Ádilet mınıstrliginiń Zııatkerlik menshik quqyǵy komıteti Qaraǵandy oblysynyń ádilet departamentimen birigip, Qaraǵandy qalasynda “Avtorlyq jáne sabaqtas quqyqtardy qorǵaýdyń keıbir máseleleri” taqyrybynda óńirlik semınar ótkizdi.
Semınar jumysyna quqyq qorǵaý, keden, ádilet organdary men jergilikti atqarýshy organdardyń jáne qoǵamdyq uıymdardyń ókilderi, quqyq ıelenýshiler, sondaı-aq avtorlyq quqyq pen sabaqtas quqyqtar obektilerin paıdalanýshylar qatysty.
Semınardyń maqsaty ǵylym, ádebıet jáne óner týyndylaryn kommersııalyq negizde paıdalanatyn tulǵalardyń quqyqtyq sana deńgeıin arttyrý, sondaı-aq avtorlyq jáne sabaqtas quqyqtardy qorǵaýdyń ózekti máselelerin sheshý jolynda turǵan kedergilerdi anyqtaý boldy.
Zııatkerlik menshik quqyǵy komıteti tóraǵasynyń orynbasary Sh.Ábdireeva atap ótkendeı, biz jańa tehnologııalar aqparatty taratýǵa jańa múmkindikter beretin jańa ǵasyrda ómir súremiz. О́kinishke qaraı, osy tehnologııalardy paıdalanǵan kezde avtorlardyń quqyqtaryna qysym jasaý faktileri oryn alýda. Eń durysy – týyndy kópshilik qaýymǵa kishkentaı shyǵynǵa jáne qysqa merzimde qoljetimdi bolatyn avtorlyq quqyq obektilerin aqparattyq aǵynda paıdalaný.
Halyqaralyq sharttar men kelisimder avtorlyq quqyq salasyndaǵy Qazaqstannyń mindetterin kózdeıdi. Osyǵan oraı, bizdiń aldymyzda turǵan mindet – týyndylarǵa quqyqtardy tıimdi qorǵaýdy qamtamasyz etip, quqyq ıelenýshiler men paıdalanýshylar arasynda órkenıetti qarym-qatynas qurýǵa yqpal jasaý.
Semınarǵa qatysýshylar ózderin tolǵandyryp júrgen suraqtarǵa tolyq jaýap aldy, sondaı-aq ǵylym, ádebıet jáne óner týyndylaryna avtorlardyń quqyqtaryn qamtamasyz etý máselelerinde odan ári yntymaqtastyqty nyǵaıtý joldaryn belgiledi.
“Egemen-aqparat”.