ASTANA. 13 naýryz. Almatyda «Nur Otan» partııasy atynan el Prezıdenttigine usynylǵan úmitker – Elbasy Nursultan Nazarbaevtyń saılaý naýqanyna qoldaý kórsetý maqsatynda qalalyq qoǵamdyq shtab quryldy. Bul týraly «QazAqparat» habarlady.
Nursultan Nazarbaevtyń basty senimdi ókili jáne respýblıkalyq qoǵamdyq shtabynyń jetekshisi Muhtar Qul-Muhammedtiń uıǵarymymen Almaty qalalyq qoǵamdyq shtabynyń jetekshisi bolyp Almaty qalalyq máslıhatynyń depýtaty, «Turan» ýnıversıtetiniń rektory Rahman Alshanov taǵaıyndaldy.
Búgin shtabtyń alǵashqy otyrysynda Rahman Alshanuly qatysýshylarǵa aldaǵy jumystar jóninde baıandady.
«Saılaýǵa qatysty qoǵamdyq shtab quryldy. Osy jumysqa qatysýǵa kelisim bergenderińizge úlken rahmet! Sizder endi Elbasynyń senimdi ókilisizder. Jumysymyz resmı túrde aldaǵy 24 naýryzda bastalyp, bir aı ýaqytqa sozylady. Al 25 naýryz - saılaý aldyndaǵy tynyshtyq táýligi bolyp sanalady. Biz búgingi shtabtyń quramyna qoǵamnyń túrli salalarynyń ókilderin, qoǵamǵa belgili tulǵalardy jınadyq. Aldymyzda mańyzdy jumystar kútip tur. Almaty qalasynda mıllıonǵa jýyq saılaýshylar bar. Sondyqtan aldaǵy bir aı merzim ishinde túrli eńbek ujymdarymen, bilim jáne densaýlyq saqtaý salalarynyń qyzmetkerlerimen, joǵary oqý oryndarynyń stýdentterimen jáne basqa ujymdarmen kezdesip, úgit-nasıhat jumystaryn júrgizýimiz kerek», – dedi R.Alshanov.
Aıta keteıik, Almaty qalalyq qoǵamdyq shtabynyń quramyna barlyǵy 50 adam toptastyryldy. Olar 3 adamnan 16 topqa bólindi. Olardyń ishinde Y.Altynsarın atyndaǵy №159 mektep-gımnazııasynyń dırektory Aıagúl Mırazova, Almaty qalalyq máslıhatynyń depýtaty, «Lokomotıv» AQ fılıalynyń dırektory Bolat Ospanov, Qazaq memlekettik qyzdar pedagogıkalyq ýnıversıtetiniń rektory Dınar Nóketaeva, «Generaldar keńesi» respýblıkalyq qoǵamdyq uıymy tóralqasynyń tóraǵasy Rústem Qaıdarov bar.
Qazirgi tańda Almaty qalasynda barlyǵy 523 saılaý ýchaskesi bar. Árbir saılaý ýchaskesinde qalalyq shtab tarapynan úsh senimdi ókilden bolady. Sonymen qatar qalanyń 8 aýdanynda Elbasy N.Nazarbaevtyń kandıdatýrasyn qoldaý maqsatynda qoǵamdyq shtabtar qurylady.
Joldybaı Bazar.
Derek, sýret: «QazAqparat».