Senbi kúni elordada Qazaqstan Patrıottar partııasynyń kezekten tys XIV sezi ótti. Oǵan partııanyń óńirlik fılıaldarynan delegattar qatysty. Sezde Qazaqstan Patrıottar partııasynyń jańa tóraǵasyn saılaý týraly másele qaraldy.
Delegattar aldynda sóz sóılegen Ǵanı Qasymov alda turǵan mindetterdi sheshý úshin partııaǵa jańashyldyq qajet ekenin atap ótti. Sondaı-aq, ol endi óziniń bar kúsh-jigerin Ulttyq kásipkerler palatasyndaǵy qyzmetine jumsaıtyndyǵyn málimdedi. О́ıtkeni, Memleket basshysy bıznes-keńistikke úlken jaýapkershilik júktep otyr.
Al sezd delegattary daýys berý arqyly Qazaqstan Patrıottar partııasynyń tóraǵalyǵyna Tolymbek Ǵabdiláshimovti saılady. Jańa tóraǵa kópten beri osy partııanyń múshesi retinde saıası uıymnyń jumysyna belsene qatysqan. Ol partııanyń uıymdastyrýshylyq qyzmetine jańashyldyq engize alady.
Tolymbek Ǵabdiláshimov belsendi qoǵam qaıratkeri, birneshe ret Parlament Májilisi depýtattyǵyna kandıdat retinde usynylǵan. Sondaı-aq, ol memlekettik organdarda jaýapty qyzmetter atqardy.
«Egemen-aqparat».