...ELDI MEKEN ATAÝLARY
Myń ólip, myń tirilgen halqymyzdyń tili men dinin, dástúrin saqtaýdaǵy eren isteri atap aıtýǵa turarlyq. Til – halqymyzdyń tarıhy, órkenıet pen mádenıetimizdiń máıegi. Sondyqtan da óńirdegi bir kezderi sebepsiz tarıhı ataýlarynan aıyrylǵan selolyq okrýg aımaǵyndaǵy eldi mekender jańa ataýlarǵa ıe bolyp, jurtshylyqtyń mereıin ósirdi.
“Qazaqstan Respýblıkasynyń ákimshilik-aýmaqtyq qurylymy týraly” Zańyna sáıkes oblys ákimdiginiń qaýlysy men oblystyq máslıhattyń sheshimi boıynsha Aqsý aýdanyndaǵy Qyzyl tý aýylynyń ataýy Barlybek Syrttanov, Alakól aýdanynyń Gerasımovka aýyldyq okrýgi Sapaq selolyq okrýgi, Eńbekshiqazaq aýdanyndaǵy Krasnyı Vostok aýylynyń ataýy О́rikti, osy aýdannyń Oktıabr selolyq okrýginiń ataýy Bartoǵaı, Kóktóbe selolyq okrýgine qarasty Sovet aýylynyń ataýy Qyzyljar aýyly bolyp ózgertildi.
Osylaısha ana tilimizdiń mártebesi men ulttyq rýhymyz asqaqtap, eldigimizdiń erteńine degen berik senim qalyptasqanyn kópshilik rızashylyqpen qabyldady.
Kúmisjan BAIJAN. Almaty oblysy.
...JAǴAJAI SALYNÝDA
Syrdarııa aýdanynyń ortalyǵy Tereńózek kenti jyl ótken saıyn kóriktenip, turǵyndardyń dem alýyna múmkindiginshe jaǵdaı jasalyp keledi. Sonyń aıqyn bir aıǵaǵy, kúni keshe taǵy bir demalys orny ǵımaratynyń irgetasy qalandy. Iаǵnı, ortalyq stadıon janyndaǵy alańqaıǵa jaǵajaı salý jumystary bastaý aldy.
Jalpy, kólemi 1,5 gektarǵa jýyq alqapty alatyn bul jaǵajaı kent turǵyndarynyń bos ýaqytynda dem alýyna barlyq jaǵdaı jasaıtyn oryn bolmaq. Munda sýda shomylý ǵana emes, kúnge qyzdyrynýǵa, serýendeýge, tamaqtanýǵa, túrli sporttyq oıyn sharalaryna qatysýǵa múmkindik jasalmaq. Jańa jaǵajaıdyń sýy Syrdarııa ózeniniń “Áıtek” kanaly arqyly jańartylyp turady.
Jaǵajaı qurylysyn “Dáneker” JShS-i qarqyndy da, sapaly júrgizýde.
Erkin ÁBIL. Qyzylorda oblysy, Syrdarııa aýdany.
...FÝTBOL ALAŃY PAIDALANÝǴA BERILDI
Salamatty ómir salty, dene shynyqtyrý, sportpen aınalysý, densaýlyqty shyńdaý aýyl men qalada jasóspirimder men jastar arasyndaǵy basty tárbıelik maqsatqa aınaldy. Bul jaıynda Elbasy Joldaýynda da naqty aıtyldy. Jýyrda Qashyr aýdanynyń ortalyǵy Tereńkól aýylynda mını-fýtbol oıynyna arnalǵan jasandy sporttyq alań ashyldy. Fýtboldan ótken álem chempıonaty tereńkóldik jastarǵa serpin berip, fýtbolǵa degen qyzyǵýshylyqtaryn arttyrǵan bolsa kerek.
Alań jaı alań emes, oǵan sıntetıkalyq jasyl gazon tóselgen, dop qýyp, erkin júgirýge laıyq. Aýyl jastary úshin bos ýaqyttarynda dene shynyqtyryp, fýtbol oınaýǵa jaqsy boldy. Komandalar arnaıy kıimdermen qamtamasyz etilgen. Aýdan jastary úshin jaqsy bir jańalyq bolǵan jańa sporttyq alańnyń ashylý saltanatyna arnap sporttyq sharalar uıymdastyryldy. Sol kúni, Tereńkól jáne Besjan aýyldarynyń fýtbol komandalary ózara kezdesip, alǵashqy oıyndaryn da ótkizdi.
Farıda BYQAI. PAVLODAR.