Aspanǵa nur shashqan áýender

Nurǵısa Tilendıev atyndaǵy «О́z elim» atty IV festıval-baıqaýynda «Astana Opera» memlekettik opera jáne balet teatrynyń solısteri jeńiske jetti. Atap aıtsaq, «Astana Opera» teatrynyń jetekshi solısi Meıir Báıneshov «Klassıkalyq vokal» atalymy boıynsha Bas júldeni ıelense, áıelder daýsy arasynda Aızada Qaponova gran-prıdi qanjyǵasyna baılady. Al, Ásem Sembına baıqaýdyń birinshi júldesine qol jetkizdi. Eske sala keteıik, óner baıqaýy 30-31 naýryzda QazUО́Ý organ zalynda ótken bolatyn. Oǵan Qazaqstan men Reseıdiń barlyq aımaqtarynan kelgen 16 men 35 jas aralyǵyndaǵy mýzykanttar, kásibı vokalıster qatysty. Quramynda belgili mýzykant­tar, asa kórnekti mádenıet qaı­rat­kerleri Nurǵalı Núsipja­nov, Altynbek Qorazbaev, Baǵ­dat Sámedınova, Azamat Jyl­tyrkózov, Ulan Kenjebekov, Bıbigúl Januzaq bar qazylar alqasyn KSRO halyq ártisi, Sosıalıstik Eńbek Eri Bıbigúl Tólegenova basqarýynyń ózi bul sharanyń bıik deńgeıde ótkenin aıǵaqtaı tússe kerek. Al, baıqaý baǵdarlamasynda negizinen KSRO halyq ártisi, Halyq Qaharmany Nurǵısa Tilendıevtiń týyndylary keńinen qamtyldy. Meıir Báıneshov baıqaýdyń birinshi kezeńinde tenorlarǵa tán «Abaı armany» ánin, «О́z elim» jáne «Qustar ánin» shyrqady. Ekinshi aınalymda ánshi «Alataý» (baǵdarlama boıynsha tenorlar mindetti túrde oryndaıtyn án), «Ájeme» ánderin halyqaralyq jarystardyń jeńimpazy, «As­tana Opera» teatrynyń mýzy­kalyq keńesshisi Raýshan Beskem­pirovanyń súıemeldeýimen oryndady. – Buǵan deıingi qanshama jeńisterime qaramastan qatty qobaljyǵanym ras. Maǵan barlyq jaqyn dostarym qoldaý kórsetti, sol úshin olarǵa úlken alǵys bildirgim keledi. Bıyl erler daýsy arasyndaǵy báseke óte tartys­ty ótti. Ásirese, stýdentter men aımaqtardan qatysýshylardyń daýystary keremet eken, – deıdi M.Báıneshov bizben áńgimesinde. Lırıkaly-koloratýralyq soprano Aızada Qaponova, Nurǵısa Tilendıev shyǵarmalarynyń oryn­dalýy óte kúrdeli bolyp keletinin aıtady. Alaıda solıst baǵdarlamadaǵy sopranolarǵa mindettelgen «Aq shaǵala» jáne «Kel, erkem, Alataýyma» jáne «Baıanaýyl valsi», «Qarlyǵashtar týraly án», «Jan-jarym» týyndylaryn oıdaǵydaı shyrqap berdi. – Men Nurǵısa Tilendıevtiń shyǵarmashylyǵyna tabyný­shylardyń birimin, onyń ánderin óte jaqsy kóremin, qaıda júrsem de bul ánderdi janymdy salyp shyrqaımyn. Búgin jeńiske qol jetkize almaǵandar moıymaýlary kerek, – dep A.Qaponova áriptesteriniń iri báıgelerden top jara berýine tilektestik bildirdi. «О́z elim» festıvaliniń laýreattary men qazylar alqasy músheleriniń qatysýymen ótken Kongress-holdaǵy jeńim­paz­dardy marapattaý rásimi gala-konsertke ulasty. Klassıkalyq vokal (erler jáne áıelder), dombyra jáne dırıjerlar saıysynyń «dırıjer» nomınasııasy boıynsha gran-prı Berik Batyrhanulyna (Almaty), I oryn Álisher Qasqyrbaıǵa (Astana), II oryn Abylaı Tilepbergenge (Almaty) tıse, Qýanysh Ismaılov (Almaty) pen Ádilet Azbaev (Astana) III oryndy ıelendi. «Klassıkalyq vokal» atalymy boıynsha I oryn – Rasýl Jarmaǵambetov (Almaty), II oryn – Azat Málik (Astana), III oryn – Artýr Gabdıev (Almaty) pen Altynbek Ábilda (Astana) enshisine buıyrdy. «Klassıkalyq vokal» atalymy boıynsha áıelder arasyndaǵy saıysta Aızada Qaponova (Astana) bas júldeni enshilese, Ásem Sembına (Astana) I oryndy, Bıbigúl Tynyshtyq (Qyzylorda) II oryndy ıelendi. Al, Aqbota Serikbolova (Almaty) men Mádına Aıdarbekova (Qyzylorda) III oryndy bólisti. Sonymen qatar, úzdik konsert­meısterler Alııar О́tetileý (Al­maty) men Láılá Seıitova dıp­lommen marapattaldy. «Dombyra» atalymy boıynsha gran-prı ıesi – Toǵjan Úmbet,           I oryndy Baýyrjan Joldybekov ıelendi. Astana ákiminiń kýbogy «Dom­byra» nomınasııasy boıynsha Toǵjan Úmbetke tabystaldy. Saltanat ÁSKERBEKQYZY. ASTANA.