Qyrǵyzstanda ótken dúrbeleń jaǵdaı ózimizge belgili. Sol dúrbeleńniń saldarynan eldegi beıbit halyq, sonyń ishinde qorǵansyz balalar biraz zardap shekti. Osyǵan oraı Qazaqstan qaqtyǵysta teperish tartqan balalardyń bir tobyn tynyqtyryp qaıtarý jóninde bastama kótergen bolatyn. Bul bastama ózge elder tarapynan da keńinen qoldaý tapty.
Jaqynda Bilim jáne ǵylym mınıstrligi osy bastamany birinshi bolyp qoldap, júzege asyrdy. Sonyń arqasynda Qyrǵyzstannyń Osh jáne Jalalabad qalalarynda turatyn 50 bala shildeniń 25-inde Jambyl oblysynyń Jýaly jerine kelip jetti. Kelgen boıda Qarataýdyń bir múıisindegi tabıǵaty tamasha “Samal” tynyǵý lagerine ornalasqan olar birden jan-jaqty qamqorlyqqa alyndy. Jastary 7-den 15-ke deıingi aralyqtaǵy bul baldyrǵandar munda tynyǵýmen birge, úsh mezgil tamaqtanady, erteli-kesh psıholog-dárigerlerdiń baqylaýynda bolady.
Qyrǵyzstandyq búldirshinder munda 12 kún bolady.
“Egemen-aqparat”.