Qytaıdyń Henan provınsııasynda ózen sýynyń mólsherden tys artyp ketýinen kópir shaıylyp, 37 adam qaza tapqan. Sonymen qatar 19 adam iz-túzsiz joǵalǵandar sanatynda.
Jaýyn-shashynnyń toqtaýsyz jaýýynan arnasynan tasyǵan ózen Lýanchýn aýdanyndaǵy kópirdi julyp ketken. Uzyndyǵy 153 metr bolatyn kópirdiń ústinde ondaǵan adam bolǵan, olardyń 6-ýy qutqaryldy. Úsh kún boıy jaýǵan jaýyn saldarynan 52 adam kóz jumǵan.
* * *
Rýmynııada oryn alǵan ızraıldik tikushaq apatynan birde-bir adam tiri qalmady. Onyń bortynda jeti ızraıldik jáne bir rýmyndyq áskerı bolǵan. Oqıǵa rýmyn-ızraıl oqý-jattyǵýyn ótkizý kezinde oryn aldy.
Tikushaq manevr jasaý kezinde qyratqa soǵylyp, artynan órtke oranǵan. Derek kózine qaraǵanda, ushý máshınesi tolyq búlinip, onyń synyqtary jan-jaqqa shashylǵan. Mundaı jaǵdaıda tiri qalý da múmkin emes.
* * *
Iranǵa bir jaqty nemese ujymdyq sanksııalyq sharalarmen yqpal etý tájirıbesi qabyldanbaıdy. Bul jóninde Reseı SIM ókili Iranǵa qatysty qosymsha sanksııa qabyldanýyna oraı málimdedi.
Jańa sanksııa Irannyń ekonomıkalyq qarym-qatynastaryna qarsy baǵyttalyp, munaı-gaz salasyna ınvestısııa salýǵa tyıym salady. EO keńesiniń mundaı sanksııasyn SIM ókili Nesterenko BUU QK sanksııalyq rejiminiń sheńberinen shyǵyp otyrǵandyǵymen túsindirdi.
* * *
Brıtanııalyq VR kompanııasynyń jetekshisi Tonı Heıvord qyzmetinen ketip, onyń ornyna Robert Dadlı keletin boldy. Atalǵan kompanııa Meksıka shyǵanaǵyndaǵy apattan 17 mıllıard dollar joǵaltypty.
Sky News aqparattyq telearnasy habarlaǵandaı, Greenpeace belsendileri keshe Londonda VR-diń barlyq maı quıý stansalarynyń jumysyn toqtatyp tastaǵan. Kompanııaǵa tıesili 50 maı quıý stansasynda kezekshilikte bolǵan belsendiler “Jabyq. Benzın bitip qaldy” degen jazýy bar plakattar ilipti.
* * *
Arab otbasynan shyqqan 8 synyp oqýshysy Shvesııada jergilikti mektepterdiń birine jazǵan ótinishinde oqýshylar qataryna qabyldaýdy surapty. Alaıda, onyń bul ótinishi bos oryn joq degen syltaýmen qabyl alynbaǵan.
Artynsha álgi oqýshynyń ápkesi mektep hatshylyǵyna habarlasyp, “Annelı” degen jamylǵy shvedtik esimmen “Iohana” degen balasynyń mektepke barǵysy keletinin aıtypty. Arǵy jaqtaǵylar bul ótinishterin qýana qabyl alǵan. Endi arab otbasy kemsitýshilik jónindegi ombýdsmenge telefon jazbalaryn usyna otyryp aryzdanýda.
* * *
“Kez kelgen problema týyndaǵan jaǵdaıda Kýba Venesýela jaǵynda bolady”.
Santa Marııa aralynda Kýba-Venesýela kezdesýiniń jabylýynda sóılegen sózinde Kýba mınıstrler keńesiniń tóraǵasy jáne memkeńes basshysy Raýl Kastro osylaı dedi.
Internet materıaldary negizinde ázirlendi.