Elordanyń “Rixos” qonaq úıinde “Abyroı” qazaq mádenıeti men tilin damytý korporatıvtik qory veb-saıtynyń jáne “Qazaq tili”, “Kazakh language. Made easy” qazaq tilin eýrostandart boıynsha oqytýǵa negizdelgen oqý-ádistemelik kesheniniń tusaýkeser rásimi bolyp ótti.
Bes deńgeıden turatyn oqýlyq kesheniniń quramynda oqýlyq, muǵalimge arnalǵan ádistemelik qural, oqýshyǵa arnalǵan tapsyrma dápteri jáne CD tabaqshasy bar. “Qazaq tili”, “Kazakh language. Made easy” qazaq tilin eýrostandart boıynsha oqytýǵa negizdelgen oqý-ádistemelik keshenniń ereksheligi sol, siz qazaq tilin dúnıe júzi moıyndaǵan standart negizinde tez meńgere alasyz. Standart avtorlary Van Ek jáne Djım Trım syndy belgili til mamandary bolyp tabylady. Álemge keń taralǵan aǵylshyn, fransýz, qytaı, ıtalıan, nemis, orys tilderi de atalmysh standart boıynsha oqytylady” deıdi joba uıymdastyrýshylary.
Bul jobanyń jetekshisi, “Abyroı” qorynyń dırektory Bıbigúl Jeksenbaıdyń pikirinshe, til úırenýdiń eń ońaı tásili – tildiń tól tabıǵatyn túsiný. Eresekter men balalarǵa arnalǵan bul oqý kesheni memlekettik tildi orys jáne aǵylshyn tilderi arqyly oqyp meńgerýge tolyq múmkindik beredi.
Alǵashqy taralymy 1000 danadan turatyn oqytý kesheniniń ekinshi bóliminen bastap barlyq tapsyrmalar men mátinder tek qazaq tilinde beriledi. Sebebi, úırenýshi ol ýaqytqa deıin, ıaǵnı 15 sabaqtan soń qazaq tilin erkin túsine alatyn deńgeıge jetedi.
Al endi “Abyroı” saıty týraly bir aýyz sóz. Bul saıttyń bir ereksheligi – qazaq halqynyń mádenıeti men salt-dástúri týraly tolyq maǵlumattar qazaq, orys, aǵylshyn tilderinde taralady. Saıtqa kire otyryp, qazaq tilin úırenýge arnalǵan birneshe ádistemelerdiń jıyntyǵymen de tanysýǵa bolady. Saıttyń elektrondyq meken-jaıy www.abyroi.kz.
Araı ÚIRENIShBEKQYZY.