Keshe Ortalyq kommýnıkasııalar qyzmetinde «KEGOC» AQ basqarma tóraǵasy Baqytjan Qajıev baspasóz máslıhatyn ótkizdi. Ol «Nurly Jol» Jańa Ekonomıkalyq Saıasaty sheńberinde elektr energııasy salasyndaǵy ınfraqurylymdyq jobalardy júzege asyrý isi jóninde áńgimeledi.
«Nurly Jol» baǵdarlamalyq qujatynda Memleket basshysy energetıkter úshin «Ekibastuz-Semeı-О́skemen» jáne «Semeı-Aqtoǵaı-Taldyqorǵan-Alma» baǵyttarynda joǵary voltty jeliler salý mindetin belgilegeni málim. Osyny aıtqan basqarma tóraǵasy bul tapsyrma tikeleı «KEGOC» AQ-tyń qyzmet aıasyna jatatynyn jetkizdi. «Atalǵan eki jeli 2014 jyly iske asyryla bastaǵan «Soltústik-Shyǵys-Ońtústik» tranzıtiniń 500 kV-tyq ÁJ salý» aýqymdy jobasynyń quramdas bólikteri bolyp tabylady. Joba boıynsha jalpy uzyndyǵy 1700 shaqyrymnan asatyn joǵary voltty 500 jáne 220 kV elektr jetkizý jelileri men qýaty 500 kV «Semeı», «Aqtoǵaı» jáne «Taldyqorǵan» úsh jańa qosalqy stansalarynyń qurylysy qamtylady. Sonymen qatar, jumys istep turǵan 1150 kV «Ekibastuz», 500 kV «Alma», 500 kV «О́skemen» jáne 220 kV «Shúlbi GES» ATQ qosalqy stansalaryn keńeıtý josparlanyp otyr», dedi B.Qajıev.
Onyń sózine qaraǵanda, bul jaǵdaıda 500 kV «Ekibastuz-Shúlbi-GES-О́skemen» jelilerin paıdalanýǵa berý Soltústik-Shyǵys qımasynda elektr jelileriniń ótkizý qabiletin arttyrady. Sóıtip, Shyǵys Qazaqstan oblysynyń Reseı BEJ jelileri arqyly ótetin elektr energııasyn tasymaldaý shemasyna táýeldiligine qaramastan, osy óńirdiń energııa tapshylyǵyn óteıdi. Oǵan qosa, kontrretteýish – Bulaq GES-ti iske qosqan kezde Shúlbi GES-inen tolyq qýat berýdi qamtamasyz etedi eken.
«Qazirgi ýaqytta 429 metall tirek ornatyldy, 130 km. sym jınaqtaldy. 500 kV «Semeı» qosalqy stansasynyń qurylysy bastaldy, onda kommýtasııalyq jabdyq montajdalyp, qosalqy ǵımarattar salynýda. Osy jyly taǵy da 200 km. jeli tartylyp, «Semeı», «О́skemen» jáne «Ekibastuz» qosalqy stansalarynda jabdyqtardy montajdaý josparlanyp otyr. Tutastaı alǵanda, jalpy quny 120 mlrd. teńgeni quraıtyn «500 kV Soltústik-Shyǵys-Ońtústik» ÁJ-ni salý» jobasy 2018 jyly aıaqtalady. Qurylys kezinde 1800-den astam jańa jumys orny ashylady, al aıaqtalǵannan keıin atalǵan jelide 97 adam jumys isteıtin bolady. Jobany júzege asyrý memleket suranysyna sáıkes KEGOC-tyń Qazaqstan BEJ-diń senimdi jumysy men tıimdi damýyn qamtamasyz etý jónindegi uzaq merzimdi damý strategııasyn iske asyrý jónindegi júıeli jumystardyń jalǵasy bolyp tabylady», dedi basqarma tóraǵasy.
Nurbaı ELMURATOV,
«Egemen Qazaqstan».