...Kóldi aýylynda meshit ashyldy
Qasıetti Ramazan aıy aıaqtalar tusta Eńbekshiqazaq aýdanyndaǵy Teskensý aýyldyq okrýgine qarasty Kóldi aýylynda jańa meshit ashylyp, bul úderis halyqtyń dinimizge degen aq nıetimen astasty. Tek jaqsylyqqa úndeıtin, adamı qaǵıdattardy ýaǵyzdaıtyn ıslamnyń shapaǵatty shańyraǵy sanalatyn meshittiń aýyl turǵyndarynyń uıytqysymen salynǵany qýantady.
Kóldi aýyly sońǵy jyldary qanatyn keńge jaıyp, mádenıet úıi men jańa mektep, halyqqa qyzmet kórsetetin oryndar salyndy. Bardy baǵalaǵan kóldilikter aǵa, jas urpaqty ımandylyqqa úndeıtin Allanyń úıi qajettigin túsinip, biri – qarjysymen, biri eńbegimen atsalysyp, jańa meshittiń kók kúmbezin kókke kóterdi. Taǵy bir qýanyshtysy – aýyl turǵyny, kásipker Andreı Lavrentev qurylysqa qomaqty qarjy qosýmen birge, aýyldastaryn ımandylyqqa bet burýǵa shaqyrǵanyn aıtqan jón.
Jıynnan soń árýaqtarǵa arnap as berilip, dinimizdi ýaǵyzdaıtyn ánder shyrqaldy.
Kúmisjan BAIJAN, Almaty oblysy.
...shtabtyń kezekti májilisi ótti
Qaraǵandy oblystyq kásipodaqtar federasııasynyń uıytqy bolýymen jyl basynan beri kásiporyndar men mekemeler arasynda “Ujymdyq shart bekitińiz” degen taqyrypta shara ótkizilip keledi. Salalyq 11 kásipodaqty, sonyń ishinde “Arselor Mıttal Temirtaý” kompanııasy janyndaǵy kenshilerdiń “Qorǵaý”, metallýrgterdiń “Jaqtaý”, “Qazaqmys” korporasııasyndaǵy kásipodaq uıymdaryn biriktirgen bul federasııamen búginde 1350 ujymdyq shart jasalǵan.
Alaıda ózara yntymaqtastyqqa qulyqsyz eńbek býyndary da joq emes. Ásirese, olar shaǵyn jáne orta bıznes ortasynda jıi kezdesedi. Atalǵan aksııanyń negizgi maqsaty da syrt qaraýshylardy qatarǵa tartyp, eńbekkerler múddesin búkil salada qorǵaýdy qamtamasyz etýge arnalǵan. Ol oıdaǵydaı iske asyrylýda. Aksııa kezinde 19 uıym ujymdyq shart bekitýge tartyldy.
Aıqyn NESIPBAI, Qaraǵandy.
...memorandýmǵa qol qoıyldy
Keshe Aýyl sharýashylyǵy mınıstrligi, “QazAgro” Holdıngi” AQ, “Qazaqstan astyq odaǵy” zańdy tulǵalar birlestigi, “Qazaqstannyń astyqty qaıta óńdeýshiler jáne nan óndirýshiler odaǵy” zańdy tulǵalar birlestigi jáne oblys ákimdigi arasynda Jambyl oblysyn azyq-túliktik bıdaımen qamtamasyz etý sharalary jónindegi memorandýmǵa qol qoıyldy.
Bıyl Jambyl oblysy boıynsha 364,6 myń tonna astyq alyndy. Onyń ishinde bıdaı 232,0 myń tonnany quraıdy. Osy astyqtan oblystyń bir jyldyq ishki qajettiligi úshin 120,7 myń tonna azyq-túliktik bıdaı jáne 30,0 myń tonna tuqymdyq bıdaı jasaqtalady. Degenmen, ol astyqtyń bári sharýashylyqtardyń qolynda.
Sondyqtan, Ekonomıkany jańǵyrtý máseleleri jónindegi memlekettik komıssııasy májilisiniń qorytyndysyna sáıkes, “Azyq-túlik kelisim-shart korporasııasy” Ulttyq kompanııasy” AQ ishki astyq rynogyn jáne nannyń baǵasyn turaqtandyrýdy qamtamasyz etý úshin bıylǵy ónimnen respýblıka boıynsha 2,0 mln. tonnaǵa deıingi kólemde azyq-túliktik bıdaı satyp alatyn bolyp sheshildi. Jambyl oblysy boıynsha azyq-túliktik bıdaı satyp alý kvotasy 33,7 myń tonnany quraıdy.
Kósemáli SÁTTIBAIULY, Jambyl oblysy.