Jeńistiń 70 jyldyǵyna arnalǵan áskerı paradqa 180-nen astam áskerı qyzmetshi qyz-kelinshekter qatysady
Qazaqstan Qarýly Kúshteriniń áskerı qyzmetshi qyz-kelinshekteri Uly Otan soǵysyndaǵy Jeńistiń 70 jyldyǵy qarsańynda ótetin áskerı paradqa erekshe kórik beredi. Jalpy sany 186 paradqa qatysýshy qyz-kelinshek iriktelip alyndy.
Olardyń ishinde 32 áskerı qyzmetshi sanıtarlyq nusqaýshy úlgisinde kıinip, paradtyń UOS kezeńindegi tarıhı bólimindegi rota quramynda bolsa, al qalǵan 154 áskerı qyzmetshi paradtyń qazirgi zamanǵy bóliminde alańda qazaqstandyq áskerı joǵary oqý oryndarynyń kýrsanttarynan keıin jeke jaıaý sappen adymdaıtyn bolady.
Áskerı qyz-kelinshekter Qazaqstannyń tórt óńirlik qolbasshylyǵynan, Qarýly Kúshterdiń barlyq túrleri men ásker tekteriniń áskerı bólimderinen, sondaı-aq, Qorǵanys mınıstrliginiń ortalyq apparatynan jınaldy.
Osy ýaqytqa deıin olar jeke-jeke jattyqty. Odan keıin jergilikti jerlerde saptyq jarǵyǵa sáıkes sap quramynda biryńǵaı qarqyn men yrǵaqty, sap túzýligin saqtaı otyryp, jınaqy jáne serpindi adymdaýǵa daıyndaldy. Qazir qyz-kelinshekter quramy bir lekte birlesken jattyǵýǵa kirisýge daıyn.
«Egemen-aqparat».