QOSTANAI. 20 qazan. Qostanaı oblysynda astyq jınaý naýqany tolyq aıaqtaldy. 4 mıllıon 18 myń gektardan qambaǵa barlyǵy 5 mıllıon tonna altyn astyq quıyp alyndy. Bul týraly egemen.kz tilshisi habarlady.
Kóktem jáne kúzde aýa raıynyń asa qolaıly bolmaǵanyna qaramastan qostanaılyq dıqandar gektarynan 12,4 sentnerden astyq jınady. Ásirese, Fedorov, Sarykól, Meńdiǵara, Uzynkól aýdandarynda gektar aınalymy mol, 16 sentnerden asyp jyǵyldy. Astyq úshin attanysqa 12 myń kombaın, onyń ishinde 3,2 myń qýatty, ónimdiligi joǵary Djon-Dır, Keıs, Klaas, Akros kombaındary qatysty. Onyń syrtynda 8,6 myń júk mashınalary, basqa da myńdaǵan basqa tehnıkalar boldy.
Ádette, oblysta ońtústik aýdandar astyqty erterek jınap alady. Aýa raıynyń jańbyrly bolýyna baılanysty ýaqyttan utý úshin ońtústik aýdandardan 200 kombaın soltústik aýdandardaǵy dıqandarǵa kómekke keldi. Munyń ózi jaýapty naýqannyń tezirek bitýine múmkindik jasady. Oblys dıqandary memleket tarapynan jasallǵan jeńildikterdi paıdalana otyryp, 77 myń tonna dızel otynyn arzan baǵamen aldy. Egis alqabyndaǵy kóktemgi-kúzgi jumystar úshin memleket 6.5 mıllıard teńge nesıe qarjysyn bólgen bolatyn.
Jınalǵan astyqtyń jaqsy saqtalýy úshin oblysta syıymdylyǵy 7 mıllıon tonna elevatorlar men qoımalar daıyndaldy. Búginge deıin elevatorlarǵa 1 mıllıon 391 myń tonna astyq tústi, onyń 1mıllıon 209 myń tonnasy bıdaı. Kóketmde 548 myń tonna tuqym sebilgen bolatyn. Bul 100 paıyz suranysty qamtamasyz etti.
Oblysta qazir maıly daqyldar jınalýda. Búginge deıin 161 myń gektar alqap jınaody, bul barlyq kólemniń 48 paıyzy bolyp tabylady. Onyń gektar aınalymy 5,6 sentnerden kelip tur.
Názıra Járimbetova.
Derek, sýret: egemen.kz.