Izraıl elshisi Aqtóbede boldy. Aqtóbe oblysynyń ákimi Eleýsin Saǵyndyqov osynda kelgen Izraıldiń Qazaqstandaǵy Tótenshe jáne ókiletti elshisi Israel Meı Amıdi qabyldady.
Ol Qazaqstan men Izraıl arasyn memlekettik jáne óńirlik deńgeıdegi senimdi áriptestik qarym-qatynas baılanystyryp otyrǵanyn atap ótti. О́ńir basshysy buǵan dálel retinde oblysta Izraıldiń tamshylatyp sýarý tehnologııasy engizilip jatqanyn mysalǵa keltirdi. Kezdesý barysynda ekonomıkalyq áriptestiktiń bolashaqtaǵy máseleleri týraly áńgime órbidi. Eleýsin Naýryzbaıuly túıequs ósiretin ferma jaıly aqparatty zeıin qoıa tyńdady. Elshi sondaı-aq “Dostyq” mádenıet úıinde bolyp, “Shalom” evreı qaýymdastynyń ókilderimen kezdesti, olardyń birqatar suraqtaryna jaýap berdi. Qalanyń kórkem jerlerin aralap kórgen qonaq meshit pen shirkeýdi, sýly-jasyl gúlzar ishindegi rotondony tamashalady.
Satybaldy SÁÝIRBAI, Aqtóbe oblysy.
Eldi mekender ataýy ózgertildi. Batys Qazaqstan oblystyq máslıhatynyń kezekti sessııasynda belgili aqyndar Juban Moldaǵalıev pen Qadyr Myrza Áli men ánshi-kompozıtor Eskendir Hasanǵalıevke “Batys Qazaqstan oblysynyń qurmetti azamaty” ataǵy berildi. Sondaı-aq sessııada Zelenov aýdanynyń Kóshim aýyldyq okrýgine qarasty Balagan jáne Stepnoı eldi mekenderiniń ataýyn Jańatań jáne О́rken, al Peremetnyı aýyldyq okrýginde oryn tepken Chernoıarovty Qarajar eldi mekeni dep ózgertý týraly sheshim qabyldandy. Aqjaıyq aýdanynyń Aqsýat aýyldyq okrýgindegi Kamennyı bastaýysh bilim beretin mektep Aqbulaq mektebi degen ataýǵa ıe bolsa, Mergen aýyldyq okrýgindegi Gorıachkın negizgi jalpy bilim beretin mektep Moıyldy mektebi bolyp ózgertildi. Chapaev aýylyndaǵy №1 orta mektepke ushqysh, Keńes Odaǵynyń ári Reseı Batyry Qaıyrbolat Maıdanovtyń, Býdarın aýyldyq mektep-balabaqshasyna Satym Supaldııarovtyń, Taıpaq aýyldyq okrýgine qarasty Krasnoıar aýylyndaǵy orta mektepke Keńes Odaǵynyń Batyry Temir Masınniń esimderi berildi.
Temir QUSAIYN, Batys Qazaqstan oblysy.
Kásibı merekeleri atalyp ótildi. Juma kúni N.Bekejanov atyndaǵy oblystyq qazaq drama teatrynda kólik jáne baılanys qyzmetkerleriniń kásibı merekeleri mereılenip ótkizildi. Saltanatty sharany quttyqtaý sózimen ashqan oblys ákiminiń mindetin atqarýshy Rzaqul Nurtaev osy sala eńbekshileriniń eseli eńbekterimen Syr aımaǵynda serpindi jobalar júzege asyrylyp jatqanyn tilge tıek etti. Kásibı merekede birqatar azamattarǵa oblys ákiminiń Alǵys haty, Kólik jáne kommýnıkasııa mınıstrliginiń Qurmet gramotasy, Azamattyq avıasııa komıteti tóraǵasynyń marapattary tabys etilip, endi birsypyrasyna qurmettilikterin pash etetin tósbelgiler taǵyldy. Kásibı merekelik kesh án-shashý men myń buralǵan bıge ulasty.
Erkin ÁBIL, Qyzylorda.
Dastarqan mázirinde – sary qymyz. Jetisý jerinde halqymyzdyń salt-dástúrin saqtaý men ony jas urpaqqa mura retinde qaldyrý úrdisi berik qalyptasqan. Jaz boıy Taldyqorǵan qalasynda ondaǵan qymyzhana men shubathana tutynýshyǵa minsiz qyzmet kórsetse, bul shara aýdandarda da etek alǵan. Talǵar aýdanynda altyn kún qyzyp, kók kóterilgende sharýa qojalyqtary bıe baılap, adam densaýlyǵyn nyǵaıtatyn sary qymyz sapyryp, dastarhan mázirine usyný dástúri bastalǵan-dy. Qymyzhananyń jańa úlgisin tutynýshyǵa usynǵan “Nurly” ulttyq sýsyndar ortalyǵynyń” qyzmetin aptap ystyqta Almaty men Talǵardyń arasyn jalǵaıtyn kúre joldaǵy jolaýshylar paıdalanyp, shólderin basyp, damyldaıtyn orynǵa aınaldyryp keledi. Qymyz ben shubat ishýge arnalǵan arnaıy oryn aıshyqty bezendirilip, kelýshilerdiń demalýyna jasalǵan jaqsy jaǵdaımen erekshelenedi. Qymyzben birge tutynýshylar et, qýyrdaq, sirne, taǵy basqa dámdi taǵamdaryn, qurt-irimshik, býy burqyraǵan baýyrsaq pen qoıý shaıdy iship, alǵystaryn jaýdyryp attanady. “Dastarhan baılyǵy – denniń saýlyǵy”, degen kásipkerlerdiń bıik talǵamy arqasynda olardyń tabystary da molaıa túsýde.
Kúmisjan BAIJAN, Almaty oblysy.
Jas geologtardyń olımpıadasy. Jýyrda Zyrıan aýdanynyń tabıǵaty tamyljyǵan “Kógildir buǵaz” demalys bazasy mańynda jas geologtardyń tuńǵysh olımpıadasynyń saltanatty ashylý rásimi boldy. Oǵan Indýstrııa jáne jańa tehnologııa mınıstrliginiń Geologııa jáne qazba baılyqtar komıtetiniń tóraǵasy Bolat О́jkenov, Zyrıan aýdanynyń ákimi Ermak Salımov, geologııa salasynyń qyzmetkerleri qatysyp, óz bilimderin kópshilik talqysyna salyp otyrǵan jastarǵa tabys tiledi. Jıynda Premer-Mınıstrdiń orynbasary, Indýstrııa jáne jańa tehnologııalar mınıstri Áset Isekeshevtiń quttyqtaýy oqyldy. Al Tomsk oblysy gýbernatorynyń orynbasary V. Emeshev jas geologtarǵa sát sapar tiledi. Olımpıadaǵa bizdiń elden jeti, Reseıdiń Tomsk oblysynan birneshe komanda qatysyp, geologııa salasyndaǵy bilimderin kópshilik talqysyna usyndy. Dúbirli saıysta jeńimpaz atanǵandarǵa Reseı men Qazaqstandaǵy bilim ordalaryna joldama berildi.
Ońdasyn ELÝBAI, Shyǵys Qazaqstan oblysy, Zyrıan aýdany.
Halyqaralyq djamborı Qostanaıda ótti. Qaratomar sý qoımasyndaǵy tamyljyǵan tabıǵat aıasynda skaýttardyń halyqaralyq “Djamborı-2010” sletiniń alaýy jaǵyldy. Tórt jylda bir ótetin sletke alys jáne jaqyn shetelderden jınalǵan skaýttar toby men jastar birlestikteriniń, Dúnıejúzilik skaýttar qozǵalysy uıymynyń, Qazaqstandaǵy Germanııa, AQSh, Reseı elshilikteriniń ókilderin qostanaılyqtar qonaqjaılylyqpen qarsy aldy. Skaýttar tabıǵat aıasynda túrli kedergilerden ótý jarystaryn uıymdastyrdy. Skaýt qozǵalysynyń problemalaryn ortaǵa saldy, pikir almasty. – Mundaı kezdesýler jastar uıymdarynyń halyqaralyq baılanysyn nyǵaıta túsýmen qatar, jas urpaq boıynda patrıottyq sezimdi tárbıeleýge úlken yqpal etedi, – dedi Qostanaı oblysyndaǵy skaýttar qozǵalysynyń jetekshisi Hamıt Ǵabdýllın.
Názıra JÁRIMBETOVA, QOSTANAI.
Kýrchatovtyq basshy-ǵalymdarmen júzdesti. Elimiz egemendikke qol jetkizgenge deıin keshegi Semeı polıgonynyń ortalyǵy – Kýrchatovtyń bylaıǵy jurtqa esigi jabyq bolatyn. Al qazir kerisinshe, ondaǵy Ulttyq ıadrolyq ortalyqtyń basshy-ǵalymdary Semeıge arnaıy kelip, mundaǵy jýrnalıster qaýymy jáne úkimettik emes uıym ókilderimen júzdesip turýdy dástúrge aınaldyrǵan. Bul jolǵy kezdesýge ondaǵy ǵalymdardy atalǵan ortalyqtyń bas dırektory, akademık Qaırat Kádirjanovtyń ózi bastap keldi. Kezdesý barysynda ortalyqtyń bolashaǵy, jalpy Kýrchatov qalasynyń keleshegi týraly syndarly sóz qozǵalyp, soǵan oraı qoıylǵan suraqtarǵa baıypty jaýap qaıtaryldy. Mazmundy júzdesýge Semeıdegi úkimettik emes uıym prezıdenti, “Semeı-Nevada” qozǵalysynyń vıse-prezıdenti Sultan Kartoev uıytqy boldy.
Dáýlet SEISENULY, SEMEI.
Jazǵy áskerı jıyn. El Qarýly Kúshteri Qurlyqtaǵy áskerleriniń basqarý organdary, quramalary men bólimderiniń jaýyngerlik daıarlyǵy josparyna sáıkes 19 shilde men 27 tamyz aralyǵynda Qurlyqtaǵy áskerlerge qarasty barlaý bólimderi men jasaqtarynyń dalalyq jıyndary ótkizilýde. “Teris Ashybulaq” oqý-jattyǵý ortalyǵynda ótip jatqan bul is-sharanyń basty maqsaty – basqarý organdarynyń úılesimdigin pysyqtaý, jeke quramdardyń kásibı turǵydaǵy tájirıbeligin arttyrý bolyp tabylady. Atalǵan jıyndarǵa Qurlyqtaǵy áskerler Bas qolbasshylyǵy Bas shtabynyń Barlaý basqarmasy tolyq quramynda qatysyp otyr. Sondaı-aq, buǵan О́ńirlik qolbasshylyqtar men Aeroutqyr áskerleri shtabtarynyń barlaý bólimderi jáne qyzmetteri, jeke barlaý batalondary, motoatqyshtar, mehanıkalandyrylǵan, densantty-shabýyldaýshy brıgadalardyń barlaý jasaqtary tartylǵan. Myńǵa tarta barlaýshylardy jınap otyrǵan osy oqý-jattyǵýda jeke, kásibı daıyndyqtar tárizdi pánderge aıryqsha mán berilýde. Atalmysh is-shara sheńberinde túrli jarystar men arnaıy daıyndyqtar ótkizý de keńinen josparlanǵan. Lagerlik jıyndarǵa jalpy jetekshilikti el Qarýly Kúshteri Qurlyqtaǵy áskerler Bas qolbasshylyǵy basqarmasy Bas shtabyndaǵy barlaý basqarmasynyń bastyǵy podpolkovnık B.Jurabaev júrgizýde. Dalalyq jıyndar 23-27 tamyz aralyǵynda “Jaýyngerlik ázirlikti joǵary deńgeıge keltirý. “Barlaý júıesin jetildirý”, osy “Strategııalyq baǵyttaǵy tómen jáne orta áskerı qaqtyǵystaǵy barlaý júrgizýdi uıymdastyrý” taqyrybynda arnaıy operatıvti jattyǵý-oıyndarymen jalǵasyn tappaq, dep habarlady Qorǵanys mınıstrliginiń baspasóz qyzmeti.