EQYU-nyń Is basyndaǵy tóraǵasy, Qazaqstan Respýblıkasynyń Memlekettik hatshysy – Syrtqy ister mınıstri Qanat Saýdabaev keshe mynadaı málimdeme jasady, dep habarlady QR SIM-iniń baspasóz qyzmeti.
“EQYU-nyń Is basyndaǵy tóraǵasy Taýly Qarabaq janjaldy aımaǵyndaǵy Túıisý jelisi boıynda oq atýdy toqtatý rejiminiń sońǵy kezderi buzylýy jıilep ketýin sheshimdi túrde aıyptaıdy. Eki jaqtan da adam óliminiń ósýi aıtarlyqtaı dabyl qaqtyrady”, delingen málimdemede.
EQYU-nyń Is basyndaǵy tóraǵasy sondaı-aq óziniń málimdemesinde oq atpaý rejimin buzýdyń kez kelgen kórinisi Mınsk konferensııasy aıasynda júrgizilip jatqan kelissóz úderisterin turaqsyzdandyryp, konstrýktıvti únqatysýdy belsendi etý jolyndaǵy múmkindikterdi shekteıtinin atap kórsetedi. Osyǵan baılanysty ol 2010 jyldyń 6 qyrkúıeginde janjaldasýshy taraptardy sabyrlylyq kórsetip, oq atýdy toqtatý týraly ýaǵdalastyqtardy qatań saqtaýǵa jáne ózara aıyptaýlarǵa qurylǵan málimdemeler jasaýdan tartynýǵa shaqyrǵan Mınsk toby teń tóraǵalaryn qoldaıdy.
Q.Saýdabaev málimdemesiniń qorytyndysynda Astanada ótetin EQYU sammıti aldynda, ıaǵnı kúz aılary boıy Mınsk toby teń tóraǵalary josparlap otyrǵan Taýly Qarabaq problemalaryn retteý boıynsha ymyra jolyn izdeý atalǵan sozylmaly janjalǵa barlyq tikeleı qatysýshylar tarapynan progreske jetýge shynaıy múddelilik tanytylǵan jaǵdaıda ǵana nátıjeli bolatynyn atap kórsetedi.