QOSTANAI. 28 tamyz. Qostanaıda shekaralyq oblystar jastarynyń «Dostyqta joq shekara» atty forýmy ótti. Oǵan Aqtóbe jáne Reseıdiń Chelıabi oblysynyń jastary qatysty. Bul týraly egemen.kz tilshisi habarlady.
Forýmdy Qazaqstan halqy oblystyq assambleıasy men Qostanaı oblysynyń «GrIn» azamattyq alıansy uıymdastyrdy. Qostanaıda alǵash ótip otyrǵan forým Qostanaı, Aqtóbe jáne Chelıabi oblystary jastarynyń birlesken jumysy úshin pikirlesý alańyna aınaldy, jas lıderler men túrli aımaqtaǵy belsendi jastaryna dostyq kópirindeı boldy. Forýmǵa qatysqan elý jas úsh kún boıy «Aq úı» demalys bazasynda nátıjeli jumys istedi. Olar úshin túrli trenıngter, pikirtalastar ótkizildi. Sonymen qatar jastar kóńil kóterý baǵdarlamasy da umytylǵan joq.
Qazaqstan halqy obblystyq assambleıasynyń sekretarıat meńgerýshisi Gúlvıra Qudaıqulova: «Forýmnyń aty aıtyp turǵandaı, dostyq úshin shekara bolmaýy bizdiń basqosýymyzdyń maqsaty bolýy tıis. Kórshi oblystar jastary únemi aralasyp, jas urpaqty patrıotızmge, adamgershilikke, rýhanı jáne mádenı qundylyqtarǵa tárbıeleýge baǵyttalǵan ıdeıalarymyzben bólisýimiz kerek» dedi. Chelıabi oblystyq Dostyq úıiniń dırektory Iýlııa Lapıdýs «Dostyqta joq shekara» forýmy jyl saıyn ótip tursyn degen usynysyn aıtty.
Forým qararynda da kórshi oblystar jastarynyń bul sharasy jyl saıyn ótetini jáne onyń geografııasy da keńeıe túsetini aıtyldy.
Názıra Járimbetova.
Derek, sýret: egemen.kz