«Taıqazan» estafetasy – aqtóbelikterde

Oral qalasyndaǵy Saltanat saraıynda «Qazaqstan halqy Assambleıasy – 20 izgi is» respýblıkalyq «Taıqazan» estafetasyn Aqtóbe oblysyna saltanatty túrde tabystaý rásimi bolyp ótti. Sharaǵa Batys Qazaqstan oblysy QHA ókilderi men etnomádenı birlestikter, Dos­tyq klýbynyń músheleri, orta jáne joǵary oqý oryndarynyń stý­dent­teri qatysty. Túrkistan qalasynan bastaý alǵan respýblıkalyq estafeta jýyrda Atyraý oblysynan Aqjaıyq óńirine kelip jetken edi. – Bereke men toqshylyqtyń sımvolyna aınalǵan qasıetti Taıqazan elimizdegi kóptegen oblys ortalyqtaryn aralap ótip, bizdiń óńirimizge de kelip jetti. Búgingi sharanyń basty maqsaty – el ishinde atqarylyp jatqan jaqsy isterdiń tizimin Taıqazanǵa salyp, ony Aqtóbe oblysyna tabystaý. Elimizdegi barlyq oblys­tardy aralap, sáýirdiń 22-si kúni Astana qalasyna jetkiziletin izgi isterge toly Taıqazan QHA-nyń kezekti sessııasynda Assambleıa Tóraǵasy Nursultan Nazarbaevqa tabystalmaq, – dedi saltanatty sharada quttyqtaý sóz alǵan Batys Qazaqstan oblysy QHA tór­aǵasynyń orynbasary, hatshylyq meńgerýshisi Ǵaısa Qapaqov. – Qurmetti batysqa­zaq­stan­dyqtar, Qazaqstan halqy As­sam­bleıasynyń 20 jyldyǵyna baı­lanysty búgingi aksııaǵa biz­diń oblystaǵy 19 etnomádenı bir­les­tiktiń de qosar úlesi mol bol­maq. Olardyń árqaısysy bú­ginde túrli izgilikti istermen aınalysýda. Biz de óz kezegimizde qazaq úshin birliktiń tiregi, halyq toqshylyǵynyń belgisi bolǵan kıeli Taıqazandy Qostanaı oblysyna attandyrmaqpyz. Tatýlyq pen kelisim saltanat qurǵan Qa­zaq eliniń izgilikti isteri molaıa bersin, – dedi «Qazaqstan hal­qy Assambleıasy – 20 izgi is» res­pýb­lıkalyq «Taıqazan» estafetasyn saltanatty túrde qabyldap alǵan Aqtóbe oblysy Qazaqstan halqy Assambleıasynyń hatshylyq meńgerýshisi Joldas Nurshın. Saltanatty jıynda «Qa­zaq­stan halqy Assambleıasy – 20 izgi is» aıasynda Assambleıanyń jekelegen ókilderinen qural­ǵan, «QAZIITÝ» ǵylymı-bi­lim keshe­niniń prezıdenti, oblys­tyq más­lıhattyń depýtaty Aq­serik Áı­timov tóraǵalyq etetin «Meıirim shýaǵy» eriktiler qozǵa­lysynyń tusaýkeser rásimi jasaldy. Shara barysynda oblystyq estý jáne sóıleý qabileti buzylǵan balalarǵa arnalǵan mektep-ınternat kesheniniń, sondaı-aq, «Iаık» folklorly etnografııalyq jáne Jastar shyǵarmashylyǵy ortalyqtarynyń, «Aqjaıyq» bı ansambliniń óner­pazdary jurtshylyqqa merekelik kóńil-kúı syılady. Nurtas SAFÝLLIN, jýrnalıst, Temir QUSAIYN, «Egemen Qazaqstan». ORAL. Sýretti túsirgen Temirbolat TOQMAMBETOV.