BTA bank qaıta qurylymdaýdy tabysty aıaqtady

Almatyda ótken baspasóz más­lıhatynda “BTA bank” AQ-tyń basqarma tóraǵasy Ánýar Sáıdenov jınalǵandarǵa banktiń óz kredı­tor­lary aldyndaǵy qaryzdyq bere­she­giniń kólemi azaıǵandyǵyn habar­lady. Bank jetekshisiniń aıtýynsha, bank óz kredıtorlary aldyndaǵy jalpy somasy 16,65 mıllıard dollardy quraıtyn qarjylyq mindettemelerin qaıta qurylymdaý úderisin tabysty aıaqtaǵan. Sóz reti kelgende atap aıtarlyǵy, mundaı sheshimdi Almaty qalalyq arnaıy qarjylyq soty bıylǵy jyldyń tamyz aıynyń 31-inde de shyǵarǵan bolatyn. Ánýar Sáıdenov kredı­torlarynyń aldyndaǵy qarjylyq mindettemelerin qaıta qurylym­daýy aıasynda bank buryn shyǵa­rylǵan oblıgasııalarynyń jáne ózge de mindettemeleriniń kúshin joıyp, kredıtorlarǵa 945 mıllıon dollar tólengendigin de atap aıtty. – Sonymen qatar jańa borysh­tyq baǵaly qaǵazdar men aksııa­lardy qalpyna keltirýge arnalǵan 5,2 mlrd. AQSh dollaryna oblı­ga­sııalardy qosa alǵandaǵy, 2.3 mlrd. AQSh dollaryna úlken oblıga­sııa­lardy, 429 mln. AQSh dollaryna dıskontty (OID) arnaıy borysh­tyq quraldaryn jáne 773 mln. AQSh dollaryna rettegish oblı­ga­sııa­laryn jáne jańartylmaly ne­sıe jelisi boıynsha, saýdany qar­jy­landyrýǵa 698 mln.AQSh dol­la­ryna kelisim jasaldy, – dedi ol. Bank oblıgasııalaryn qara­paı­ym aksııalarǵa aıyrbastaýdyń n­á­tı­jesinde ishki jáne syrtqy kre­dı­torlar bank aksıonerlik kapıta­lynyń 18,5 paıyzdyq jıyntyǵyna ıelik etetin aksıonerlerge aınal­­dy. Burynǵysynsha BTA banktiń negizgi aksıoneri – “Samuryq-Qa­zyna” ulttyq ál-aýqat qory, qarjy ınstıtýtynyń oblıgasııalaryn qarapaıym aksııalarǵa aıyrbastaýy nátıjesinde onyń úlesi bank ak­sıonerlik kapıtalynyń 81,48 pa­ıyzyna deıin ulǵaıdy. Kredı­tor­lardyń bank aksıonerleri qura­my­na enýi dırektorlar keńesi qura­my­nyń ózgerýine alyp keldi. Aksıo­n­er­lerdiń bıylǵy jyldyń 19 ta­my­zynda ótken kezekten tys jalpy jı­nalysynda qabyldanǵan sheshim­derge sáıkes ótinishtiń negizinde táý­elsiz dırektor Ýlf Vokýrka­nyń, sondaı-aq, Dırektorlar ke­ńesiniń músheleri – Erlan Tátishev pen Qaırat Áıtekenovtiń ókilet­tik­teri merziminen buryn toqtatyldy. BTA Banki aksıonerleriniń jı­na­lysynda dırektorlar keńesiniń quramyna jańa múshelerdi – kredıtorlar komıtetiniń ókilderi Krıstof Shefbek pen Maarten Leo Pronkti jáne táýelsiz dırektor Bolat Babenovti saılaý jóninde sheshim qabyldandy. BTA bank qaıta qurylymdaýdy oıdaǵydaı aıaqtap, óz kúshin bıznesti belsendi túrde damytýǵa jáne óziniń daǵdarysqa deıingi ustanymdaryn qalpyna keltirýge jumyldyrýdy kózdep otyr. Banktiń bolashaqtaǵy orta merzimdi bıznes-strategııasy – ámbebaptyq jáne ishki rynokqa baǵdar ustaný. Sóı­tip, 2014 jylǵa qaraı banktiń kre­dıttik portfeliniń qurylymynda korporatıvti bıznestiń úlesi 50 paıyzdy, shaǵyn jáne orta bız­nes­tiń úlesi 30 paıyzdy, bólshektik bız­nestiń úlesi 20 paıyzdy quraýy jos­parlanyp otyr. Bankti qor­lan­dyrý strategııasy da ishki rynokqa baǵyttalǵan jeke jáne zańdy tul­ǵa­lardyń salymdaryn tartý esebi­nen depozıttik qordy belsendi túr­de ósirýdi kózdeıdi. Banktiń jospa­­rynda 2014 jylǵa qaraı depozıttik qordy 2008 jylmen salystyrǵanda eki ese arttyrý qarastyrylǵandyǵy kóp nárseden habar berse kerek. Bıznestiń korporatıvtik seg­mentinde bank nesıelik portfeldiń sapasyn jaqsartý, ártarapty táýe­kelge bel býý, nesıelik portfeldiń tıimdiligin jáne tabystylyǵyn art­tyrý baǵytyndaǵy jumystardy atqarý josparlanýda. Sonymen qatar, bank kepildik qordy qalpyna keltirýdi jáne zańsyz túrde shyǵa­ryl­ǵan aktıvterdi múmkin bolǵa­nyn­sha keri qaıtaryp alýdy zań­ger­lik jáne qarjylyq keńesshilerimen birlese otyryp júzege asyrýdy josparlap otyr. Shaǵyn jáne orta bıznes segmentinde bank “Damý” qo­ry júzege asyryp otyrǵan ká­sip­kerlerdi memlekettik baǵdarlamalar aıasynda qoldaý jumystaryn jalǵastyrmaq. Bólshektik segmentte bank ne­sıe­lik portfeldi josparly túrde, or­ta eseppen jyl saıyn 14 paıyz­ǵa ulǵaıtýdy kózdeıdi. Bul tusta naryqtyq baǵdarlamalar boıynsha kredıtter tek qana bank jalaqylyq jobalar negizinde qyzmet kórse­te­tin kompanııalardyń qyzmetkerle­rine, sondaı-aq akkredıttelgen qar­jylyq turǵydan turaqty kompa­nııalardyń qyzmetkerler quramyna beriletin bolady. Basqarma tóra­ǵasy Ánýar Sáıdenovtiń pikirinshe, BTA bankti qaıta qurylymdaýdyń sátti aıaq­talýy qazaqstandyq bank sekto­ryndaǵy bulyńǵyrlyq kezeńine qoı­ylǵan, kópten kútilgen sońǵy núk­te bolyp tabylady jáne otan­dyq ári shet­eldik ınvestorlarǵa be­ril­­gen ońdy belginiń qyzmetin atqarady. Baqyt BALǴARINA. ALMATY.