Qazaqstan Respýblıkasy Tuńǵysh Prezıdenti – Elbasynyń Qory ústimizdegi jyly «Yntymaǵy men birligi jarasqan Qazaqstan» atty taqyrypta kezekti respýblıkalyq áleýmettik ıdeıalar men jobalar konkýrsyn jarııalady. Qazaqstan halqy Assamleıasy jylyna arnalǵan konkýrstyń maqsaty qoǵamdy tatýlyqqa toptastyrý, patrıotızmdi nyǵaıtý, kommersııalyq emes qoǵamdyq uıymdardyń ózekti áleýmettik mańyzdy problemalardy sheshýge atsalysýyna qoldaý jasaý bolyp tabylady.
Jaqynda oblys ortalyǵyndaǵy muǵalimder biliktiligin jetildirý ınstıtýtynyń ǵımaratynda úkimettik emes uıymdarǵa arnalǵan oqytý semınarlary men úzdik áleýmettik jobalardy anyqtaý úshin tusaýkeser-kórmeler ótkizildi.
Áleýmettik jobalar konkýrsy 2008 jyldan uıymdastyrylyp keledi. Osy kezeńde oǵan 100-den astam túrli qoǵamdyq uıymdar qatysty. Elimizdiń kez kelgen óńirinen kommersııalyq emes uıymdar óz jobalaryn konkýrsqa jibere alady, eger qajetti talaptarǵa sáıkes keletin bolsa, olardy júzege asyrýǵa qarajat bólinedi. Konkýrstyń talaptary boıynsha qatysýshylar óz jobalaryna negizdeme usynýy, bólingen qarajatty qalaı jumsaıtyny jáne óńirdiń turǵyndaryna qandaı túpkilikti nátıje beretini jóninde túsinikteme berýi tıis.
Sarapshylardyń pikirinshe, áleýmettik ıdeıalar men jobalar konkýrsy áleýmettik mańyzdy problemalardy sheshýge qabiletti belsendi qoǵamdyq uıymdardyń sanyn ulǵaıtýǵa, sondaı-aq joǵarydan kúshtep mindettelgen emes, tómennen qolǵa alynǵan áleýmettik bastamalardy jandandyrýǵa jaǵdaı jasaıdy.
Áleýmettik jobalar konkýrsynyń aımaqtyq tusaýkeser-kórmesine Atyraý, Mańǵystaý, Batys Qazaqstan jáne Aqtóbe oblystarynan 17 joba qatysty. Sharany qysqasha sóz sóılep ashqan Marat Ospanov qorynyń prezıdenti Baqyt Ahmetqalıeva áleýmetik máselelerdi oń sheshýdegi úkimettik emes uıymdardyń róline toqtala kelip, olardyń qoǵam damýyna serpin berýdegi úlesin aıryqsha atap ótti. Osy maqsatta áleýmettik jobalar jármeńkelerin óńirlerde ótkizý bul baǵyttaǵy jumystardyń aýqymyn keńeıte túskenin tilge tıek ete ketti. Jalpy, qoǵamda úkimettik emes uıymdar aınalysatyn máselelerdiń kóptigin, soǵan belsendilik tanytý qajettigin de áńgime ózegine aınaldyrdy.
Tusaýkeser - kórme ashylǵannan keıin granttan úmitkerler ózderiniń jobalaryn qorǵaýǵa kiristi.
– Biz «Dostyq qala – qýatty el» atty áleýmettik jobany júzege asyrǵymyz keledi. Bizdiń úkimettik emes uıym on bes jyldan beri jumys isteıdi. Buǵan deıin de kóptegen áleýmettik jobalardy júzege asyryp, tájirıbe jınadyq. Bul joba arqyly qaladaǵy qoǵamdyq tártiptiń nyǵaıýyna, turǵyndardy qalanyń ómirine keńinen tartýǵa, jastar men stýdentterdiń bos ýaqytyn tıimdi ótkizýge uıytqy bolatyndaı sharalar uıymdastyrý oıda bar. Qala, turǵyn úı alańdarynda kezdesýler, dóńgelek ústelder, teatrlandyrylǵan qoıylymdar uıymdastyrý arqyly 500-den astam adamdy qamtýǵa qol jetkizemiz. Múmkindigi shekteýli qolóner sheberleriniń kórmesin, «Meniń súıikti kórshim» konkýrsyn, avtosherý jáne «Meniń kishi Otanym» atty konkýrs pen basqa sharalar ótkizý arqyly shahar mádenıetin arttyrýǵa úles qosamyz. Osyndaı sharalarmen aýdandardy da qamtımyz, – deıdi «Aqtóbe qalasyndaǵy sal aýrýlaryna shaldyqqan azamattar quqyǵyn qorǵaý qoǵamy» qoǵamdyq birlestiginiń tóraıymy Quralaı Báımenova.
Al, mańǵystaýlyq Kúreń Medeýova basqaratyn «Haziret» jastar qoǵamdyq qory 18-40 jastardaǵy múmkindigi shekteýli qyz-kelinshekterdiń óz isin ashyp, qolóner buıymdaryn jasap, kásipkerlikke bet burýyna muryndyq bolady eken. Osy kórmege de júnnen jasalǵan, toqylǵan biraz buıymdar ákelipti. Olardyń arasynda toqyma jeıdeler, qol sómke, aıaq kıim, jáne basqa turmystyq buıymdar bar. Kásipker kelinshek shala týǵan sábıge kıgizetin baıpaqtyń qasıetin túsindirgende tańǵalýǵa týra keldi. Bul baıpaqty kıgizgende jún balanyń tez damýyna oń áser etetin kórinedi.
Jalpy, mundaı áleýmettik jobalar jármeńkesin ótkizý, kórme uıymdastyrý múmkindigi shekteýli jandardyń ózderin qoǵamnyń tolyqqandy múshesi retinde sezinýine, olardyń kásipkerlikti ıgerýine, eńbekpen qamtylýyna negiz qalaıtynyn ómirdiń ózi kórsetip otyr.
Satybaldy SÁÝIRBAI,
«Egemen Qazaqstan».
Aqtóbe oblysy.