Golýbev gambýrgte top jardy

Qazaqstandyq tennısshi Andreı Golýbev Gambýrgte ótken Kásipqoı tennısshiler assosıa­sııasynyń (ATR) “500” kate­go­rııasyndaǵy iri týrnırinde bas báıgeni jeńip aldy. Ol fınalda avstrııalyq Iýrgen Melserdi 6:3, 7:5 esebimen tize búktirdi. Andreıdiń bul tabysy – ATR týrnırlerinde qazaqstandyqtar qol jetkizgen eń birinshi jeńis. Osy úlken jetistigi arqasynda ol Ká­sipqoı tennısshiler assosıasııasy reıtıngisinde 45 qatar joǵary jyljyp, 37-shi orynnan bir-aq shyqty. Biraq tennısshiniń týrnır­degi joly onsha jeńil bola qoıǵan joq. Ol aldymen Germanııa úshin óner kórsetip júrgen almatylyq Mı­haıl Zverevpen (ATR reıtın­gi­sinde 157-shi) betpe-bet kelip, ony 7:5, 6:1 esebimen utty. Kelesi aı­nalymda qatty shıelenisken bá­sekede ıspan Marsel Granolersti (reıtıngide 86-shy) jarys jo­lynan shyǵaryp tastady. Match nátıjesi – 6:4, 7:5. Shırek fınal­ǵa shyǵý jolyndaǵy jekpe-jekte Andreı osy týrnırdiń ótken jyl­ǵy jeńimpazy jáne álemniń al­tynshy raketkasy reseılik Nıko­laı Davydenkomen ushyrasty. Bul jan alysyp, jan beri­se­tindeı shaıqasta taǵy da bizdiń jigittiń mereıi ústem shyqty. Ol eki sette de ataǵynan at úrketin aıbarly qarsylasynan 6:4 degen eseppen basym tústi. Budan sońǵy jartylaı fınalǵa joldama áperetin match ta asa tartyspen ótti. Onda ózin barynsha jı­naqy ustaýǵa umtylǵan An­dreı ózbekstandyq De­nıs Istomındi (reıtıngide 53-shi) 6:4 jáne 6:1 degen eseptermen shań qaptyryp, alǵa qoıǵan maqsatyna qaraı jyljı tústi. Al jartylaı fınalda oǵan kort ıesi Florıan Maıer (reıtıngide 40-shy) qarsy turdy. Alma-kezek tabyspen aýma­ly-tókpeli ótken bul kezdesýdiń aqyrynda da bizdiń jigittiń aıbyny asyp sala berdi. Ol oıyndy 7:6, 6:4 degen eseptermen óz paıdasyna aıaqtaı bildi. Bul ataq – Andreı Golýbevtiń sporttyq ómir jolyndaǵy birinshi úlken jeńis. Buǵan deıin ol 2008 jyly Sankt-Peterbýrgte ótken ATR týrnıriniń fınalyna shyǵyp, brıtandyq Endı Marreıge (reı­tıngide 4-shi) jol berip alǵan edi. Al Gambýrgtegi týrnırdiń syıaqy qory jarty mıllıon evrodan jo­ǵarylaý boldy. Osyndaǵy tabys Go­lýbevke budan basqa qosymsha 500 upaı men soǵan sáıkes ATR reı­­tıngisinde 37-shi pozısııany áper­di. Búkil týrnır boıyna ol qar­sy­las­taryna birde-bir setti bergen joq. Onyń mundaǵy jeńisi jeke ózine ǵana emes, Qazaqstan quramasy úshin de asa mańyzdy bolyp tabylady. Osynyń aldynda ǵana jasy 23-ke tolǵan bul saıypqyran – Reseıdiń Volgograd oblysyndaǵy Voljskıı qalasynyń týmasy. Tennıspen shuǵyldanýdy sonda bastaǵan. Kezinde óz eliniń 14 jáne 16 jasqa deıingi dárejelerdegi quramalarynda oınaǵan. Jasy kámeletke tolar-tolmasta arnaıy jattyǵý úshin shetelge ketedi. So­nyń ishinde Italııada kóp bolady. Sondyǵynan shyǵar, Andreı qazir ıtalıan tilin orys tilinen kem bil­meıdi. Aǵylshyn tilinde de jaqsy sóıleıdi. Sol Pıreneı túbeginde júrgeninde ony qazaqstandyq bapkerler tapty. Sóıtip, bizdiń eldiń atynan óner kórsete bastady. Bizdiń elge tez baýyr basa bastaǵan ol qazirdiń ózinde qazaqtyń etin, qazysy men tushparasyn qatty unatyp qalǵanyn aıtady. Sóz sońynda Andreı Golýbevtiń aldaǵy 17-19 qyrkúıek kúnderi Astanada Devıs kýbogy úshin match­ta Shveısarııaǵa qarsy oınaıtyn Qazaqstan quramasynyń sapynda óner kórsetkeli turǵanyn aıta keteıik. Serik PIRNAZAR. ASTANA.