Qandaı da bir tótenshe jaǵdaı oryn alǵanda qutqarýshylar qyzmetine júginerimiz anyq. Sala basshylyǵy men qyzmetkerleriniń synalatyn da, senim artylatyn da kezi sol sátte kórinedi. Desek te, Sábıt Bıtaev basqaratyn jetisýlyq qutqarýshylardyń eseli eńbegi atalǵan qyzmettiń qurylǵanyna 20 jyl tolýyna arnalǵan sharada anyq kórindi.
Sonymen, saltanatty jıynda Almaty oblysy ákiminiń orynbasary Ǵalymjan Ábdiraıymov baıandama jasap sala qyzmetkerlerin Ishki ister mınıstrligi Tótenshe jaǵdaılar komıtetiniń merekelik tósbelgisimen jáne Almaty oblysy ákiminiń Alǵys hatymen marapattady.
«Elbasynyń arnaýly Jarlyǵymen Qazaqstan Respýblıkasy Ishki ister mınıstrliginiń Tótenshe jaǵdaılar komıteti qurylǵany málim. Búgingi tańda Almaty oblysy tótenshe jaǵdaılar departamenti qyzmetkerleri tól mindetin minsiz atqarýda. Memlekettik saıasatqa saı jergilikti bıýdjetten bólingen qarajatqa jyl basynda 34 arnaıy jáne qosalqy baǵyttaǵy qutqarý tehnıkalary, 4 jol talǵamaıtyn, 7 qarda júretin, 31 júzý quraldary satylyp alynyp, taratyldy. Sondaı-aq, 2 modýldi qurylǵy sýdan qutqarý stansııalarynda ornatyldy. Qutqarýshylardy daıyndaý jáne jattyqtyrý úshin bir júksaýyt túrindegi jylý tútin kamerasy jáne 10 jınalmaly munara alyndy. О́rt sóndirý jáne avarııalyq-qutqarý jumystary qyzmetiniń bólimsheleri jyl saıyn 20 myńnan astam tótenshe jaǵdaılar ornyna barady. Sóıtip 1,5 myńnan astam adamdy qutqaryp qaýipsiz jerge shyǵardy. Sondaı-aq, sý aıdyndarynda qaýipsizdikti qamtamasyz etý úshin jedel-qutqarý jasaǵynda «TREKOL» bazasyndaǵy batpaqty jolda toqtamaıtyn kólik, júrdek qutqarý avtomobılderi, ushqyr júzý quraldary men shańǵy, qarly borannan qutqarýǵa arnalǵan avtokólikter bar. Al jasaq jaýyngerleri kez kelgen adamǵa onyń turǵan ornyna qaramastan, kómekke barýǵa daıyn tur. Jaqynda ǵana Alakóldiń jaǵalaýy men Qapshaǵaı sý qoımasynda zamanaýı tehnıkalyq jáne sanıtarlyq talaptarǵa saı kásiptik qyzmet úshin teńdesi joq eki modýldi sýda qutqarý stansııasy salyndy. Bul qutqarý júıesi jyl saıyn júzdegen adamdardy qutqarýǵa múmkindik beredi. «Salamatty Qazaqstan» memlekettik baǵdarlamasy aıasynda oblys aýmaǵyndaǵy kúrejoldarda medısınalyq-qutqarý beketteri ornatylyp, kezekshiler tótenshe jaǵdaılar kezinde 2 myńnan astam medısınalyq kómek kórsetti. Jyl saıyn ardagerlerdiń qajettiligine jaratý úshin departament qyzmetkerleri bir kúndik jalaqylaryn bóledi. Sol sııaqty Taldyqorǵan qalasynda ornalasqan «Aınalaıyn» balalar úıi «Bóbek» tobynyń balalaryna kómek kórsetip, merekelerine shaqyryp oıynshyqtarmen, jıhaz jáne oqý quraldarymen qamtamasyz etýdi de dástúrge aınaldyrǵan. Azamattyq qorǵanys boıynsha aǵymdaǵy jyldyń toǵyz aıynda 1183 tabıǵı jáne tehnogendik sıpattaǵy tótenshe jaǵdaılar men oqıǵalar tirkeldi. Osy jyldyń eseptik kezeńinde 3 myń 330-dan astam jedel qutqarý júrgizildi», dedi Almaty oblysy tótenshe jaǵdaılar departamentiniń bastyǵy Sábıt Bıtaev.
Túıindep aıtqanda, qutqarýshylar jıynynda óńir ónerpazdary arnaıy daıyndaǵan merekelik konsert tamashalanyp, kóńilderge qýanysh nuryn syılady.
Nurbol ÁLDIBAEV,
«Egemen Qazaqstan».
TALDYQORǴAN.