ASTANA. 24 mamyr. Qyzylorda oblysy Jańaqorǵan aýdany Qaqpa jaılaýynda birinshi oblystyq malshylar sleti ótti. Sharaǵa oblys ákimi Qyrymbek Kósherbaev pen Qazaqstan Respýblıkasy aýyl sharýashylyǵy vıse-mınıstri Saparhan Omarov qatysty. Bul týraly Qyzylorda oblysy ákimdiginiń baspasóz qyzmeti habarlady.
Talaı jyldan beri umyt bola bastaǵan bul slet syr óńirinde sońǵy ret 1996 jyly uıymdastyrylǵan bolatyn. Sondyqtan da, malshylar merekesine elimizdiń barlyq óńirinen ata kásipti tirshiliginiń ózegine aınaldyryp otyrǵan myńdaǵan sharýalar qatysty. Eki kúnge sozylǵan aýqymdy sharada sharýalar ózara tájirıbe almasty.
Aýyl sharýashylyǵy vıse-mınıstri Saparhan Omarov: «Malshylar sletin egemendik alǵaly alǵashqy bolyp Qyzylorda oblysy ótkizip otyr. Mundaı ıgi bastama elimizdegi mal sharýashylyǵyn órkendetýge úlken septigin tıgizetini sózsiz. Jalpy, atalǵan sharýashylyqty damytýǵa baǵyttalǵan birneshe memlekettik baǵdarlamalar bar. Onyń ıgiligin sharýalar kórip otyrǵandyǵyna kýámiz. Aıtyp ótý kerek, Qyzylorda oblysy qazir «Sybaǵa» baǵdarlamasyn tıimdi júzege asyryp otyrǵan aımaqtardyń kóshin bastap tur»,– dedi.
Al aımaq basshysy Qyrymbek Kósherbaev: «Elbasymyz Nursultan Nazarbaevtyń aýyl sharýashylyǵyna degen erekshe yqylasynyń arqasynda mal sharýashylyǵy búginde damýdyń jańa dańǵylyna shyǵyp keledi. Qyzylordada iri qara, jylqy jáne túıe basynyń sany eń berekeli 90-shy jylǵy deńgeıden asyp tústi. Qoıdyń sany jaqsy qarqynmen ósýde. Osyǵan sáıkes 100 tonna iri qara mal etin eksporttaý jóninde aýyl sharýashylyǵy mınıstrligimen memorandýmǵa qol qoıyldy», – dedi.
Aıta keteıik, slette aýyl sharýashylyǵynyń ár salasynda eńbek etip júrgen sharýalar marapattaldy. Sondaı-aq, merekege 50-ge jýyq kıiz úıler tigilip, ulttyq dástúr ulyqtalyp, umyt bolǵan salttar qaıta jańǵyrtyldy. Shara barysynda qyz qýý, aýdaryspaq, teńge ilý men qol kúresi jáne arqan tartý sııaqty ulttyq oıyndardan jarystar uıymdastyrylsa, palýandar boz kilemde kúsh synasyp, toıdyń kórkin keltirdi. Munan soń eńbekkerler merekesi konserttik baǵdarlamaǵa ulasty.
Talǵat Raıymbek.
Derek, sýret: Qyzylorda oblysy ákimdiginiń baspasóz qyzmeti.