdi taýar bolyp keldi. Tek bıylǵy jyldyń basynan beri qaraı ǵana munda Reseıden úsh júz myń tonnanyń ústinde benzın ákelinipti. Osydan keıin sheneýnikter jınalǵan qordy jetkilikti sanap, kórshi elden jaǵan maı ákelýge ýaqytsha tyıym salǵan. Qazirgi tańda Qazaqstannyń benzın qoımalary aýzy-murnynan shyǵyp tur. Osy kezde jaz shyqqanǵa deıin eldegi benzınniń baǵasy budan da arzandaı túsetinin senimmen aıta berýge bolady.
Búginde respýblıkada munaı óńdeý zaýyttary qaıta jańǵyrtylyp jatyr. Bul prosess kelesi jyly aıaqtalady. Birqatar sarapshylardyń aıtýlarynsha, sol kezde Qazaqstan ózin ózi benzınmen tolyq qamtamasyz ete alatyn bolady.
Murat Aıtqoja.