...qalalyq fılıalda qoǵamdyq tyńdaý ótti
“Nur Otan” halyqtyq-demokratııalyq partııasy qalalyq fılıalynyń uıymdastyrýymen “Jol kartasy” – halyq senimi” taqyrybynda qoǵamdyq tyńdaý ótti. Onda Elbasynyń tapsyrmasymen qarjy daǵdarysynyń aldyn alý maqsatyndaǵy “Jol kartasy” baǵdarlamasy boıynsha ótken jyly bólingen 3 mlrd. teńgeden astam qarjyny ıgerý nátıjesi qorytyndylandy.
Taldyqorǵannyń kórikti kelbetin saqtaý jáne abattandyrý jumystary úzdiksiz jalǵasýda. Baǵdarlama aıasynda aǵymdaǵy jyly bıýdjetten 1 mlrd.95 mln. teńge bólinip, turǵyn-úı kommýnaldyq sharýashylyǵy, jylýmen qamtý, kanalızasııa jelilerin, jol jóndeý, bilim, densaýlyq saqtaý, sport, mádenıet salalary boıynsha 15 joba qolǵa alynyp, merdigerler osy baǵyttaǵy jumystaryn uqypty júrgizip keledi.
Jobany júzege asyrýda myńǵa tarta adam jumyspen qamtylyp, 103 adam qosymsha mamandyq alý úshin qaıta oqytylýda. Qoǵamdyq tyńdaý barysynda partııalyq baqylaý postarynyń jumysy joǵary baǵalanyp, keıbir máselelerdi áli de tııanaqtaý qajettigi atap kórsetildi.
Kúmisjan BAIJAN, Almaty oblysy.
...uıym tóraǵasy esep berdi
Batys Qazaqstan oblystyq ardagerler uıymynyń plenýmy bolyp, onda uıym tóraǵasy Maqsot Batyrov esep berdi.
Jıyn Uly Jeńistiń 65 jyldyǵyn merekeleýdiń qorytyndylaryna arnaldy.
Oblystyq ardagerler keńesiniń tóraǵasy M.Batyrovtyń aıtýynsha, oblysta 71832 zeınetker bar, onyń 666-sy Uly Otan soǵysynyń ardagerleri, 240-y soǵys múgedegi. Uly Jeńistiń 65 jyldyǵyna oraı 240 páterlik jańa úıden 89 soǵys ardageri men olardyń jesirlerine páter berildi jáne aýdandardaǵy 24 soǵys ardageri jańa úıge qonystandy. Sondaı-aq, aýdanda turatyn 48 ardagerdiń úıi jóndelip, 41-iniń úıine kógildir otyn, 39-yna sý kirgizildi.
Tóraǵa sondaı-aq Uly Otan soǵysyna qatysqan batyrlardyń esimi kóshelerge berilip, aýqymdy merekelik sharaǵa oraı ardagerlerge Úkimet tarapynan bar syı-sııapat jasalǵanyn atap ótti.
Taǵy bir jaǵymdy jańalyq, oblys ortalyǵy men aýdandarda aldaǵy jyly ardagerler úıi ashylatyn bolady. Bul másele oblys ákimi tarapynan tolyq qoldaý tapqan.
Temir QUSAIYN, Batys Qazaqstan oblysy.
...Jańa juldyz aýyly mereke ótkizdi
Oblystaǵy Jelezınka atalatyn aýdannyń aýyldary endi attaryn ózgertip, baıyrǵy ataýlaryna nemese jańa ataýlarǵa ıe bolýda. Novokýzmınka degen atymen qoshtasqan sondaı aýyldardyń biri Jańa juldyz dep atalady. Aıtsa aıtqandaı, aýyl úshin jańa ómir, jaqsylyq bastalǵandaı.
Osy merekeni sporttyq shara barysynda atap ótý úshin aýdannyń barlyq aýyldyq aýmaqtarynan, kórshiles Esqara, Ekishoqy aýyldarynan kelgen sportshylar Jańa juldyz aýylyna jınaldy. Osy jerde alaý jaǵylyp, aýdandyq XX spartakıada ótti. Alaý jaǵý qurmetine aýdannyń ataqty sportshysy Rýslan Kamal ıe boldy. Sportshylar ulttyq sport oıyndary – qazaqsha kúres, aýdaryspaq, toǵyzqumalaqpen qatar, voleıbol, fýtbol, shahmat, jeńil atletıka sııaqty sport túrleri boıynsha synǵa tústi.
Farıda BYQAI, Pavlodar oblysy.