Bárekeldi!

TEATR MEN MEShITTIŃ IRGETASY QALANDY Qostanaı qalasynyń ortalyǵyn­daǵy Alǵashqy tyń ıgerýshiler alańyna qazaq drama teatrynyń jańa ǵımaraty salynatyn boldy. Bul klassıkalyq úlgidegi zamanaýı qurylys I.Omarov atyndaǵy oblystyq qazaq drama tea­trynyń on jyldyǵy qarsańynda onyń ujymy men jalpy ónerdi ulyq tutatyn qostanaılyqtarǵa tamasha tartý bol­ǵa­ly otyr. Qostanaı qalasyndaǵy zııaly qaý­ym ókilderi bolashaq teatr túsetin qu­ry­lys alańyna kóp jınaldy. Oblys ákimi Sergeı Kýlagın ónersúıer qaýym­dy jaǵymdy jańalyqpen qut­tyqtaı otyryp, teatrdyń bir jyl ishin­de daıyn bolatynynan habardar etti. – Bıyl jyl aıaǵyna deıin tórt aı, kelesi jyly segiz aı ýaqytymyz bar. Teatr ıne-jipten shyqqansha apta saıyn emes, kún saıyn kelip, qurylys barysyn kórip turamyn, – dedi Sergeı Vıtalevıch. Teatr qurylysyna 1 mıllıard 886 mıllıon teńgege qarastyrylǵan. Eńseli qurylys tórt qabattan turady. Onda teatr akterleri men kórermenderge bar­lyq jaǵdaı jasalatyn bolady. Sol kúni Qostanaı qalasyndaǵy Maıakovskıı kóshesiniń boıynan jańa meshittiń de irgetasy qalandy. Oblys or­talyǵyndaǵy HIH ǵasyrdyń eskert­ki­shi bolyp sanalatyn eski meshit úıi mu­sylman jurtshylyǵyna tarlyq ete­tin. Dinı merekelerde meshittiń ishine syı­maǵan jurt onyń syrtynda oty­ra­tyn. Osydan eki jyl buryn oblys or­talyǵynda meshit salý týraly sheshim qa­byldanyp, onyń orny týraly biraz áń­gime bolǵany da ras. Endi tańdalǵan orynda záýlim meshit qurylysynyń qazyǵy qaǵyldy. Názıra JÁRIMBETOVA. Qostanaı. * ** QARASAI BATYR ATYNDAǴY JAŃA MEKTEP daryndy shákirtterge esigin aıqara ashty О́rkenıetke bet burǵan qazirgi ke­zeńde damıtyn el daryndy ulandary­nan kóp úmit kútetini túsinikti. Osy­laı­sha besigin túzep, bilimdige jol ashýǵa um­tylǵan tusta jer-jerde úsh tuǵyrly tildi alǵa qoıǵan bilim shańyraq­tary­nyń qatary molaıýda. Soǵan saı Ala­taý­dyń etegindegi Qarǵaly aýylynyń “Naýryz” yqsham aýdanynda “Daryndy balalarǵa arnalǵan úsh tilde oqytatyn Qa­rasaı batyr atyndaǵy arnaýly gım­nazııasy” memlekettik mekemesi jańa oqý jylynda óz shákirtterin qushaq jaıa qarsy aldy. Qurylysy burnaǵy jyly bastal­ǵan 500 oryndyq gımnazııanyń irge­le­nýi úshin respýblıkalyq bıýdjetten 818 mln.teńge qarajat bólinipti. Ony oı­daǵydaı ıgergen qurylysshylar sáý­let­ti ǵımaratty bilim kúnine tartý etti. Taǵy bir aıta ketetin jaı, atalǵan yq­sham aýdanǵa tarıhı atamekenine qonys aýdarǵan qandastarymyzdyń kóptep ornyqqany. Sondyqtan sońǵy bes jylda respýblıka boıynsha alǵash Naý­ryz merekesi toılanǵan osy ashyq alańnan oralmandarǵa jer telimi beri­lip, aýyl irgesi keńeıe túsken-di. Mun­da­ǵy sáýletti úıler ata jurtyna oral­ǵandardyń búgingi áleýmettik jaǵ­daıy­nan jan-jaqty habardar etip tur­ǵan­daı. Qarǵaly aýyldyq okrýgine qa­rasty aımaqtaǵy halyq sany osylaısha ósýimen birge, mektepke baratyn bala­lar qatary da jyl sanap arta tústi. El­ba­synyń “100 mektep, 100 aýrýhana” baǵ­darlamasymen qolǵa alynǵan qu­ry­lys nysany aıaqtalyp, kól-kósir qýa­nysh­qa bólengen shákirtter altyn uıa­la­rynyń tabaldyryǵyn attaýǵa múm­kindik aldy. Bilim shańyraǵynyń ashylý salta­natyna Jambyl aýdanynyń ákimi Mahabbat Bıgeldıev qatysty. “Ela­man” qurylys fırmasynyń bastyǵy Ar­tyǵalı Mırazov mektep basshyly­ǵy­na gımnazııanyń nyshandy kiltin tabys etti. Alǵashqy qońyraý qaǵylyp, qu­shaq­tary gúl destelerine tolǵan ustazdar men shákirtter synyp tabaldyryǵyn attady. Kúmisjan BAIJAN. Almaty oblysy, Jambyl aýdany.