Ata zańǵa arnalǵan shara

Qazaqstan Respýblıkasy Konstıtýsııasynyń 15 jyldyǵyna arnalǵan sharany uıymdastyrýǵa Aqtóbe memlekettik pedagogıkalyq ınstıtýty uıytqy boldy. “Ata Zań – el damýynyń berik irgetasy” atty dóńgelek ústel basyndaǵy áńgimege oblystyq ákimdiktiń, quqyq qorǵaý organdarynyń,  “Nur Otan”HDP oblystyq fılıalynyń, buqaralyq aqparat quraldarynyń basshylary men ókilderi jáne qaladaǵy joǵary oqý oryndarynyń ǵalymdary, stýdentteri shaqy­ryldy. Dóńgelek ústeldi qysqasha ki­rispe sóz sóılep ashqan osy ınstı­týttyń rektory, ekonomıka ǵy­lym­darynyń doktory Ǵalymjan Nuryshev elimizdiń Ata Zańynyń qoǵamdyq damýdaǵy  orny  men ma­ńyzyna toqtaldy. Belgili qoǵam qaıratkeri, fılosofııa ǵylym­dary­nyń doktory Amangeldi Aı­taly Qazaqstan Respýblıkasy Konstıtýsııasynyń negizderi jáıli  tarata áńgimeledi.Ol Ata Zańy­myz­dyń elimizdegi adam quqyǵy men bas bostandyǵyna kepildik beretin, turaqtylyq pen dostastyqqa, ekonomıkalyq damýǵa alǵyshart jasaıtyn basty qujat bolyp tabylatynyn  jetkizdi.Qazaqstan Respýblıkasynyń Konstıtýsııasy jáıli kelisti áńgimeni “Nur Otan” HDP oblystyq fılıalynyń tóraǵasy, oblystyq máslıhattyń hatshysy Balǵalı Ordabaev, peda­gogıka ǵylymdarynyń kandıdaty Nıetjan Berikov, osy ınstıtýttyń tilderdi damytý basqarmasynyń bastyǵy Gúlshat Saparqyzy jáne basqalary óz oı-pikirlerimen tolyqtyryp, keńeıte  tústi. “Qos shynar” qoǵamdyq qaıyrymdylyq qorynyń tóraǵasy Ǵalymjan Baıderbestiń ár adamnyń Ata Zańymyzben qatar, memlekettik rámizderdi qadirlep, qaster tutýy kerektigi jáıli oıy da jınalǵandar kóńilinen shyqty. Dóńgelek ústelge qatysýshylar  elimizdiń qoldanystaǵy Ata Zańy­nyń erekshelikterine toqtalyp, basqa memleketterdiń Konstıtý­sııa­laryna uqsamaıtyn artyqshy­lyq­taryna baılanysty dáıekti oılaryn ortaǵa saldy. Ata Zańy­myzdyń ózge elderdiń Konstı­tý­sııalarynyń kóshirmesi emes eken­digine, halyqaralyq standarttarǵa saı keletinine dálel-dáıekter keltiredi. Satybaldy SÁÝIRBAI. Aqtóbe oblysy.