Balqash qalasynyń turǵyny Halyq Aıashbekov shırek ǵasyr boıy ishki ister organdarynda jemisti qyzmet etip, mılısııa podpolkovnıgi sheninde qurmetti eńbek demalysyna shyqqan ardager saqshy.
Halyq aǵanyń kir jýyp, kindik kesken jeri Balqash kóliniń jaǵasyndaǵy Saryshaǵan degen eldi meken. Uly Otan soǵysy ardageriniń otbasynda dúnıege keldi. Ákesi Shaımaǵanbet pen anasy Sara uzaq jyldar temirjol salasynda abyroıly qyzmet etken qarapaıym jandar.
Kúnderdiń bir kúninde ústime mýndır kıip, tártip saqshysy bolam-aý degen oı Halyq aǵanyń úsh uıyqtasa túsine kirmegen. Áskerı qyzmetin ótep kelgennen keıin Qarqaralydaǵy mal dárigerlik tehnıkýmdy bitirip, mamandyǵy boıynsha eńbek etýge qulshynyp júrgen kezi-tuǵyn. Sol kezde eki ıyǵyna eki kisi mingendeı alyp deneli jigitti ishki ister organdarynyń basshylary kezdeısoq baıqap qalyp, jumysqa shaqyrǵan. Qylmyskerdiń nesheme túrimen aıamaı kúres júrgizý úshin de dál osy Halyq aǵadaı qara kúshke myǵym, tártibi temirdeı jigitter aýadaı qajet bolatyn.
Sóıtip, oılamaǵan jerden ishki ister qyzmetkeri bolyp shyǵa kelgen. Eńbek jolyn SMUKB (OBHSS) – sosıalıstik menshikti urlaýǵa qarsy kúres bóliminde bastady. Bólim bastyǵy A.Nuryshev jáne A.Baınazarov, M.Kııakın syndy qyzmetkerlermen til tabysyp, tize qosa eńbek etti. Talǵat Qasenov syndy ustazynyń shapaǵatyn da kóp kórdi.
Halyq Shaımaǵanbetulynyń týǵan aǵasy Qalqaman da ishki ister salasynda uzaq jyldar eńbek etip, podpolkovnık sheninde zeınet demalysyna shyqqan jan. Qyzmetin adal atqarypty. Alǵys pen marapat qana alǵan. Tipti aǵasynyń Ardaq degen qyzy da Almaty qalasynyń jol polısııasynda jemisti qyzmet etip, bul kúnde qurmetti eńbek demalysyna shyqqan eken.
Halyq aǵanyń úıdegi zaıyby Baıan Bákenqyzy da ishki ister organdarynyń ardageri. Endi kelip, «Áke kórgen oq jonar» demekshi, ekeýiniń uldary da ata-ananyń jolyn qýyp, tártip saqshysy boldy. Eki uldyń ekeýi de áke men shesheniń abyroıyna kir keltirmedi. Qyzmetterin minsiz atqaryp júr. Úlkeni Darhan «Minsiz qyzmeti úshin» medaliniń úsh birdeı dárejesimen marapattalǵan. Qazirgi ýaqytta polısııa maıory sheninde. Al ekinshi ul Dastan da aǵasynan qalyspaı, abyroı bıiginen kórinip keledi. Jas kapıtan «Minsiz qyzmeti úshin» medaliniń II, III dárejelerin omyraýyna taqqan.
Qazirgi ýaqytta ekeýi de úıli-barandy. Áke men sheshege nemere syılap, Balqashtaǵy arqa-jarqa bolyp otyrǵan bazarly otbasylardyń biri.
Aıashbekovter otbasy bıyl Balqash qalasynda ótken «Mereıli otbasy» baıqaýynda top jaryp shyqty. Polısııanyń minsiz qyzmetkerleri kórermen qaýym men qazylar alqasyn san qyrly ónerimen jáne de ómirge degen shynaıy kózqarastarymen baýrap alǵan bolatyn. Al Qaraǵandyda ótken «Mereıli otbasynyń» oblystyq synynda talaı otbasynyń arasynan ozyp shyǵyp, júldeli úshinshi oryndy jeńip aldy.
«Mundaı baıqaýlardy uıymdastyrýshylarǵa zor alǵysymdy aıtqym keledi. Bile-bilgen adamǵa «Mereıli otbasy» syndy baıqaýlar el ishinde otbasy uǵymynyń qadirin arttyryp, bereke-birlikti kúsheıte túsedi. Al otbasy aırandaı uıysa, el qabyrǵasy da bekı túsedi. Sonan soń mundaı synaqtar keıingi jastarǵa da úlgi-ónege bolatyn ıgi shara», deıdi otaǵasy Halyq aǵa Aıashbekov.
Qaırat ÁBILDINOV,
«Egemen Qazaqstan».
Qaraǵandy oblysy.