Qala qysqa daıyn ba?..

Siz ne deısiz? Saryala kúz de kelip jetti. Endi biraz ýaqyttardan keıin soltús­tik­tiń sýyǵy da bastala­dy. Qa­zirgi kúnniń ózinde bir kún salqyn, bir kún jyly bolyp qubylyp tur­ǵanda, qystyń qalaı bolaryn kim bilsin. Aýa raıynyń osyndaı ózgerisinen-aq qys qyr astynda dep bilemiz. Oblys ortalyǵynda byltyr qys ortasynda apatty oqıǵalar da oryn aldy. Jalpy, oblys ortalyǵynyń qys­qa daıyndyq jumystaryn erte kóktemnen bastap jaz boıy júrgizilgenin kósheler boıy­nan, aýlalar ishinen, qala ákim­di­giniń kommýnaldyq sharýashylyq basshylaryn shaqyryp jıi ótkize bastaǵan otyrystarynan baı­qap, kórip júrmiz. Sonda qysy al­ty aıǵa sozylatyn bizdiń ob­lys ortalyǵynyń qysqy maý­sym­ǵa daıyndyǵy qandaı eken? “Egemen Qazaqstannyń” Pavlodar oblysyndaǵy tilshisi Farıda Byqaı qala ákimi Baqytjan Jolamanovqa: – Siz buǵan ne deısiz? – Jańa ózińiz aıtyp ótken­deı, qala ákimdiginde qazir kúnde jı­nalys desem de bolady. Qys­tyń qamyn qazirden qolǵa alyp, daıyndyq jumystaryn jedel qolǵa almasaq, ýaqyttan utylyp qalarymyz anyq. Qalanyń qys­qa daıyndyǵy jóninde arnaıy qurylǵan shtab otyrysyna bar­lyq kommýnaldyq júıe bas­shy­lary qatysady. Oblys ortaly­ǵyn­da jalpy 1314 turǵyn úı bar. Bularǵa 200-den astam koope­ratıv qyzmet kórsetedi. Turǵyn úılerge, mektep, aýrý­hana, balabaqsha sııaqty áleý­met­tik nysandarǵa jylý beretin toraptar júıesi  jaz boıy synaqtardan ótkizilip, qys maýsymyna ázir. Joǵaryda atal­ǵan turǵyn úılerdiń 817 úıi de to­lyǵymen jylý maýsymyna daıyn tur. Ázirshe, sondaı bir qaýipti, asa kúrdeli máseleler joq. Oblys ortalyǵynyń Karl Marks, Sývorov, Pavlov, Lýna­charskıı, Mır, Toraıǵyrov kó­sheleri boıyndaǵy jylý júıe­leri kúrdeli jóndeýlerden ótýde, qyrkúıektiń sońyna deıin aıaq­talady. Sońǵy úsh jyl boıy Ler­montov kóshesi jaz aılaryn­da jabyldy. Ábden shirigen qubyrlar alynyp, ornyna zama­naýı jańa qubyrlar, aıazǵa tózimdi kollektor salyndy. Sáýir aıynda bastalǵan “Jol kartasy” baǵdarlamasy boıyn­sha 281 mıllıon teńge bólingen bul sharýa endi aldaǵy qazan aıynda tolyǵymen aıaqtalady. Bul jerde 300-deı adam jumys jasaýda. Apatty jaǵdaı oryn alǵan qalanyń “Shańyraq” mádenı ortalyǵy mańynda aıazǵa shydamaı sý qubyrlarynyń jarylǵany belgili. Qazir bul aralyq qalpyna keltirildi. Bıyl oblys ortalyǵynyń “Pavlodar” jylý júıeleri AQ-qa qarasty mekemeler jalpy uzyndyǵy 9 502,1 sharshy metrdi quraıtyn jylý júıelerine kúrdeli jóndeý jumystaryn júrgizýdi qolǵa aldy, “Vodokanal” seriktestigi jal­py uzyndyǵy 3360 sharshy metrdi quraıtyn sý júıeleri qubyrlaryn jóndedi. Qys aı­la­rynda qar tazalaıtyn qosymsha 10 jańa tehnıka satyp alyndy. Oblys ortalyǵynyń qysqa daıyndyǵy kóńildegideı, bul sha­ralar kúndelikti jumys kes­te­sinen túspeıdi deýge bolady. Pavlodar.