“Báıterek” monýmentiniń janynda Konstıtýsııanyń 15 jyldyǵyna oraı “Astana v obektıve – Astananyń aıshyqty kórinisteri” atty talantty jas fotosýretshilerdiń kórmesi ótti. “Altyn kún” qoǵamdyq qorynyń uıymdastyrýymen ótken bul kórmege jeti fotosýretshiniń 62 jumysy qoıyldy.
Sharanyń basty maqsaty – Elbasy N.Nazarbaevtyń 2010 jylǵy Joldaýyna sáıkes shyǵarmashyl jastardyń eńbekterin kórsetip, olarǵa qoldaý bildirý. Konstıtýsııanyń 15 jyldyǵyna oraı arnaıy uıymdastyrylyp otyrǵan atalmysh is-sharanyń mańyzy erekshe. Kórmege qoıylǵan talantty fotosýretshilerdiń basty taqyryby – ásem Astananyń záýlim ǵımarattary, Esil boıynan oryn tapqan tańǵajaıyp saıabaqtar, qala turǵyndary men jalyndaǵan armanshyl jastardyń fotosýretteri.
“Atalmysh sharany uıymdastyrý úshin osydan bir aı buryn jas fotosýretshilerge arnalǵan konkýrs jarııalaǵan bolatynbyz. Konkýrs nátıjesinde bizge 300-den asa fotosýret kelip tústi. Osylardyń ishinde eń sapaly ári kásibı turǵyda baǵalanǵan fotosýretterdi biz búgin sizderdiń aldaryńyzǵa qoıyp otyrmyz. Bul oraıda bizdiń ustanǵan baǵytymyz – talantty jastardyń jumysyn keń aýdıtorııaǵa pash etý”, –deıdi “Altyn Kún” qoǵamdyq qorynyń prezıdenti Erkebulan Kenjebolatov.
Aıta keteıik, “Altyn Kún” qoǵamdyq qorynyń bul kúngi qoldanystaǵy jobalary shyǵarmashyl jastar aýdıtorııasyna arnalǵan. Elordamyzdyń shyǵarmashyl jastarynyń bul eńbekterin qala turǵyndary men qonaqtary tamashalady. Kórme bir apta boıyna jalǵasyp, apta sońynda jas fotosýretshilerge uıymdastyrýshylar tarapynan dıplomdar beriledi dep josparlanyp otyr.
Juldyz BAIDILDA, Eýrazııa ulttyq ýnıversıtetiniń stýdenti.