“Apat aıtyp kelmeıdi” deıdi atam qazaq. Jýyrda Jambyl oblysy aýmaǵyndaǵy 20 adamnyń ómirin qıǵan jol-kólik oqıǵasy osy sózdi eriksiz qınalyspen taǵy bir eske túsirdi. Osyǵan oraı ótken senbide Ishki ister mınıstrliginiń baspasóz qyzmeti BAQ ókilderi úshin arnaıy shuǵyl brıfıng uıymdastyrdy.
– 31 shildede shamamen tańǵy saǵat bes jarymda Merke qalasynan 10 shaqyrym jerdegi Almaty – Tashkent tas jolynyń 339-ynshy shaqyrymynda Shymkent qalasynan Almatyǵa bet alǵan “Mersedes-bens” qalaaralyq avtobýsy “Nort-bens” markaly júk kóligimen soqtyǵysqan. Kólikter soqtyǵysqan kezde órt týyndap, nátıjesinde kólikter tolyǵymen janyp ketken. Oqıǵa ornynda 20 adam, onyń ishinde avtobýstyń 18 jolaýshysy, avtobýs júrgizýshisi jáne júk kóliginiń júrgizýshisi qaıtys boldy. Aldyn-ala derekter boıynsha avtobýsta 49 jolaýshy bolǵan.
Merke aýdandyq ortalyq aýrýhanasyna 23 jolaýshy jetkizilip, olarǵa medısınalyq kómek kórsetildi. Olardyń altaýy, onyń ishinde tórt О́zbekstan azamaty ártúrli dene jaraqattarymen aýrýhanaǵa jatqyzyldy.
Kólik quraldarynyń ıeleri jáne qaıtys bolǵan júrgizýshilerdiń jeke bastary anyqtaldy. Sonymen qatar qaıtys bolǵan jolaýshylardy anyqtaý boıynsha is-sharalar júrgizilip jatyr. Mınıstrlik basshylyǵynyń tapsyrmasy boıynsha IIM Jol polısııasy komıteti tóraǵasynyń mindetin atqarýshy polısııa polkovnıgi Nıkolaı Kalashnıkov osy óńirge attanyp ketti. Qazirgi ýaqytta oqıǵa ornynda Jambyl oblysy IID-niń tájirıbeli qyzmetkerlerinen quralǵan arnaıy tergeý toby jumys isteýde. Jol-kólik oqıǵasynyń sebepteri anyqtalýda. Aldyn-ala derekter boıynsha júk kóliginiń júrgizýshisi rólde qalǵyp ketip, qarsy kele jatqan avtobýspen soqtyǵysqan.
Júrgizilgen taldaýda kórsetilgendeı, tehnıkalyq qaýipsizdikti jáne júrgizýshilerdiń jumys ýaqyty men demalys rejiminiń saqtalýy úshin avtokólik kásiporyndary men júk jáne jolaýshylardy tasymaldaý kólikteri ıeleriniń jaýapkershiligin zańnamalyq deńgeıde kúsheıtý qajet delingen IIM-niń baspasóz qyzmetiniń bergen málimetterinde.
Ábdirahman QYDYRBEK.