Shahma aǵany es bilgennen beri biledi ekenmin. Sebebi, áke-sheshem ol kisiniń Zerendidegi qaıyn jurtymen syılas, dos-jar qatynasta boldy. Arasy jaqyn aýdan ortalyǵyna at izi jıi túsedi. Sondaıda Shákeńniń naǵashylatyp júrgen, maǵan teteles úlken uly Erkinmen taı-qulyndaı tebisip ótkizetin kúnderimiz de az bolmaıtyn. Keıinirek, orta mektepti oryssha bitirgen osy Erkindi Shahma aǵa ertip ákelip, Zerendiniń aýdandyq gazetine tilshilik qyzmetke engizgeni de kúni búgingideı kóz aldymda. Alty aılyǵynda aýzyna alyp naǵashy atasy abyz Sábeń – kádimgi Sábıt Muqanov túkirgen Erkin jýrnalıstik jumysqa kóp uzamaı tóselip sala bergen. Biraq soǵan qaramastan bolashaqta onyń peshenesine jýrnalıst emes, zańger bolý jazylypty.
Shahma aǵa sol kezde Qoshqarbaı aýylyndaǵy segiz jyldyq mekteptiń dırektory. Aýdan basyna jıi kelip, redaksııaǵa soǵyp turady. Árqashan jınaqy, symdaı tartylyp, syrbaz synyn buzbaı júredi. Qashan kórseńiz de sabyrly sabat qalpynan aınymaıdy. Sálemdeskende birer aýyz til qatynasqanymyz bolmasa, artyq-aýys, beısaýat sózge sarań. О́zine quıyp qoıǵandaı jarasatyn, týmysynan daryǵan kerbezdigi men pańdyǵy da bar sııaqty. Sóıtkenmen de tartymdy. Adamdy syrtqa teppeıtin, keýdeden ıtermeıtin, izettilikpen jylyushyrap turatyn naq osyndaı baıypty baısaldylyq ekiniń birinde kezdese bermeıtini de ras.
Kele-kele sabyr Shahma aǵanyń adamı basty qasıetteriniń biri ekenin ańdaǵanmyn. Seksen úshinshi jyldyń sary kúzine taman ǵoı deımin, Erkin úılendi. Qaraǵandy memlekettik ýnıversıtetiniń zań fakýltetin bitirip kelip, Kókshetaýdyń qalalyq sotynda jumysqa jastyq jigerin aıamaı salyp, qazandaı saqyldap qaınap júrgen kezi. Meniń ol ýaqta az-muz asabalyǵym bar-tyn, toıyna shaqyryp turyp, ári sony basqaryp beresiń dep salmaq salǵan. Sonymen, Kókshetaýdan shyqqan jeńil máshıneler kerýeni sherýletip Keńótkeldi betke alyp, shań soqtyrtyp kele jatqanbyz. Qoshqarbaıdyń taýy men aýyly sol qanatymyzdan shyǵyp, sálden soń sońymyzda qaldy. Áne-mine degenshe toıly aýyl Keńótkeldiń de tóbesi kóringen. Osy sátterde kenet aýyldyń orta tusynan aspanǵa býdaqtap kóterilgen, jalyn aralas qoıý tútin kózge shalyndy. О́rt. Bir úı órttenip jatyr! Júregimiz sý ete tústi. Oıpyrmaı, kele jatqan úıimiz bolmasa ıgi edi! Jastar men qudalardy aýyl syrtynda qaldyryp, basqamyz ilgeri ozǵanbyz. “Jaman aıtpaı jaqsy joq” degendeı, kúdigimiz rasqa shyqty. О́rtenip jatqan Shahma aǵanyń qora-qopsysy men jaz boıy balalarymen arqa eti arsha, borbaı eti borsha bolyp shapqan shóbiniń maıasy eken. О́rt endi boı bermeı úıdi shapsa, sumdyq sonda bolmaq. Bet qaratpaı shalqı uıytqyǵan qyzyl jalyn úıdi de sharpı jazdap, áıteýir uıymshyl aýyldyń kári-jasy túgel jumylysyp, sýdy tolassyz shelektep quıǵannyń arqasynda órttiń ary qaraı órshýine jol bermeı aýyzdyqtaldy. Qora-qopsy men pishen albary úıden alysyraq salynǵan jańashyl jınaqylyq ta ordasyn ottan saqtap qalýǵa kóp septigin tıgizdi. Biraq sol joly dál toı aldynda shyqqan órt bir maıa shóp pen qora-qopsyny túk qaldyrmaı jalmap ketti.
Toı ústindegi sapyrylysta salqyn sana, muzdaı sabyryn joǵaltpaǵan jalǵyz jan bolsa, ol Shahma aǵanyń ózi bolatyn. Qyzyq-qýanyshqa qarbalas kelgen qyrsyqqa qaıyspady, basqa túsken aýyrtpalyq synyn myńq etpesten nar minezben kóterip aldy. Oıboı da, boıbaı da bolmady, toıdyń shyrqy buzylmady. Uly úılenip jatqanda úı ormany órtengen qıyn sátte osynshalyqty aqylman ustamdylyq tanytý erdiń eriniń ǵana qolynan keler erendik edi. Sol jaǵdaı Shákeńniń áli esinde bolar. Sodan beri qanshama jyldar ótse de aǵanyń osy bir nar minezin dátke berik sabyr saqtaýdyń úlgisindeı kórip, men de umytpaı júrmin.
Keıin zerdelesem, quıma qorǵasyndaı bul sabyr-tózim, ustamdylyq ónegesi onyń búkil ómirimen ózektese órilgen eken-aý. Kóz aldymyzǵa ótken ǵasyrdyń qyrqynshy jyldaryndaǵy qyrǵyn soǵys kezeńin keltireıikshi. Sonda ǵalamat taýqymet kóppen birge osy Shahma sııaqty on eki-on úsh jastaǵy balalardyń da basyna tústi. Muqaǵalı aıtqandaı, sol bir aýyr jyldar shynynda da sol balalardan bir-bir batyr jasaǵany ras.
Kózge elesteter bolsaq, alysta qalǵan sonaý jyldardyń sýreti aıanyshty, sury jaman, súrgini qatty. Ákesi Baımyrza soǵysqa attandy. Shıetteı alty bala kolhozda saýynshy bolyp isteıtin, shesheleri Mádınanyń qolyna qarap qaldy. Býyny qatyp, buǵanasy bekimese de aǵasy Táshkenmen birge Shahma da kolhoz jumysyna jegiledi. Úıdiń sharýasy jáne moınynda. Anasy qystyń kózi qyraýda at shanamen qıyrdaǵy Qorǵan qalasynda áskerı daıyndyqtan ótip júrgen ákemen kórisip qalýǵa jol júrip ketedi. Bul da bir ýaıym boldy. Tún balasynda kishkentaı inileri Janaıdar men Jambyldyń sheshelerin izdep jylaǵany janǵa batady. Ardy oılaǵan, Otan úshin qan tókken erdi oılaǵan sol kezdegi qaıran analar!.. Azamatyn aqyrǵy kórýi sol eken. Odan soń otbasynyń tóbesine qaıǵynyń qara bulty úıirile berdi. Boıjetip qalǵan ápkesi Balǵanymnyń aýrýy asqynyp, aqyry qaıtys boldy. Sýyq ótip aýyrǵan, tuńǵyshynyń qaıǵysy janyn jaralap qur súlderi qalǵan sheshe tósek tartyp jatyp qalady. 13-tegi Shahma mektepten kele sala úı sharýasyna kirisedi, nan ıleıdi, tamaq pisiredi. Odan sheshesiniń shaıyn qaınatyp, sýsynyn ázirlep beredi. Birden jańa asqan qaryndasy Balkúmisti ýatady. Keshke ushyp jyǵylady.
Aınaldyrǵan aýrý anasyn da alyp tynady. Aǵasy Táshkendi áskerge alyp ketedi. Endi bar taýqymet Shahmanyń basyna túsedi. Sheshe qaıtqannan keıin kishkentaı Balkúmis te aıyqpas dertke shaldyǵady. Qasynan eki eli qalmaı, túnde qoınynda jatyp, qatygez ómirde ana ornyna ana bolǵan aǵasynyń moınyn tań atqansha tas qylyp qushaqtap shyǵady. Sóıtip ol da ana qushaǵyn kórmesten kóz jumdy. Áke alysta, sheshe joq. 1944 jyly birinshi klasqa barǵan inisi Janaıdardy, qazaqtyń bolashaq belgili jazýshy-jýrnalısin partaǵa ózi aparyp otyrǵyzady. Shahma bul kezde jetinshi klasty bitirip, kolhozda kádimgideı jumys isteıdi.
Ol kezdiń jumysy sol, kóktem shyǵa jer jyrtyp, egin salady. Tańnyń atysy, kúnniń batysy soqanyń sońynda. О́giz jetekteıdi, ógiz bolmasa sıyr jegedi. Tuqym sepken kezde bıdaı qýyryp jep, qaýjańdap bir toıyp qalady. Mundaıda úıdegi ózine jaýtańdaǵan kishkentaı inilerin de esten shyǵarmaıdy. О́ıtkeni, jasy 14-te bolsa da, olardyń ákesi de, sheshesi de ózi. Brıgadırlerden taıaq ta jeı júrip, kúzge deıin talshyq qylatyn azyq jınap alady. Shóp ýaqytynda bar tamaqtary aıran men irimshik, qurt. Jumystan soń jurt shoshalada Kenjeǵalı degen qart adam jatqa aıtatyn Birjan-Sara aıtysyn, ertegilerdi ermek qylady. Tyńdap jatyp, qııalǵa batyp uıyqtap ketedi. Kúzge salym egindi orǵan kezde taǵy bir qaryq bolyp qalady. Odan qaldy, qys boıy 70-80 shaqyrym jerdegi Kókshetaýǵa par ógizben kire tartady. Aıaǵynda ákesiniń kıiz baıpaqty etigi, ústinde – sheshesi marqumnyń tigip berip ketken kúpisi, basynda túlki qulaqshyn. Bir jeti júrip keledi. Qaqaǵan aıazdarda qulaqtaryn úsik shalyp, bet-aýyzdary dombyǵyp qap-qara bolyp ketedi. Boranda qalyp sýyq ótkennen es-tússiz jyǵylyp aýyrǵan kezderi de boldy. Bútin bir áýlettiń amanatyn arqalaǵan qazaqtyń qarshadaı balasy sol qıyndyqtardyń bárine shydady. Boıynan solardy jeńetin tózim, qaırat taba bildi. Bir joly týǵan aýyly Qaraótkel mańaıyndaǵy qalyń jynys ormannyń ishine otynǵa barǵan segiz jasar inisi Janaıdar ekeýin qasqyr qamaǵanda aldyrtpaǵan berik qamaly bolǵan qaısarlyq, sabyry ómir órlerinde de alǵa súıregen qanatyna aınaldy. Iá, olaı bolsa, joǵaryda aıtqan órt ústinde de tııanaǵynan taımaǵan óreli minez Shákeńniń boıynda halqymyzdyń basyna túsken aýyr jyldarmen tuspa-tus kelgen balalyq shaǵynda qalyptasyp edi desek, durysy da sol bolar.
Qudaı berip, ákesi Baımyrza soǵystan aman-saý oralǵan soń arqasy keńip, oqýyn jalǵastyrýǵa múmkindik alǵan. Qaıda barsa da qasynan qaldyrmaı, ózimen birge jeteleı júrip qamkóńil inisi Janaıdardy da oqytqan. Sóıtip, Shahma Kókshetaý qalasyndaǵy pedagogıkalyq ýchılıshege oqýǵa túsedi. Ony bitirip shyqqan soń Zerendi óńirindegi Molaq, Qaraótkel, Úlgili, Qoshqarbaı, Keńótkel aýyldaryndaǵy jetijyldyq mektepterde ustazdyq etedi. Keńótkelde bolashaq jary Kúlzıramen kezdesedi. Arasynda áskerı boryshyn da ótep qaıtady. Temirqazyq nysanadan aınymaı, ustazdyq qyzmetin jalǵastyra júrip, syrttaı oqyp, Qazaq memlekettik ýnıversıtetiniń fılologııa fakýltetin bitirip shyǵady. Sol alǵashqy tyrnaqaldy jyldardan bastap 1998 jyly alpys segiz jasynda zeınetkerlikke shyqqanǵa deıin Shahma Baımyrzauly 50 jyl boıy taban aýdarmastan qazaq tili men ádebıeti páninen sabaq berdi, sonyń ishinde úzdiksiz 35 jyl mektep dırektory boldy. Bul jaıdyń da salamatty sabyr ıesinde ǵana bolatyn sırek turaqtylyqty pash etip turǵany anyq.
Adamdyq aınasynyń qaltqysyz kórseter aqıqaty sol, búginde seksenniń bıigine shaldyqpaı jetken Shahma aǵa arttaǵy bel-belesterine kóz tastaı otyryp, maǵynaly ómir keshtim dep esh kúmánsiz aıta alady. Atqarǵan qyzmet salasyna keler bolsaq, eń izgilikti muǵalim mamandyǵy ómiriniń mánine aınaldy, sonyń qyzyǵyn da, qıyndyǵyn da birdeı keshti. Eń bastysy, Abaı atasy aıtqandaı, ustazdyq etýden, balalarǵa bilgenin úıretýden jalyqpady. Nazar aýdarsaq, bul qasıet te sabyrdyń bir tarmaǵy bolsa kerek. Jalyqpaǵan ustaz osynaý jyldarda myńdaǵan shákirtterdi tárbıelep, ómirge qanat qaqtyrdy. Sonda olarǵa Shahma ustazdyń saılap bergen qanaty árdaıym qazaq tili bolyp otyrdy. Osy oraıda “Joǵary sanatty ustaz” da atandy, “Halyq aǵartý isiniń úzdik qyzmetkeri” ataǵyn da enshiledi. О́zi shırek ǵasyr basqarǵan Keńótkel aýylyndaǵy bilim uıasy qazaq tili men ádebıetin oqytý jóninen aýdan, oblys kóleminde úlgi-tirek mektebine aınalsa, bul da eresen eńbeksúıgishtiktiń belgisi der edik.
Shákeńniń esimizde qalǵan taǵy bir ıgi isi, 1982 jyly Oral qalasynda ótken qazaq tili men ádebıeti páni ozat muǵalimderiniń respýblıkalyq semınar-keńesine qatysyp kelgesin, sol saparda kóńilge túıgenderin “Kókshetaý pravdasy” gazetine maqala etip jazyp, oblys ortalyǵynda ádebıet jáne óner murajaıyn ashý jóninde usynys-tilegi, oıǵa alǵan maqsaty júzege asyp, Kókshetaý qalasynda sol kezde sondaı murajaı ashylǵandyǵynyń kýási bolyp edik. Osyndaı jańashyldyǵynyń arqasynda Shákeń basqaratyn jańaǵy Keńótkel mektebinde alty jastan bastap oqytatyn tájirıbe synyby ashylǵanyn da kózimiz kórgen. Osy tájirıbeni izdep respýblıkanyń túkpir-túkpirinen muǵalimder Keńótkelge keldi. Shákeńniń arqasynda Keńótkel aýyly, Keńótkel mektebiniń jaqsy aty búkil Qazaqstanǵa jaıyldy. Mundaı jaqsy ister jyldan-jylǵa jalǵasyn taýyp, 1988 jyly Shahma Baımyrzauly basqaratyn bilim ordasynda tuńǵysh ret qazaq tili men áde-bıetiniń respýblıkalyq olımpıadasy bolyp ótkenin de bilemiz. Mekteptiń mereıi osylaı ústem etildi, dırektor bedeli osylaı bıiktedi.
Aldynan oqyǵan shákirtteriniń birsypyrasy qazaq tili men ádebıeti pániniń muǵalimi boldy. Shahma ustaz balalardyń ana tiline degen súıispenshilik, qushtarlyǵyn oıata bilý sheberligimen tanyldy. Keńestik toqyraý jyldarynda ár ýaqyt qazaq mektebin qyzǵyshtaı qorǵaýshylardyń qatarynan tabylyp otyrdy. Qazaq mektebiniń joǵyn joqtady, muńyn muńdady, onyń bilim berý sapasy men bedelin kóterýge aıta qalarlyqtaı eńbek sińirdi. Odan qala berdi, jurtty jeke úlgisimen de tánti etip, Erkinnen keıingi alty balasyn birdeı qazaq mektebinde oqytyp, aldyńǵy qatarly azamattar etip shyǵarýy da árbir sanaly qazaq ata-anasy úshin úırene júrerlik ǵıbrat. Sonymen birge óz ónegesimen muǵalimderdi de baýrap, ustazdardyń ustazy bola bilý baqyty da ekiniń biriniń mańdaıyna jazyla bermes enshi desek, sondaılyq sırek abyroıǵa bólengen de bizdiń Shahma aǵamyz bolatyn. Osynyń aıǵaǵyndaı, ol kisiniń aýdan men oblys kóleminde qatarynan birneshe ret “Jyl dırektory” atanǵany da, jas urpaqqa bilim berýdegi uzaq jyldarǵy eren eńbegi eskerilip, uly ustaz Ybyraı Altynsarın atyndaǵy medalmen marapattalǵany da esimizde.
Adam eńbeginiń bir ǵana shynaıy ólshemi marapat bolsa, aǵanyń ǵumyrbaıanynda murnynan marjandaı tizip maqtanysh eterlik ondaı súıinishti jáıtter jeterlik. Táýelsizdik jyldaryndaǵy zeınetti jasynda da alǵashqylardyń qatarynda Zerendi aýdanynyń qurmetti azamaty ataǵyn alyp, Zerendiniń tasty jaryp qasqaıǵan nar qaraǵaıyndaı eńselengenine qýanǵanbyz. Al el egemendiginiń on jyldyǵynda “Bilim berý isiniń qurmetti qyzmetkeri” medalin eń alǵashqylardyń biri bolyp keýdesine qadaǵanyna mereılengenbiz. Zerendi kentiniń Málik Ǵabdýllın atyndaǵy qazaq orta mektebinde Shahma aǵanyń on shákirti sabaq beredi. Basqa mektepterde júrgenderin sanamaı-aq qoıaıyq. Joǵary oqý oryndarynda ustazdyq etýshilerdi, til-ádebıetten ǵylym jolyna túskenderdi aıtyp ýaqyt ketirmeıik. Al kenje uly ári shákirti Sáken ákesi shırek ǵasyr basshylyq jasaǵan Keńótkel mektebiniń dırektory qyzmetin biraz jyldan beri abyroımen atqaryp, ardaqty ákeniń ornyn basyp, kenje uldyń peshenesine jazylar shańyraq ıesi retinde áke estafetasyn aldaǵy jarqyn bolashaqqa sátimen jalǵastyryp jatsa, bul da bir súıinish.
О́mir maǵynasy, adamnyń jan dúnıesiniń tosyn kózge ońaılyqpen shalyna bermes syrly sıpattary bir ǵana jumys babynda tanylmaıtyny aıan. Minezge baı Shákeń qazirde rýhanı turǵydan da kópti kórgen, toqyǵany kenen qazyna qartqa aınalǵan. Aǵa janynyń tuńǵıyǵynda tunyp jatqan syr da kóp. Aıtalyq, áriden salsań áz Táýke zamanyndaǵy Qalaq batyrdyń urpaǵy, beriden salsaq, ardager Aqan seri ánge qosyp úsh júzge málim etken ataqty Balqadıshanyń týǵan jıeni ekenin kim bilipti. Balqadısha jaıynda da áli de bolsa asyldy jasyqtan aıyryp qalam tartamyn deýshilerge aqıqat áńgime, naqty derek aıtatyn kóne kózderdiń sońǵy tuıaǵy da osy Shahma aǵa ekenin el qaperine salyp qoıǵan artyq bolmas.
Tektilikke janasýyn ary qaraı ejiktep taratar bolsaq, Sábıt Muqanovtaı asylǵa jaqyndyǵy, mine, 55 jyl jubaılyq ómirdi birge keship kele jatqan jan qosaǵy Kúlzıra Maǵjanqyzymen tikeleı baılanysty. “Eki jaqsy sırek qosylady” desek te bul kúnde nemereli-shóbereli úlken áýlettiń asqar taýdaı ata-ájesi bolyp otyrǵan osynaý qydyrly juptyń búkil bolmysy, minezderi bir-birine de qamshy órimindeı jymdasyp, dombyranyń qos ishegindeı jarasa qatar tartylǵany da qandaı ǵanıbet deseńizshi. Qyzmet istegen mektepterinde Shákeń qashanda qazaq tili men ádebıetinen ustazdyq etse, Kúlzıra jeńgeı óne boıy orys tilinen sabaq beripti. Minekı, osy kisiniń týǵan atasy Omar men Sábeńniń ákesi Muqan birge týǵan baýyrlar. Kúlekeń qyz kúninen Sábıt Muqanovty erekshe qadirlep, maqtanysh tutyp, shyǵarmalaryn oqyp ósken. О́ziniń alashqa belgili atasyn, balalarynyń asa jaqyn naǵashy atasyn ardaq tutýdan, maqtan etken Shákeń de jańylmaǵan. Sábeń alǵash Zerendide turatyn óziniń nemere inisi, bul kisiniń atasy Maǵjannyń úıine qasyna kókshetaýlyq Erkesh Ibrahımdi ertip 1956 jyly kelgeni bar. Sonda “Zım” jeńil máshınásimen Qoshqarbaıdaǵy bulardy da aldyrtqan. Almatyda oqyp júrgende kórip tyńdaǵanymen, jaqyn tanysyp biliskeni osy. Endi týys bop shyqty. Sábıt ata ózi men Kúlzıra qyzdarynyń betterinen shyn yqylaspen emirene súıip, aq kóńilmen eljirete terbetip tastaǵan. Tuńǵyshtary Erkin alty aılyq bolatyn. Ony da aımalap, atasyndaı bolsyn dep aýzyna túkirtedi. Búginde atpal azamat bolǵan belgili zańger sol Erkinge anasy Kúlzıra: “Kishkenteı sábı kúnińde yrym qylyp Sábıt atańa aýzyńa túkirtkemin. Seniń jaman bolmaı óskeniń sondyqtan”, dep osy kúnderde ertedegi jan jylytar shýaq jaılardy jadyraı eske alyp aıtyp otyrady. Tuńǵysh ul solaı bolǵanda, ekinshi qyz Gúlnár medısına ǵylymynyń kandıdaty, Qaraǵandynyń úlken bir emdeý mekemesiniń meńgerýshisi. Al Shahma aǵa bolsa, kezinde úlken jazýshynyń shyǵarmashylyǵyn ádebıet páninde jarty ǵasyr boıy oqytqany óz aldyna, qazir de aýdandyq, oblystyq gazetterge maqala jazyp, Sábeń murasyn talmaı nasıhattaýmen keledi.
Jalǵyz Sábeń emes, azamattyq uranshysy Mahambet aqyn, Muhtar Áýezov, Smaǵul Sadýaqasov, Zeınola Qabdolov jaıynda tebirenip jazǵan maqalalary qandaı. Ýnıversıtet ustazdarynyń ishinde Muhtar Áýezovten keıingi máńgilik esinde qalǵany Zeınolla aǵaı edi deı kele, ózi de elý jyl ustazdyq etken Shákeń naǵyz ustazdyń tolyq beınesin Z.Qabdolov bitiminen tabady. “Bolmasań da uqsap baq” dep Abaı atamyz aıtqandaı, jarty ǵasyrlyq ustazdyq ómirinde Muhań men Zekeńniń bilimdarlyǵy men parasattylyǵy, adamgershilik, ustazdyq qasıetterin pir tutyp, maqtanysh etip, sol kisilerge uqsaýǵa umtyldym”, dep jazady. Minekı, Shahma Baımýrzınniń jurt úlgi tutatyn sabyr-salıqasynyń, zııaly-parasatynyń tamyr-tegi qaıda jatqanyn biz endi ańǵarǵandaımyz.
Shákeń úshin qymbatty, biz úshin de aıaýly eki jan bar. Onyń biri – óziniń týǵan inisi, belgili jazýshy, kóp jyldar boıy Kókshetaýdyń oblystyq gazetin basqarǵan, qalam hám qoǵam qaıratkeri, asyl azamat Janaıdar Mýsın. Ekinshisi – ákesi Baımyrzanyń týǵan apasynyń uly, óziniń jıen inisi, elge tanylǵan eleýli jazýshy Mádı Hasenov. Jas kezderinde tálim-tárbıesin bergen, kópten-kóp qamqorlyǵyn jasaǵan. Jazýshy, jýrnalıst bolýlaryna septigi tıgen. Meıirimsiz ajal ekeýin de erte alyp ketti, sóıtip Shákeńniń qos qanatyn qaıyryp, kúızeltip ketti. Aǵamyz sol eki inisin saǵynady. Artta qalǵan ádebı muralaryn jınaqtaı túsýge, er-turmanyn bútindeýge, esimderin el esinde qaldyrýǵa tyrysady. Úlken júrekti sabyr ıesiniń saǵynyshy Kóksheden shyqqan kórnekti aqyn Erkesh Ibrıhımdi de sanattan qaldyrmaıdy. Kókshetaýdan sol Kóksheni ómir baqı jyrlap ótken aqyn atyna bir kóshe berilmeı otyrǵan bezbúırektikke nalıdy. El men jerdiń, til men dildiń basqa da muń-muqtajdaryn áli jetkenshe aıta júredi.
Janaıdar Mýsın qalyptaǵan sóz tirkesine júginip aıtqanda, zerger zerlegendeı Zerendide Baıan Janǵalov, Baımurat Aznabaev, Shaımuqan Imanǵalıev, Oljabaı Nurǵalıev, Turash Isinbaev, Sapar О́teýlın, Telman Muqyshev sııaqty qazynaly qarttar, ata sózin ustaǵan aqsaqaldar baryn alysta júrsek te medet tutatyn jaıymyz da joq emes. Osy toptyń bel ortasynda kókiregine kóp syr túıgen, saǵynysh arqalaǵan sabyr ıesi Shahma Baımyrzauly aǵamyzdyń da aqjoltaı tilekpen amandyqta júrgenine shyn júrekten qýanyshtymyz.
Qorǵanbek AMANJOL.