Jáńgir han atyndaǵy Batys Qazaqstan agrarlyq-tehnıkalyq ýnıversıtetinde munaı-gaz jáne servıstik tehnologııalar ortalyǵy ashyldy.
Sheteldik kompanııalarda qazaqstandyq úlesti arttyrý, ulttyq múddeni nyǵaıtý úshin óz kadrlarymyzdy kóbeıtý máselesi shildeniń 22-sinde Premer-Mınıstr Kárim Másimovtiń BQO-ǵa jasaǵan sapary barysynda talqylanǵan bolatyn. Batysqazaqstandyq ýnıversıtettegi jańa ortalyq ta Úkimet qoıyp otyrǵan talaptar aıasynda ekendigi anyq edi.
Ortalyqtyń ashylý rásiminde oblys ákiminiń birinshi orynbasary Nurlan Noǵaevtyń atap ótkenindeı, sheteldik mamandardy ulttyq kadrlarmen almastyrý ońaı másele emes. Bul úshin, eń aldymen sol jastardyń ózi jan-jaqty bilim alyp, ony is júzinde paıdalana bilýi, bylaısha aıtqanda, básekege qabiletti bolýy tıis. Buǵan osyndaı ortalyqtar arqyly qol jetkizýge bolady. Atalmysh ortalyq basshysy Erlan Muratovtyń aıtýynsha, munda munaı-gaz mamandyqtary boıynsha joo túlekteri jańa tehnologııalardy meńgerip, shet tilderdi oqıdy. Qazirdiń ózinde 150 jas iriktelip alyndy.
Bolashaqta qurylys mamandyqtaryn ıgerýshiler de osyndaı múmkindikke qol jetkizbek.
Temir QUSAIYN.
ORAL.