QARAǴANDY. 4 sáýir. Ústimizdegi jylǵy 31 naýryz kúni Qaraǵandy qalasyndaǵy 16- shaǵyn aýdanda bir pedofıl 1-synypta oqıtyn qyz balaǵa shabýyl jasap, zorlyqqa uqsas áreketke barǵan. Bul týraly «Novyı vestnık» habarlady.
Basylymnyń baıandaýynsha, belgisiz bir jigit mektepten qaıtyp kele jatqan birinshi synypta oqıtyn qyz balany úıdiń podezine aldap alyp kirgen. Sol jerde qaýqarsyz balaǵa qorlyqqa uqsas áreketter jasaǵan.
Qyz bala zorlamaqshy qaskóıdiń keskin-kelbetin polısııaǵa aıtyp berdi. Ol jasy 25-30 shamasyndaǵy eýropalyq násildi jigit kórinedi.
Oblystyq ishki ister departamentinen habarlanǵandaı, qazirgi tańda qalada pedofıldi izdestirý jumystary júrip jatyr.
«Qylmystyq kodekstiń 124-baby boıynsha qylmystyq is qozǵaldy, - dedi oblystyq ishki ister departamentiniń baspasóz hatshysy Baqytjan Qudııarov. – Krımınaldy polısııa men tergeý bólimi qyzmetkerlerinen tergeý-jedel top quryldy. Kúdiktilerdiń sheńberi jasaldy. Endi osylardyń arasynan yqtımal qylmysker izdestiriledi».
Aıqyn Nesipbaı.
Mánbe: Novyı vestnık.
Sýret: 24KZ.