Elbasy óziniń halyqqa Joldaýynda buqaralyq sport pen týrızm salasyn damytýǵa erekshe mán bergeni belgili. Osyǵan oraı Mádenıet mınıstrligi Joldaýdaǵy negizgi basymdyqtar men tapsyrmalardy túsindirý boıynsha úkimettik emes uıymdar arasynda memlekettik satyp alý baıqaýyn uıymdastyrǵandy.
Atalǵan baıqaý jeńimpazdarynyń biri – “Qazaqstannyń sport odaǵy” zańdy tulǵalar birlestigi salamatty ómir saltyn nasıhattaý jáne týrızmdi, buqaralyq sportty damytý salasyna qatysty Joldaýdaǵy basymdyqtardy túsindirý is-sharalaryn jan-jaqty júrgizý ústinde. Osy rette “Qazaqstannyń sport odaǵy” ZTB sport ınjınırıngi salasynda jumys isteıtin kompanııalar tobynyń bastamasymen ótken jyly ómirge kelgendigin aıta ketý kerek. Mine, bul baǵytta da júıeli jumysymen tanylǵan “Nur Otan” halyqtyq-demokratııalyq partııasy da el turǵyndary arasynda sportty damytýdy nasıhattap júr.
“Nur Otan” HDP Ortalyq apparatynyń baspasóz ortalyǵynda jobanyń júzege asyrylýyna oraı “Qazaqstan Respýblıkasynda buqaralyq sport pen týrızmdi damytý” taqyrybynda ótken baspasóz máslıhatynda osy másele jan-jaqty áńgime ózegine aınaldy. Oǵan “Qazaqstan sport odaǵy” zańdy tulǵalar birlestiginiń atqarýshy dıreksııasynyń tóraǵasy Erlan Janǵulov, “Nur Otan” HDP Ortalyq apparaty Saıası jumys departamentiniń dırektory Pavel Kazansev qatysty.
Joba elimizdiń barlyq óńirlerindegi turǵyndardyń salamatty ómir saltyna jáne sportqa degen kózqarasyn aıqyndaýdy kózdeıdi. Sondaı-aq buqaralyq sporttyń damýy men sporttyq ınfraqurylymnyń jaǵdaıyna qatysty keshendi zertteýler júrgizý josparlanǵan. Budan basqa aımaqtardaǵy týrızm salasyndaǵy jaǵdaıdy zardeleýge arnalǵan zertteýler oryn alary da belgili bolyp otyr.
Taǵy bir belgili bolǵany, joba qorytyndysy boıynsha Astana qalasynda respýblıkalyq semınar ótedi. Onda elimizdiń barlyq aımaqtarynda ótkizilgen is-sharalar qorytyndysy shyǵarylyp, sportty damytý tájirıbeleri ekshelip, usynystar ázirlenedi jáne naqty tetikter talqylanatyn bolady.
Asqar TURAPBAIULY.