Statıstıka organdarynyń málimetine súıensek, qala boıynsha jyl basynan beri jekelegen taýar baǵasynyń ósýi 10 paıyzdy qurasa, áleýmettik mańyzdaǵy taýar quny orta eseppen 5 paıyzǵa óskendigi baıqalady. Bul rette azyq-túlik baǵasynyń aıtarlyqtaı artýy kórinbeı otyr.
Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda Astana ákiminiń orynbasary Andreı Lýkın osylaı dedi. Onyń aıtýy boıynsha, elordada áleýmettik-ekonomıkalyq jaǵdaılardy retteý jáne monıtorıng jasaý boıynsha arnaıy shtab qurylǵan. Ol osy oraıda baǵalardy turaqtandyrý úshin ákimdik tarapynan qajetti sharalar qolǵa alynatynyn aıtty. Sondaı-aq, elimizdegi Aýyl sharýashylyǵy mınıstrligimen birlese ústimizdegi jyldyń qańtary men qazan aıy aralyǵynda tutynatyn bıdaıdy Astanadaǵy dán óńdeýshi kásiporyndardan belgilengen baǵa boıynsha jetkizý úshin baǵdarlama qolǵa alynyp otyrǵandyǵyn jetkizdi. Bıyl osy baǵdarlamaǵa eki kásiporyn — «Sesna-Astyq» Konserni» AQ jáne «Tabys 2009» JShS qatysatyndyǵyn atap ótti.
Sonymen qatar, ol saýda nysandary men ákimdik arasynda memorandým jasalǵanyn tilge tıek etti. Ústimizdegi jyly osyndaı memorandýmǵa 25 saýda kásiporyndary qol qoıǵan, onyń ishinde birqatar saýda jelisi men sýpermarketter bar. Jáne de ústeme baǵanyń 10-15 paıyzdyń mańaıynda ekendigin tuspaldaı otyryp, buǵan ónimniń kóp túrliligi áser etetindigin aıtty. Áleýmettik mańyzdaǵy azyq-túlik ónimderiniń bólek túrlerine baǵanyń artýyna teńgeniń erkin baǵamyna oraı óndirýshilerdiń bosatý baǵasynyń ósýi negiz bolǵanyn kóldeneń tartqan ol, sonymen birge shıkizatqa, qaptaý materıaldary men ımporttyq taǵamdyq qospalarǵa baǵanyń artýy yqpal etkenin jetkizdi. Al jemis-jıdek, kókónis, sút jáne et ónimderine baǵanyń dınamıkasy maýsymdyq mánge ıe, dedi ol.
Sondaı-aq, teńge baǵamynyń aýytqýy elordada benzın baǵasynyń artýyna yqpal etpeıtindigin jetkizdi. Bul máselede qaladaǵy barlyq janarmaı quıý stansalarynda janar-jaǵarmaı materıaldarynyń bólshek saýda quny bekitilgen shekte ustalyp turǵandyǵyn aıtty. Energetıka mınıstriniń buıryǵyna sáıkes, ústimizdegi jyldyń mamyr aıynda janarmaıdyń bólshek satylymyna shekti baǵa bekitilgenin eske salǵan ol, Aı-80 benzıni 89 teńgege, Aı-92, Aı- 93 108 teńgege jáne dızel otynyna 99 teńgege shekti baǵa aıqyndalǵanyn atap ótti.