Aqtaýda qonys toıy toılanýda

Basqa óńirlerdegideı budan birneshe jyldar buryn Aqtaý qalasynda da turǵyn úı máselesi óte kúrdeli bolatyn. Salynyp jatqan úıler joq, salyna bastaǵanynyń qurylysy ańqa-sańqa bop aıaqtalmaı qalǵan, al... qalaǵa qonys aýdaryp, jumys isteý úshin kelgender sany kúrt ósip, eki aralyqta úısizderdiń sany birneshe esege sharyqtap shyǵa keldi. Bul máselege memleket nazar aýdaryp, arnaıy baǵdarlamalar qabyldanýy nátıjesinde biraz oń ózgerister qalyptasty. Jurttyń bári úıli boldy demeımiz, áıtse de qazir Aqtaýda salynyp jatqan turǵyn úıler kóp, úıli bolǵandar da, kezegin kútip kún sanap júrgender de kóp. Biz birneshe otbasynyń «úı alamyz» degen tátti úmitiniń oryndalǵan sátine kýá bolǵan edik. Jekelegen úıler emes, qa­tar­ǵa tutas shaǵyn aýdandardy qosyp, qurylys kólemin úl­keıtken Aqtaýdaǵy jańa 32 «A»-shaǵyn aýdanynan 400 otbasylyq 8 turǵyn úıdiń kilti tabystaldy. «Qoljetimdi baspana-2020» baǵdarlamasy aıasynda irge kó­tergen bul úıge qonystaný baqy­tyna ıe bolǵandar, negizinen «Turǵyn úı qurylys jınaq banki» AQ salymshylary. Arasynda jas otbasylar da, barlyq sanattaǵy turǵyndar da tabylatyn olar aqaýy barlyǵymen atyshýly bolǵan Aqtaýdaǵy «Aqqý» shaǵyn aýdanynan úı alýǵa úmitti bolǵandar eken, biraq «Turǵyn úı qurylys jınaq banki» AQ birinshi kezektegi 260-tan astam óz salymshylarynyń salyn sýǵa ketirmeı, jańa sha­ǵyn aýdanda Aqtaý qalalyq ákim­digimen, Mańǵystaý oblystyq qurylys basqarmasymen birge respýblıkalyq bıýdjetten bólin­gen 2 mlrd. 100 myń teńge qarjyǵa salynǵan úıdi úlestirdi. Jaılylyq sıpaty jaǵynan úshinshi sanatty bolyp keletin bir jáne eki bólmeli úılerdiń ishi áp-sátte máre-sáre qýanyshqa toldy. – «Nurly Jol» baǵdarlamasyn oryndaý maqsatynda áleýmettik ınfra­qurylym, turǵyn úı ınfra­qurylymyn nyǵaıtý, baspana máselesi jáne onyń qatardaǵy azamattarymyzǵa, ásirese jasta­r­­­ymyzǵa qoljetimdiligin qa­m­ta­masyz etý boıynsha obly­symyzda da tıisti sharalar qolǵa alyndy. Jańa shaǵyn aýdandardy ıgerý jumystaryn odan ári jalǵastyryp, bıyldyń ózinde jas otbasylarǵa arnalǵan 60 páterlik 2 úı, «Turǵyn úı qurylys jınaq banki» AQ arqyly barlyq sanattaǵy adamdar úshin 32 «A»-shaǵyn aýdannan 120 páterlik 1 úı, «Aqqý» shaǵyn aýdanynan 2-shi kezeńde barlyǵy 747 páterdi tapsyrý jáne jergilikti atqarýshy organ kezegindegiler úshin 120 páterlik 3 úıdiń qurylysyn aıaqtaý josparlanyp otyr. Odan bólek memlekettik baǵdarlama aıasynda «Aqqý» shaǵyn aýdanynyń 3-shi kezeńinde turǵyn úı qurylystaryn salý jáne 34-shaǵyn aýdannan 60 páterlik 6 úıdiń qurylys jumystaryn bastaý da josparymyzda tur, – degen Mańǵystaý oblysynyń ákimi Alık Aıdarbaev jas otbasylarǵa páter kiltterin tabystady. Baspana kiltin alýshylardy «Turǵyn úı qurylys jınaq banki» AQ basqarma basshysynyń orynbasary Erbol Qarashókeev quttyqtap, «Búgin sizder men bizder turǵyn úı naryǵyndaǵy jaǵdaıdy jáne qatardaǵy Qazaq­stan azamattarynyń turǵyn úı jaǵdaılaryn jaqsartýǵa ba­ǵyttalǵan «Qoljetimdi baspana-2020» baǵdarlamasynyń aıasynda Aqtaý qalasynda salynǵan 400 páterli turǵyn úıdiń óz ıelerine tabystalý sátine kýá bolyp otyrmyz. «Turǵyn úı qurylys jınaq banki» AQ úshin óz salymshylarynyń armanyna qol jetkizip, qýanǵan sátin kórý – úlken qýanysh. «Qoljetimdi turǵyn úı-2020» baǵdarlamasy jas otbasylarǵa jáne ár sanattaǵy adamdarǵa arnalǵan eki baǵyttan turady desek, bul úı ekinshi, ıaǵnı ár sanattaǵy adamdarǵa arnalǵan. «Nurly Jol» baǵdarlamasyn júzege asyrý jolynda aldaǵy ýaqytta da biz halyqpen, óz salymshylarymyzben birge, jergilikti ákimdikpen qoıan-qoltyq jumys istep, úlken tabystarǵa jetemiz dep oılaımyn. О́ıtkeni, bıyl Qazaqstan boıynsha bizdiń nesıe kólemimiz 60 paıyzǵa artty, salymshylar kólemi 40-50 paıyzǵa ósti. Sondaı-aq, bıyl Ulttyq qor arqyly bizge beriletin qarjy kólemi artty. Atalmysh baǵdarlamanyń ekinshi baǵyty boıynsha qarjylandyrý tórt esege kóbeıdi. Demek, jyl sońyna deıin «Qoljetimdi turǵyn úı-2020» baǵdarlamasy aıasynda tapsyrylatyn úıler sany kóbeıedi dep kútemiz jáne turǵyndardy armanǵa birge jetý úshin óz bankimizge senimdi salymshy bolýǵa shaqyramyz», dedi. «Turǵyn úı qurylys jınaq banki» AQ arqyly ótken jyly Aqtaýda 300 páterli 2 úı jas otbasylarǵa tapsyryldy. Bıyl jazda taǵy jas otbasylar úshin 120 páterlik 2 úı, jyl sońyna deıin ár sanattaǵy adamdar úshin 790 páter tapsyrý josparlanýda. Atalmysh banktiń iske bilek sybana kirisip, úısizderdiń armanyn oryndaýǵa belsene atsalysýy turǵyndardyń senimi men úmitin kúsheıte túsken.  О́ıtkeni Mańǵystaý oblysy boıynsha salymshylar kólemi 30-40 paıyzǵa ósken. Úıli bolǵan jas otbasylar atynan sóz alǵan Erbolat Bısen naryq zamanynda úıge qol jetkizý ońaı emestigin aıtyp, qolushyn sozǵan «Turǵyn úı qurylys jınaq banki» AQ-qa rızashylyǵyn bildirdi. Bilýimizshe, Aqtaýda jospar­lanǵan jáne qurylysy bastalǵan turǵyn úıler qarasy az emes. Alda talaı otbasyny úlken jańalyq kútip turǵany qýantady. Gúlaıym ShYNTEMIRQYZY, «Egemen Qazaqstan». AQTAÝ.