BAIQOŃYR. 1 qyrkúıek. Erteń tańerteń Astana ýaqyty boıynsha saǵat 10:37-de «Soıýz TMA-18M» zymyrany Halyqaralyq ǵarysh keshenine ushady. Búgin ǵaryshker Sergeı Volkov, Aıdyn Aıymbetov, Andreas Mogensen jýrnalısterge arnaıy baspasóz máslıhatyn ótkizdi. Bul týraly egemen.kz tilshisi habarlady.
Ǵaryshkerler kóńil-kúıleriniń óte jaqsy, ǵaryshqa sapar shegýge daıyn ekenderin málim etti. Tyńǵylyqty tekserýden keıin memlekettik komıssııa negizgi topty, ıaǵnı reseılik Sergeı Volkovty, qazaqstandyq Aıdyn Aıymbetovti, danııalyq Andreas Mogensendi «Soıýz TMA-18M» zymyranymen Halyqaralyq ǵarysh keshenine ushýǵa tirkegen.
«Komanda túgel daıyn. Saparymyz sátti bolady degen oıdamyn. Halyqaralyq ǵarysh keshenindegi jumys ýaqytymyz ben ornalasatyn oryndarymyzǵa deıin naqty belgilenip qoıǵan. Aldaǵy azdaǵan demalystan soń ǵarysh saparyna daıyndalatyn bolamyz»,– dedi komandır Sergeı Volkov.
Qazaqstandyq ǵaryshker Aıdyn Aıymbetov bala kúngi armany men Elbasyna bergen ýádesiniń oryndalatynyna bek zor qýanyshty.
«2009 jyly ǵaryshqa ushamyz dep josparlaǵan kezde biz Elbasy Nursultan Nazarbaevpen tikeleı baılanysqa shyqtyq. Sol ýaqytta men Memleket basshysyna «Halyqaralyq ǵarysh kesheninde Qazaqstannyń kók baıraǵy jelbireıtin kún jaqyn» dep ýáde berip edim. Osy saparymda men Elbasyna bergen ýádemdi oryndaımyn», – dedi Aıdyn Aıymbetov.
Ǵaryshkerlerdi shyǵaryp salýǵa olardyń jaqyndary men otbasy músheleri keldi. Al tús qaıta vıse-premer Berdibek Saparbaev Aıdyn Aıymbetovke aq jol tilep, tý tapsyrady dep josparlanýda.
Erjan Baıtiles.
Derek: egemen.kz.
Sýret: «QazAqparat».