Bul oqıǵa Shyǵys Qazaqstan oblysy Zyrıan aýdanynda bolǵan. Osydan birneshe jyl buryn Asqar ınstıtýtty ınjener-mehanık mamandyǵymen bitirip Shyǵys Qazaqstan óńirine joldama aldy. Onda kóbinese ózge ult ókilderi turady eken. Osy elde joldamamen kelgen Nurbek esimdi agronom jigitpen tanysady. Kúnder jyljyp ótip jatady. Aýyl turǵyndarymen jaqsy aralasyp, týysyndaı bolyp ketkendikten bolar, sol aýyldyń turǵyny, mehanık Konstantın Petrovıch (bári ony Petrovıch deıtin) Nurbek ekeýin monshasyna shaqyrdy. Olar qýana kelisedi.
Monsha ábden qyzǵan kezde Nurbek ekeýi kirip, jýyna bastaıdy, bir kezde Nurbek ystyqqa shydamaı aldyńǵy, kireberis bólmege shyǵyp ketedi. Al Asqar ystyq monshany unatatyn. Yńyldap án de aıtyp qoıady. Bir sátte syńǵyrlaǵan áıeldiń kúlkisi estiledi, jalt burylyp qarasa, shashy uzyn, ústine appaq kóılek kıip alǵan bir orys qyzy tur. Qyz kúlimsirep, sabyndy alyp, Asqardyń arqasyn jýa bastady... Asqar bolsa ań-tań, áýelde shoshyp ketse de, qyzdan sonsha qoryqqanyna namystanyp, ózin sabyrǵa shaqyrdy. Ishteı «Petrovıch bizge bir «sıýrprız» jasaǵysy kelgen ǵoı», dep te oılady. Qyz ǵajap sulý. Biraq kózderi sýyq, muńly. Endi, esin jıyp «Nurbek, tez kel, qyzyqtan qur qaldyń, myna ádemi qyzdy qara!» dedi.
Nurbek ornynan atyp turyp, jýynatyn bólmege kirse, monsha ishinde Asqardan basqa eshkim joq. «Sen jyndanǵan shyǵarsyń, qaıdaǵy qyz?» deıdi Nurbek, bul ádeıi qyljaqtap tur degen oımen. Asqar artyna burylyp: «О́ı, mine, tur ǵoı, qarasańshy!» degenshe álgi arý ushty-kúıli ǵaıyp bolypty. Apyrm-aı, bul ne boldy? Endi ekeýi birtúrli qorqaıyn dedi. Jyldam jýynyp, monshadan shyǵyp, Petrovıchke keldi. Oǵan bolǵan jaǵdaıdyń bárin táptishtep aıtyp berdi. Petrovıch bárin de biletin bolyp shyqty. Ol aqyryn jymıyp qoıyp: «Men senderge aıtýdy umytyp ketippin, óı, aljyǵan basym», deıdi óz-ózine renjigensip.
Sodan soń baryp, sabyrly keıipke túsip: «Sender qoryqpańdar, ol qyzdyń adamǵa zııany joq, onyń ústine ol ár adamnyń kózine kórine bermeıdi. Bul monshanyń ornynda burynǵy zamanda orystardyń beıiti bolǵan eken. Keıinnen Keńes ókimeti kezinde ony kúrep tastap, ornyna turǵyn úıler salǵan. Al jańaǵy sen kórgen qyz buryn osy jerde bir baı kópestiń qyzy bolǵan desedi. Qaraqshylar, qyzdy tonap, zorlap óltirip ketken. Sodan beri qyzdyń jany áli jaı tappaı, tiri adamdarǵa eles bolyp kórinip mazalaıdy eken degen ańyz áńgime bar» deıdi.
Jalpy, bizden basqa aýyl turǵyndarynyń barlyǵy derlik osy monsha jaıly biledi eken. Tipti, keıbireýleri qyzdy kórý úshin monshaǵa ádeıi keletin kórinedi.
Mine, sodan keıin Asqar men Nurbek Petrovıch monshaǵa shaqyrsa, at-tonyn ala qashatyn bolypty. Ol kezde mundaı áńgimelerge kóp eshkim sene qoımaıtyn. Keıinnen Petrovıch aýdan ortalyǵyndaǵy shirkeýden din adamdaryn shaqyrtyp, duǵa oqytyp, jańaǵy qyz úshin shirkeýge baryp, shyraq jaqqannan soń ǵana baryp, qyzdyń jany máńgilikke jaı tapty dep estidik.
Taǵy bir oqıǵa, muny tańǵajaıyp qubylys dese de bolatyn shyǵar, Almaty qalasyndaǵy bir joǵary oqý ornynyń jataqhanasynda bolǵan eken. Bólme turǵyndary kúnde túngi saǵat 12.00-de esiktiń syqyrlap ashylatynyn talaı kórgen.
Qansha kilttep japsa da, esik bir ýaqytta ózinen-ózi ashylady, biraq kózge eshkim kórinbeıdi. Tipti, joǵary oqý ornynyń oqytýshylary da talaı kelip, óz kózderimen kórgen. Bul sonda ne, belgisiz paralleldi tirshilik ıesi me, joq álde, jany jaı tappaı júrgen marqum ba?
Bolashaqta osyndaı ǵajaıyp qubylystardy zerttep, biletin shyǵarmyz. Ázirge qupııa.