Qaratóbedegi jańa mektep-gımnazııa. Qaratóbe aýdany ortalyǵynda 100 oryndyq ınternatymen birge, 300 oryndyq jańa mektep-gımnazııa ǵımaraty paıdalanýǵa berildi.
Onyń ashylý rásiminde oblys ákiminiń orynbasary Serik Súleımen Elbasy tapsyrmasyna sáıkes jańa bilim ǵımaratynyń ashylyp otyrǵanyn aıtyp, mektep-gımnazııaǵa “GAZel” avtokóligin tartý etti. “Altaır” JShS salǵan mektep-gımnazııa qurylysyna 800 mıllıondaı teńge jumsalǵan. 300 adam jumysqa tartylsa, 100-i – jergilikti turǵyndar. Negizinen bir jylǵa josparlanǵan jumys segiz aıda aıaqtalǵan. Zamanaýı úlgide salynǵan jańa bilim ordasyna 250 bala qabyldansa, onyń 20-sy shaǵyn ortalyqqa, 20-sy mektepaldy daıarlyqqa barmaq. Mundaǵy búldirshinder bolashaqta ystyq tamaqpen qamtylatyn bolady.
Temir QUSAIYN, Oral.
Qaıyrymdylyq aksııasy jalǵasty. Byltyr “Mektepke jol”, “Asar” respýblıkalyq qaıyrymdylyq sharalary barysynda oqýshylarǵa 46,9 mıllıon teńgeniń oqý quraldary men kıim-keshekteri áperilse, bıyl da jan-jaqty kómek jasaý qarastyryldy. Aksııalar aıasynda 900-deı reıdter uıymdastyrylyp, az qamtylǵan, kóp balaly otbasylardyń, tártibi men oqý-úlgerimi tómen jasóspirimderdiń esebi alyndy. Bir myńnan astam balaǵa oqý quraldary syıǵa tartyldy. Mekeme-uıymdar 73 oqýshyny óz qamqorlyqtaryna alatyn boldy. Osynaý ıgi iske “Nur Otan” HDP jergilikti fılıaly da belsene atsalysty. Máselen, “Jas Otan” jastar qanaty 10 oqýshyǵa kómektesýdi óz mindetine aldy. Al, “Qaryndash”, “Shkolnık”, “Abdı-kompanııa” sekildi kitap dúkenderi jármeńkeler ótkizip, óz ónimderin arzan baǵaǵa usyndy. Demeýshiler qatarynda “Fregat”, “Sultan”, “Maslodel”, taǵy basqa fırmalar bar.
О́mir ESQALI, Soltústik Qazaqstan oblysy.
Aıqasqan qushaqtar quryshtaı berik. Oblystaǵy etno-mádenı ortalyqtar Konstıtýsııa kúni merekesin birge atap ótýdi berik úrdiske aınaldyrǵan. Osymen 15-shi ret dástúrli festıvalǵa jınalǵan olar Stanıslavskıı atyndaǵy orys drama teatry sahnasynan óz ulttarynyń ánin shyrqap, bıin bılep, salt-ǵuryptaryn kórsetip, kelýshilerdi ásem áserge bóledi. Ata Zańnyń qabyldanýymen tuspa-tus dúnıege kelgen bul óner baıqaýyna qatysýshylar bastapqyda sanaýly ǵana bolsa, osy joly qatary 27-ge jetti. Ásirese, Abaı, Buqar jyraý, Nura aýdandary ónerpazdary kózge tústi. Festıval meımandary sondaı-aq túrli etnostar ókilderiniń shyǵarmashylyq izdenisterin qyzyqtaýmen qosa, “Dostyq shańyraǵy” taqyrybynda uıymdastyrylǵan jármeńkege qoıylǵan ulttyq qolóner, taǵam úlgilerimen tanysty.
Aıqyn NESIPBAI, Qaraǵandy.
Búldirshinderdiń sıqyrly álemi. Oblys ortalyǵyndaǵy Turar Rysqulov atyndaǵy demalys saıabaǵynda oblystyq tótenshe jaǵdaılar departamenti qyzmetkerleriniń balalary men nemereleriniń asfalt betine salǵan sýretteri boıynsha konkýrs bolyp ótti. Konkýrs taqyryby da sábıler úshin erekshe qyzyqty – Ata Zań aıasynda dep ataldy. Konkýrsqa qatysqan árbir búldirshin óz qııalyndaǵy atajurty – qazaq elin ár qyrynan beınelegen. Sondyqtan asfalt ústine túrli-tústi bormen salynǵan aıshyqty beınelerden olardyń Otan-anasyna degen júrekjardy sezimderi anyq ańǵarylyp turdy. Balalar, ásirese, záýlim ǵımarattar, aǵylǵan avtokólikter, sondaı-aq, jasyl jaılaý men aqshańqan kıiz úı, aspan astynda qalyqtaı qanat qaqqan qyran sııaqty sýretterdi salǵandy unatady eken.
Kósemáli SÁTTIBAIULY, Jambyl oblysy.
Semeı aldyńǵy qalalar qatarynda. Jýyrda respýblıkalyq dárejedegi quzyrly organdar ústimizdegi jyldyń alǵashqy jartyjyldyǵynyń qorytyndysyn shyǵardy. Onda bıýdjettiń oryndalýy, jumyssyzdyq deńgeıiniń tómendep, jańadan jumys oryndarynyń ashylýy, biryńǵaı ulttyq testileý nátıjesi sekildi 25 basty kórsetkish negizge alyndy. Sol boıynsha Semeı qalasy Aqtóbe, Pavlodar, Taldyqorǵan, Oral, Atyraý, Qyzylorda sekildi oblys ortalyqtary qatarynda birinshi kategorııaǵa, ıaǵnı damý qarqyny joǵary qalalar qataryna ótkizildi. Semeıdiń osymen ekinshi ret aldyńǵy qalalar qatarynan tabylýy, árıne, súısinerlik jáıt. Otanymyzdaǵy barlyǵy 200-deı qalanyń ishinen top jarý Semeıdiń bolashaǵynan úlken úmit kúttirse kerek.
Dáýlet SEISENULY, Semeı.
Soltústik munaıshylar mereıtoıy. Oblys ortalyǵynda ornalasqan “QazTransOıl” aksıonerlik qoǵamynyń Batys Sibir jáne Qazaqstan munaıyn qubyr arqyly tasymaldaıtyn Shyǵys fılıalyn elimizdegi osy salanyń júregi dep te ataıdy. Sonymen qatar, bul bólimshe elimizdiń ishki naryǵyndaǵy Pavlodar, Shymkent munaı óńdeý zaýyttaryna úzdiksiz jiberiletin munaı tasymalymen aınalysady. О́tken aptada munaıshylar oblys ortalyǵyndaǵy keń saraıda qubyrmen munaı tasymaldaý salasynyń 75 jyldyq mereıtoıyn atap ótti. Jınalǵandardy oblys ákimi Baqytjan Saǵyntaev quttyqtady. Merekege osy salada eńbek etken aǵa urpaq ókilderi, búgingi jas mamandar qatysty. Munaıshylar alǵys hattarmen, syılyqtarmen marapattaldy. Kesh sońy Roza Rymbaevanyń konsertine ulasty.
Farıda BYQAI, Pavlodar.
Eki sýburqaq iske qosyldy. О́skemende qala merekesi qarsańynda taǵy eki sýburqaq paıdalanýǵa berildi. Onyń biri – Ertis ózeni jaǵalaýynda, al ekinshisi Úlbi kópiri ústinde ornalasqan. Jaqyn arada taǵy eki sýburqaq iske qosylmaq. Qazir óskemendikter qyrkúıektiń 6-7-sinde Qazaqstan men Reseı basshylarynyń qatysýymen ótetin ózara yntymaqtastyq forýmyna ázirlikterin aıaqtap qaldy. Qala kóshelerine asfalt tóselip, ózge de jóndeý jumystary júrgizildi. N.Nazarbaevtyń ıntellektýaldy mektebi de saltanatty jaǵdaıda ashyldy. 250 oryndyq balabaqsha qala turǵyndary demalatyn oryndar da óz esigin aıqara ashty.
Ońdasyn ELÝBAI, О́skemen.