PETROPAVL. 22 mamyr. Oblys ortalyǵynda «Balabaqsha-mektep-kolledj-joǵarǵy oqý orny» júıesinde qazaq tilin úzdiksiz deńgeılep oqytýdyń jańa modeli» atty respýblıkalyq ǵylymı-tájirıbelik konferensııa eki kúnge jalǵasyp, elimizdiń ár túkpirinen 500-den astam qazaq tili men ádebıeti páni muǵalimderi jınaldy. Bul týraly oblystyq bilim basqarmasynyń mamandary habarlady.
Alqaly basqosý M.Qozybaev atyndaǵy Soltústik Qazaqstan memlekettik ýnıversıtetinde saltanatty jaǵdaıda ashylyp, oblys ákiminiń orynbasary Anarhan Dúısenova qatysýshylardy quttyqtady.
Bilim jáne ǵylym mınıstrligi mektepke deıingi jáne orta bilim, aqparattyq tehnologııalar departamentiniń bas sarapshysy Roza Battal óz sózinde qazaq tili men ádebıetin oqytýdyń sapasyn arttyrýdyń mańyzdy máselelerin ortaǵa sala kelip, respýblıkalyq ǵylymı-tájirıbelik konferensııasynyń basty maqsaty oqytýshylardy bilim berýdegi jańalyqtarmen tanystyrýdy, qazaq tilin úzdiksiz oqytý standartynyń biregeı júıesin qalyptastyrýdy ditteıtinin jetkizdi.
Abaı atyndaǵy Ulttyq pedagogıkalyq ýnıversıtetiniń professory, pedagogıka ǵylymdarynyń doktory Faýzııa Orazbaevanyń, L. Gýmılev atyndaǵy Eýrazııalyq Ulttyq ýnıversıteti qazaq ádebıeti kafedrasynyń professory Saǵymbaı Jumaǵulovtyń, SQMÝ janyndaǵy Tilder ınstıtýtynyń dırektory Janar Talaspaevanyń, Almaty qalasyndaǵy A. Rozıbaqıev atyndaǵy mektep-gımnazııanyń qazaq tili men ádebıeti pániniń muǵalimi Gúlnár Másimovanyń, Qaraǵandy qalasy bilim bóliminiń qazaq tili men ádebıeti pániniń ádiskeri Gúlzat Aımaǵanbetovanyń, Batys Qazaqstan oblysy Aqjaıyq aýdany Q. Baısyqov atyndaǵy mekteptiń orys synyptaryndaǵy qazaq tili men ádebıeti pániniń muǵalimi Baǵdagúl Izbasarovanyń, taǵy basqalarynyń baıandamalary tyńdalyp, trenıngter, seksııalyq májilister, sheberlik synyptary, koýchıngter ótti.
Búginde Qazaqstanda qazaq balalarynyń 87 paıyzy ana tilinde, ózge ulttardyń 36 myńdaı balalary memlekettik tilde bilim alady.
О́mir Esqalı.
Derek: Soltústik Qazaqstan oblystyq bilim basqarmasy.
Sýret: egemen.kz