“Nur Otan” HDP Parlamentarızm ınstıtýty “Ideıa plıýs” qoǵamdyq qorymen birlesip “Oralmandar: qonys aýdarý jáne beıimdelý problemalary” taqyrybynda dóńgelek ústel ótkizdi. Maqsat – qandastarymyzdyń atajurtyna oralýy men olardyń tarıhı Otanyna beıimdelýindegi máselelerdi talqylaý. Oǵan “Nur Otan” HDP basshylyǵy, Parlament depýtattary, Qazaqstan halqy Assambleıasynyń ókilderi, QR Adam quqyqtary jónindegi ulttyq ortalyǵynyń tóraǵasy, QR Prezıdenti Ákimshiliginiń ókilderi, Kóshi-qon jónindegi halyqaralyq uıymnyń, sondaı-aq, úkimettik emes uıymdardyń ókilderi men ǵalymdar qatysty.
Dóńgelek ústel otyrysyna qatysýshylar oralmandarǵa qoldaý kórsetý jáne etnostyq kóshi-qondy retteý salasyndaǵy memlekettik saıasatty, osy saladaǵy quqyqtyq bazany jetildirý máselelerin qarastyrýdy basty nazarǵa ala otyryp, oralmandardy kiriktirý men olardy qolaıly beıimdeýdiń tıimdi joldaryn qarastyrdy. “Qazaqstan oralmandar odaǵy” respýblıkalyq qoǵamdyq birlestiginiń tóraǵasy Artyqbaı Úkibaıuly “Kóshi-qon saıasatyn qalyptastyrýdaǵy azamattyq qoǵamnyń róli” atty baıandamasynda oralmandardyń búgingi basty máselelerine jeke toqtaldy. “Oralmandardyń jaǵdaıy jalpy jaman emes. Oralmandar máselelerin sheshý úshin elimizde olardy ýaqytsha ornalastyratyn 14 ortalyq jumys isteıdi. Olar quqyqtyq máseleler boıynsha konsýltasııa berý, qazaq jáne orys tilderin úıretý, kásibı daıyndyq, qaıta daıarlaý jáne biliktilikti arttyrý jumystarymen aınalysady. Sonymen qatar, oralmandarǵa qazaqstandyq azamattyqty berý rásimderi jeńildetildi, olarǵa ózderi kelgen eliniń azamattyǵynan shyǵý talap etilmeıdi”, – dep óz oıyn qorytyndylady.
Esterińizge sala keteıik, 2009-2011 jyldarǵa arnalǵan “Nurly kósh” memlekettik baǵdarlamasyna sáıkes, oralmandardyń turǵyn úı máselesin sheshý úshin bıýdjet esebinen 7,2 mlrd. teńge qarajat bólinse, 9,164 mlrd. teńgemen nesıelendirý qarastyrylǵan bolatyn. Sonymen qatar, árbir otbasynyń kóshýi men júkterin tasymaldaýyna ketetin shyǵyndardy óteý úshin birjolǵy járdemaqy bólinedi. Medısınalyq qyzmet, bilim alý, jumysqa ornalasý jaıy da kózdelgen.
Dóńgelek ústel etnostyq kóshi-qon jáne oralmandardyń tarıhı Otanyna beıimdelý máselelerin sheshýdiń yqtımal joldaryn talqylaýǵa múmkindik berdi. Otyrys qorytyndysy boıynsha, qazaqtardy atajurtqa kóshirý jáne olardyń qazaqstandyq qoǵamǵa kirigýi salasyndaǵy ahýaldy jaqsartý jóninde memlekettik organdar men azamattyq qoǵam ınstıtýttaryna arnalǵan usynystar taldandy.
Juldyz BAIDILDA, EUÝ stýdenti.