Keshe Memleket basshysy Nursultan Nazarbaev “Samuryq-Qazyna” Jyljymaıtyn múlik qory” AQ-qa tıesili “Severnoe sııanıe” jáne “Izýmrýdnyı kvartal” turǵyn úı-ákimshilik keshenin aralap kórdi. Ekeýi de Astanadaǵy qurylys nysandaryn aıaqtaýdyń daǵdarysqa qarsy memlekettik baǵdarlamasy sheńberinde qarjylandyrylǵan.
Memleket basshysy Nursultan Nazarbaev Astananyń órkendep, gúldenýin erekshe óz baqylaýynda ustap keledi. Kóptegen nysandardyń paıdalanýǵa berilýine oraı arnaıy baryp jaqyn tanysýy da sondyqtan. Esildiń sol jaǵalaýynan oryn tepken ózindik sáýlet úlgisi bar “Soltústik shuǵylasy” turǵyn úı keshenimen tanysyp shyqqan Elbasy onyń qurylysyna oń baǵa berdi. Qurylysty júrgizgen elimizge belgili “Bazıs-A” kompanııasy.
Biz sál erterek kelip, Elbasynyń kelýin tolqı ári taǵatsyzdana kútip turǵan “Bazıs-A” kompanııasynyń basshysy Aleksandr Belovıchti sózge tartqan edik. Ol óz kompanııasynyń Astana men Almaty qalalary jáne Ońtústik Qazaqstan men Mańǵystaý oblystarynda qurylys júrgizip kele jatqandyǵyn tilge tıek ete kelip, daǵdarys bastalǵaly beri 2 jyl boıy jańa nysandar qurylysyn bastamaǵandyqtarymen bólisti. Tek bıyl ǵana, ıaǵnı jaǵdaıdyń turaqtanýyna oraı jańa qurylystar qolǵa alynady, deıdi kompanııa basshysy. Onyń aıtýynsha, rynokta joǵary synypty páterlerge degen suranys joǵary, sondyqtan da qurylys jumystary jalǵasyn tabatyn bolady.
Turǵyn úı kesheniniń aıaqtalýyn qarjylandyrý týraly kelisim osydan eki jyl buryn Jyljymaıtyn múlik qorymen jasalǵan-dy. Sonyń negizinde “Soltústik shuǵylasy” turǵyn úı keshenindegi qurylysty aıaqtaý úshin 2 mıllıard teńgeden astam qarjy jumsalǵany belgili bolyp otyr. Bılep turǵan turǵyn úıler keıpinde salynǵan keshen úsh negizgi ǵımarattan jáne astyńǵy qosarlanǵan ortaq ǵımarattan turady. Munda negizinen negizgi ınfraqurylym shoǵyrlanǵan. Iаǵnı, turǵandar dalaǵa shyqpaı-aq sán salonyna, sportzalǵa, basseınge bara alady. Sondaı-aq balalardy qaraýǵa qaldyratyn oryn da bar. Erekshe úlgidegi “bıshi” ǵımarattardan turatyn keshenniń jobasyn otandyq sáýletshi Iаkov Venıamınovıch Ezaý bastaǵan jobalaý fırmasy ázirlepti.
Qazirgi tańda keshendegi úsh nysannyń sońǵysy – “bıznes” synypty turǵyn úı paıdalanýǵa berilse, sonyń 30 páteri úleskerlerge tıesili eken. Al qalǵan 135 páter qordyń ıeliginde. Atalǵan páterler artynan satyp alynatyndaı etip jalǵa beriledi. “Samuryq-Qazyna” Jyljymaıtyn múlik qory” AQ basqarma tóraǵasynyń orynbasary Nurlan Nurǵalıevtiń aıtýynsha, nysan qurylysy 2009 jyldyń sáýirinen bastalǵan. Al qorǵa tıesili 135 páter jalǵa berý baǵdarlamasy boıynsha rynokqa shyǵarylady. Bul jerde bir sharshy metrge jal baǵasy 1300 teńgeni quraıtyndyǵyn aıta ketý kerek.
Jyljymaıtyn múlik qorynyń qaramaǵynda 27 turǵyn úı qurylysy bolsa, sonyń 26-sy Astana qalasynda shoǵyrlanǵan. Ústimizdegi jyly osy nysandardyń 11-i paıdalanýǵa beriledi dep kútilýde. Qazirgi kezde “Aqjaıyq” jáne “Al Arka” turǵyn úı keshenderi paıdalanýǵa berilgen. Sondaı-aq Momyshuly men Mırzoıan kósheleriniń qıylysynda oryn tepken “Marııa” turǵyn úıi salynyp bitse, onda 88 páter bar eken. Onyń 49-y qorǵa tıesili, al qalǵandary úleskerlerdiń úlesindegi páterler. Nurlan Amanjoluly páterlerdi birden satýǵa shyǵarmaýdyń artynda olardyń alyp-satarlardyń qolyna ótip ketpeýi qareketi turǵandyǵymen túsindirdi. Satyp alýǵa nıet bildirgen adam aldymen sol páterde bes jyl boıy turýy tıis.
Munan keıin Elbasy N.Á.Nazarbaev “Izýmrýdnyı kvartal” ákimshilik keshenine at basyn tiredi.
– Astanamyzdyń ishinde jańa tamasha ǵımarattar iske qosylyp jatyr. Myna “bılep” turǵan úsh úıdi kórip tursyzdar, elimizdegi eń tamasha páterler osynyń ishinde bolaıyn dep tur. Onyń ishinde myńnan asa páter bolsa, sonymen birge, astynda avtokólik qoıatyn jeri men dúkenderi salynýda. Al myna býlvardyń bergi jaǵynda Astanadaǵy eń bıik 47 qabatty úı salynyp, keler jyly bitetin bolady. Sonymen, ortalyqtaǵy eń úlken ǵımarattar men turǵyn úıler, ofıster bitip, ary qaraı elordamyz óz baǵytymen órkendep óse beredi, – degen Elbasy Astanadaǵy úleskerler máselesiniń de óz sheshimin taýyp, salynyp jatqan turǵyn úı keshenderi jalǵa beriletindigin jáne olardyń jalǵa tólegen aqshalary keıin sol úıdi satyp alý qarjysyna qosylatynyn jetkizdi. Sondaı-aq Prezıdent memlekettik qyzmetkerlerge arnalǵan memlekettik úıler bolatyndyǵyn da aıtty.
– Táýelsizdik saraıynyń oń jaǵynan úlken tarıhı mýzeı salynsa, jańadan kórermender kózaıymyna aınalatyn opera jáne balet teatry oryn tebetin bolady, – degen Memleket basshysy osymen qalanyń ishindegi turǵyn úı, sport, densaýlyq saqtaý, áleýmettik-mádenı nysandar qurylystarynyń barlyǵy buıyrtsa, keler jyly táýelsizdigimizdiń jıyrma jyldyq merekesine oraı aıaqtalatynyn málimdedi. Osy rette Nursultan Ábishuly Astananyń ákimshilik ortalyǵynda telearnalar ornalasatyn medıa-keshen salynyp jatqanyn da nazardan tys qaldyrmady. – “Bul jerde “Habar” jáne “Qazaqstan” telearnalarymen qatar, ózge de telearnalar ornalasatyn bolady”, – dedi Prezıdent.
“Izýmýrýdnyı kvartal” ákimshilik kesheni elordanyń Esil ózeniniń sol jaǵalaýynda sýly-jelekti býlvarda ornalasqan. Bul nysan keler jyly qarashada jalpy qoldanysqa berilýi tıis. Jobany júzege asyrý nátıjesinde ekonomıkalyq aınalymǵa 112 myń sharshy metr kommersııalyq ǵımarat, qarjylandyrý quny 25 mıllıard teńgeden asatyn 750 parkıng aınalymǵa engizilmek.
Bıylǵy jyldyń 1 tamyzyna qaraǵanda jyljymaıtyn múlik qory jalpy somasy 90,7 mıllıard teńgege 27 qurylysy bitpegen nysandy qarjylandyrý jónindegi kelisim jasalǵan. Onyń 24 nysany (69,67 mıllıard teńge) Astana qalasynda, 2 nysany Almaty qalasynda (4,75 mıllıard teńge), 1 nysany Almaty oblysynda (16,05 mıllıard teńge) shoǵyrlanǵan. Jyl basynda 2 qurylys nysany (“Al-Arka”– 153 páter jáne “Aqjaıyq” – 96 páter) paıdalanýǵa berildi. Ústimizdegi jyldyń aıaǵyna deıin 8 nysan jáne kezegimen 4 nysan paıdalanýǵa berilip, osylaısha 1502 úleskerdiń problemasyn sheshý kózdelgen. Taǵy da jalpy quny 44 mıllıard teńge bolatyn 8 nysandy qarjylandyrý jaıy túrli deńgeıde qarastyrylýda. Sóıtip, nysandardy qarjylandyrý sheńberinde 3304 úleskerdiń problemasyn sheshý josparlanǵan.
Asqar TURAPBAIULY, Ábdirahman QYDYRBEK, Sýretti túsirgender S.BONDARENKO, B.OTARBAEV.