Elimizde bıyl Assambleıa jyly. Osy mereke aıasynda keń-baıtaq Qazaqstandy aralap, saparǵa shyqqan «Meniń Qazaqstanym» poıyzy elimizdegi ultaralyq tatýlyq pen beıbitshilik modeliniń saltanat qurǵanyn pash etetin mańyzdy sharalardyń uıytqysyna aınaldy. 1 sáýir kúni «Meniń Qazaqstanym» poıyzy Mańǵystaý oblysynyń Beıneý aýdanyna atbasyn tiregen edi.
Beıneý aýdany táýelsizdiktiń alǵashqy jyldary respýblıkamyzdaǵy eń artta qalǵan otyz aýdannyń biri bolatyn. Arada biraz ýaqyt ótkennen keıin, ıaǵnı búgingi kúni aýdannyń ekonomıkasy órkendep, donorlyq dárejege jetken. Turǵyndar sany 22 myńnan 62 500 adamǵa jetip, atalǵan merzim ishinde úsh esege deıin ósken. Aýdan ortalyǵy – Beıneý kentinde 46 myń adam turady.
Jýrnalıstermen bolǵan baspasóz máslıhatynda Beıneý aýdanynyń ákimi Basshy Ázirhanov áleýmettik jáne ekonomıkalyq jaǵdaı týraly bylaı dedi: «Aýdanymyzda, ásirese, sońǵy kezderi kishi kásipkerlik salasy jaqsy damyp otyr. Jańadan 1 919 ýaqytsha jáne turaqty jumys oryndary ashylyp, oǵan 1 466 adam ornalastyryldy, 392 adam aqyly qoǵamdyq jumysqa tartyldy, 151 adam áleýmettik jumys oryndaryna jiberildi, «Jastar praktıkasy» baǵdarlamasy aıasynda 187 jas maman ýaqytsha jumysqa qabyldanyp, onyń úshten biri turaqty jumysqa ornalasty. «Jumyspen qamtý-2020», «Bıznestiń jol kartasy-2020» baǵdarlamasy boıynsha 96 adam qaıta daıarlaý jáne biliktiligin arttyrý kýrstaryna, 47 jas maman jastar praktıkasyna jiberildi. 16 turǵyn 45,2 mln. teńge nesıe alyp, 18 jumys ornyn ashty. Densaýlyq saqtaý salasyna oblystyq bıýdjetten 1 mlrd. teńgeden astam qarjy bólindi, 35,8 mln. teńgeniń aqyly qyzmeti kórsetildi. Aýdanda 32 mamandyq boıynsha 90 dáriger men 383 arnaýly orta bilimdi maman jumys isteıdi. Aýdanymyzda óndiris, kásipkerlik, ınfraqurylymdy damytý jaqsy jolǵa qoıylǵan. О́tken jyly 600,8 myń tonna munaı men 339,5 mln. tekshe metr gaz óndirildi. Negizgi kapıtalǵa salynǵan ınvestısııa 54,7 mlrd. teńgege, ónerkásip óniminiń kólemi 70,8 mlrd. teńgege jetti».
Beıneý aýdanynyń tizginin 25 jyldan beri ustap kele jatqan, eldiń sonaý qıyn-qystaý kezdegi jaǵdaıyn búgingi kúni joǵary dárejege jetkizgen Basshy Aıjanaquly budan basqa da aýdanǵa qatysty biraz derekterdi jýrnalısterdiń aldyna jaıyp saldy. Máselen, strategııalyq asa iri jobalardyń biri sanalatyn «Beıneý – Bozoı» magıstraldy gaz qubyrynyń qurylysy bastaldy. Sondaı-aq, ústimizdegi jyly «QazAzot» JShS «Shaǵyrly-Shómishti» ken ornyn ıgerý jumystary bastalady eken. Aýdandaǵy astyq termınaly 14,3 myń tonna unmen, 12,9 myń tonna jemmen qamtylǵan.
Aýdanda mal sharýashylyǵynda ósip-órkendeý sıpaty baıqalady. Qazir jeke adamdardyń qolynda 3 927 bas sıyr, 92 418 bas qoı men eshki, 8 582 bas jylqy, 13 356 bas túıe bar. 202 sharýa qojalyǵy bıýdjetke 3,2 mln. teńgeniń salyǵyn tólegen.
Kásipkerlik nysandarynyń sany burynǵy jylǵa qaraǵanda 10 paıyzǵa ósken, turǵyndardyń 26 paıyzy osy salada jumys isteıdi. Olar 1,5 mlrd. teńge salyq tólep, aýdandyq bıýdjettiń menshikti kirisiniń 57 paıyzyn qurady. «Bıznestiń jol kartasy-2020» baǵdarlamasy boıynsha eki kásipker 30,8 mln. teńgeniń nesıesin alsa, mıkrokredıttik uıymdar arqyly 39 turǵyn 140,5 mln. teńgeniń nesıesin alyp, 65 jumys ornyn ashty. Beıneýde ashylǵan «Damý» qorynyń Kásipkerlerge qyzmet kórsetý ortalyǵy 100 adamǵa arnaıy sertıfıkat berdi.
Aqjigit, Tájen, Syńǵyrlaý aýyldaryn sýlandyrý jumystary tolyq aıaqtaldy. Respýblıkalyq bıýdjet qarjysyna aýylishilik sý qubyryn tartý jáne sý tazartý qondyrǵysyn ornatý jumystary bastaldy. Jyl ishinde 64 myń sharshy metr bolatyn 494 jekemenshik turǵyn úı salyndy. «Qoljetimdi turǵyn úı-2020» baǵdarlamasyna saı Beıneýde 4 páterli 6 kommýnaldyq turǵyn úı paıdalanýǵa berildi.
«Meniń Qazaqstanym» poıyzynyń Beıneý kentindegi jumysy nátıjeli boldy. Ádilet mınıstrligi mamandarynyń qabyldaýynda 15 adam bolyp, ózderine tıisti suraqtaryna jaýap aldy. Aýyl sharýashylyǵy, «Damý» qory, Ulttyq palata máselelerine qatysty 31 adam óz suraqtarymen qabyldaýǵa keldi. Halyqqa qyzmet kórsetý ortalyǵy boıynsha 15 adam, áleýmettik máseleler boıynsha 10 adam mamandardyń qabyldaýynda boldy. «Meniń Qazaqstanym» poıyzy dárigerlerine 361 adam qaralyp, dárigerlik keńes berilip, em qabyldady.
Beıneý kentiniń ortalyǵyndaǵy stadıonda astanalyq jáne almatylyq óner qaıratkerleriniń konsertine 10 myńnan asa adam qatysyp, rýhanı lázzat aldy.
Sharafaddın ÁMIROV,
«Egemen Qazaqstan».
Mańǵystaý oblysy,
Beıneý aýdany.